ସୁନ୍ଦରଗଡ଼: ଭିସ୍ମା ଥାନା ପଛପଟେ ଥିବା ଏକ କୁଡ଼ିଆ ଘରେ ନିଆଁ ଲାଗିଯିବାରୁ ଆଜି ମା’ ଓ ଦିବ୍ୟାଙ୍ଗ ଝିଅଙ୍କର ମୃତ୍ୟୁ ଘଟିଛି। ମୃତକମାନେ ହେଲେ ମା’ ଗୋଲାପି ମେହେର (୬୦) ଓ ଝିଅ ଲକ୍ଷ୍ମୀ ମେହେର (୩୫)। ସେମାନେ ଆଜି ସନ୍ଧ୍ୟାରେ ଘର ଭିତରେ ଥିଲେ। କୌଣସି କାରଣରୁ ଚାଳ ଘରେ ନିଆଁ ଲାଗିଯାଇଥିଲା। ତେବେ ଉଭୟ ମା’-ଝିଅ ଘର ଭିତରୁ ବାହାରି ନ ପାରିବାରୁ ତାଙ୍କର ମୃତ୍ୟୁ ହୋଇଥିବା ଜଣାପଡ଼ିଛି।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ ଗାଁରେ ଏକ ଘର ଜଳୁଥିବା ଦେଖି କେହି ଜଣେ ଲୋକ ପ୍ରଥମେ ପୁଲିସ ଓ ଅଗ୍ନିଶମ ବିଭାଗକୁ ସୂଚନା ଦେଇଥିଲେ। ଅଗ୍ନିଶମ ବିଭାଗର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ନିଆଁ ଜଳୁଥିବା ଘରକୁ ଲିଭାଇ ଥିଲେ। ମାତ୍ର ସେତେବେଳକୁ ଉଭୟ ମା’ ଓ ଝିଅଙ୍କ ମୃତ୍ୟୁ ହୋଇସାରିଥିଲା।
ରିପୋର୍ଟ ଲେଖାଯିବା ବେଳକୁ ପୁଲିସ ମା’-ଝିଅଙ୍କର ମୃତଦେହ ଜବତ କରିଛି। ଆସନ୍ତାକାଲି ପୋଷ୍ଟମର୍ଟମ ହେବ। ଅଗ୍ନିକାଣ୍ଡର ପ୍ରକୃତ କାରଣ ଜଣାପଡ଼ି ନାହିଁ। ଅନ୍ୟପଟରେ କୁହାଯାଉଛି ଯେ, କିଛି ଦିନ ତଳେ ଗୋଲାପି ଓ ତାଙ୍କର ବୋହୂଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ଘଟଣା ସମୟରେ ପୁଅ-ବୋହୂ ନ ଥିବାରୁ ଗାଁ ଲୋକେ ବିଭିନ୍ନ କଥା କହୁଛନ୍ତି।