ଖଡିଆଳ: ନୂଆପଡା ଜିଲା ଖଡିଆଳ ବ୍ଲକ ଓ ବଲାଙ୍ଗୀର ଜିଲା ବଙ୍ଗୋମୁଣ୍ଡା ବ୍ଲକର ଶତାଧିକ ଶ୍ରମିକ ସୁଦୂର ମୁମ୍ବାଇ ସହରରେ ଫସି ରହିଥିବା ଜଣାପଡ଼ିଛି । କରୋନା ଭାଇରସ ଯୋଗୁଁ ଗତ ୨୫ ତାରିଖ ଠାରୁ ଭାରତ ସଂପୂର୍ଣ୍ଣ ରୂପେ ଲକଡାଉନ ଘୋଷଣା ହେବା ପରେ ଏମାନେ ଓଡ଼ିଶାକୁ ଫେରିବା ପାଇଁ ଉଦ୍ୟମ କରୁଛନ୍ତି । ସେଥିପାଇଁ ଏହି ଦାଦନ ଶ୍ରମିକମାନେ ଓଡ଼ିଶା ସରକାରଙ୍କୁ ଉଦ୍ଧାର ଲାଗି ନିବେଦନ କରିଛନ୍ତି । ଓଡିଶା ସରକାର ସେମାନଙ୍କୁ ଉଦ୍ଧାର କରି ନିଜ ନିଜ ଗ୍ରାମକୁ ପଠାଇବାର ବ୍ୟବସ୍ଥା କରିବାକୁ ଅନୁରୋଧ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ ଖଡିଆଳ ବ୍ଲକ ଅନ୍ତର୍ଗତ ଖାସବାହାଲ, ଚଚରାଭଟା, ବଙ୍କାପୁର, ଖଇରଭାଡି ସହ ବଙ୍ଗୋମୁଣ୍ଡା ବ୍ଲକର ଶ୍ରୀରାମ ଗ୍ରାମର ଶ୍ରମିକମାନେ ଗତ ୬ ମାସ ପୂର୍ବେ ମୁମ୍ବାଇକୁ ଦାଦନ ଖଟିବାକୁ ଯାଇଥିଲେ । ମୁମ୍ବାଇ ସହରର ଉଆଁସିସ୍ଥିତ ଉମରା କମ୍ପାନିରେ ଶ୍ରମିକ ଭାବରେ କାମ କରୁଥିଲେ । ହେଲେ ମହାମାରୀ କରୋନା ପରେ କେନ୍ଦ୍ର ସରକାରଙ୍କ ଲକଡାଉନ ପରେ ସେମାନେ ଅତ୍ୟନ୍ତ ଦୟନୀୟ ଅବସ୍ଥାରେ ପଡି ରହିଛନ୍ତି । ସେମାନଙ୍କୁ କମ୍ପାନି କିମ୍ବା ମୁମ୍ବାଇ ମହାନଗର ପ୍ରଶାସନ କୌଣସି ପ୍ରକାର ସହଯୋଗ କରୁନଥିବା ବେଳେ ଏକ ପରିତ୍ୟକ୍ତ କୋଠାରେ ପଡି ରହିଛନ୍ତି । ହୋଟେଲ ଖୋଲା ନଥିବାରୁ ଭୋକ ଉପାସରେ ଦିନ ବିତାଉଛନ୍ତି । ରାଜ୍ୟ ସରକାର ତୁରନ୍ତ ଉଦ୍ଧାର କରନ୍ତୁ ବୋଲି ସେମାନେ ନିବେଦନ କରିଛନ୍ତି ।