ପାରୋଲରେ ଆସି ଫେରାର ହୋଇଥିବା ହତ୍ୟା ଅଭିଯୁକ୍ତ ୧୧ ବର୍ଷ ପରେ ପୁଲିସ ଜାଲରେ
ପୁରୀ : ପାରୋଲରେ ଘରକୁ ଆସିଥିବା ଜଣେ ପତ୍ନୀହନ୍ତାକାରୀ ସ୍ବାମୀକୁ ଆଜି ପୁଲିସ ଦୀର୍ଘ ୧୧ ବର୍ଷ ପରେ ଧରିବାରେ ସକ୍ଷମ ହୋଇଛି। ଦୀର୍ଘ ବର୍ଷ ଧରି ପୁଲିସ ଆଖିରେ ଧୂଳି ଦେଇ ଏହି ହତ୍ୟାଭିଯୁକ୍ତ ଲୁଚି ରହିଥିଲା। ତେବେ ବ୍ରହ୍ମଗିରି ଥାନା ଆଇଆଇସି ମନୋଜ ଶତପଥୀଙ୍କ ଉଦ୍ୟମକ୍ରମେ ଏହି ଅପରାଧୀ ପୁଲିସ ଜାଲରେ ଆଜି ପଡ଼ିଥିବା ଏସ୍ପି ଡା. କେ. ଭିଶାଲ ସିଂହ ଟୁଇଟ୍ କରି ଜଣାଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ଖବର ନେବାରେ ଜଣାପଡ଼ିଛି ଯେ ବ୍ରହ୍ମଗିରି ଥାନା ଅନ୍ତର୍ଗତ ସାତପଡ଼ା ପାଖ ଇଛାପୁର ଭୋଇ ସାହିର ପଞ୍ଚୁ ଭୋଇଙ୍କ ପୁଅ ଦୁଃଶାସନ ଭୋଇ(୫୫) ଗତ ୧୯୯୨ ମସିହାରେ ନିଜ ପତ୍ନୀ କମଳା ଭୋଇଙ୍କୁ ଯୌତୁକ ଜନିତ ନିର୍ଯ୍ୟାତନା ଦେବା ସହିତ ହତ୍ୟା କରିଥିଲା। ଏନେଇ ଅଭିଯୋଗ ହେବାରୁ ବ୍ରହ୍ମଗିରି ଥାନା ପୁଲିସ ଏକ ମାମଲା ରୁଜୁ କରି ଦୁଃଶାସନକୁ ଗିରଫ କରି କୋର୍ଟଚାଲାଣ କରିଥିଲା। ଏହି ମାମଲାର ବିଚାର କରି ମାନ୍ୟବର କୋର୍ଟ ଦୁଃଶାସନକୁ ଦୋଷୀ ସାବ୍ୟସ୍ତ କରି ତାକୁ ସଶ୍ରମ କାରାଦଣ୍ଡରେ ଦଣ୍ଡିତ କରିଥିଲେ। ତେବେ ଗତ ୨୦୧୦ ମସିହା ଜାନୁଆରୀ ୨୩ ତାରିଖ ଦିନ ଦୁଃଶାସନ ପାରୋଲରେ ଜେଲରୁ ଆସିଥିଲେ। କିନ୍ତୁ ଏହାପରେ ଦୁଃଶାସନ ଫେରାର ହୋଇଯାଇଥିଲା। ବହୁତ ଖୋଜାଖୋଜି କରାଯାଇଥିଲେ ମଧ୍ୟ ତାକୁ ଆଉ ପୁଲିସ ପାଇପାରିନଥିଲା। ତେବେ ଦୁଃଶାସନ ଏବେ ନାଥପୁର ଭୋଇ ସାହିରେ ଥିବା ଖବର ପାଇ ଆଜି ବ୍ରହ୍ମଗିରି ଥାନା ଆଇଆଇସି ଶ୍ରୀ ଶତପଥୀ ସଦଳବଳେ ସେଠାରେ ଚଢ଼ଉ କରିଥିଲେ। ଏହି ସମୟରେ ପୁଲିସ ଦୁଃଶାସନକୁ ଧରିଆଣିଛି। ଆସନ୍ତା କାଲି ତାକୁ କୋର୍ଟରେ ହାଜର କରାଯିବ ବୋଲି ଏସ୍ଡିପିଓ କିଶୋର ଚନ୍ଦ୍ର ମୁଣ୍ଡ କହିଛନ୍ତି।