ଛତୁ ସଂଗ୍ରହ କରିବାକୁ ଯାଇଥିବାବେଳେ ଭାଲୁ କାମୁଡାରେ ବୃଦ୍ଧ ମୃତ
ତେନ୍ତୁଳିଖୁଣ୍ଟି : ନବରଙ୍ଗପୁର ତେନ୍ତୁଳିଖୁଣ୍ଟି ବ୍ଲକ କଙ୍ଗରା ଗ୍ରାମପଂଚାୟତ ଅନ୍ତର୍ଗତ ଯାନୀଗୁଡା ଗ୍ରାମରେ ଭାଲୁ କାମୁଡାରେ ଜଣେ ବୃଦ୍ଧଙ୍କର ମୃତ୍ୟୁ ହୋଇଛି | ବୃଦ୍ଧ ଜଣଙ୍କ ନିକଟସ୍ଥ ଜଙ୍ଗଲକୁ ଛତୁ ସଂଗ୍ରହ କରିବାକୁ ଯାଇ ଭାଲୁ ଆକ୍ରମଣର ଶିକାର ହୋଇଥିଲେ | ସୂଚନା ଅନୁଯାୟୀ ଯାନୀ ଗୁଡା ଗ୍ରାମର ଡମୁ ଭତରା (୬୦) ଗତକାଲି ଅପରାହ୍ନରେ ନିକଟସ୍ଥ ଜଙ୍ଗଲକୁ ଛତୁ ସଂଗ୍ରହ କରିବାକୁ ଯାଇଥିଲେ | ତେବେ ବିଳମ୍ବିତ ରାତ୍ର ପର୍ଯ୍ୟନ୍ତ ବୃଦ୍ଧ ଜଣଙ୍କ ଘରକୁ ଆଉ ଫେରିନଥିଲେ | କାଲି ଦିନ ତମାମ ବର୍ଷା ଲାଗି ରହିଥିବାରୁ ଘର ଲୋକ ମଧ୍ୟ ଅଧିକ ଖୋଜାଖୋଜି ନକରି କାହା ଘରେ ଆଶ୍ରୟ ନେଇଥିବ ଭାବି ରହିଥିଲେ |
Sambad is now on WhatsApp
Join and get latest news updates delivered to you via WhatsApp
ତେବେ ଆଜି ସକାଳୁ ନିକଟସ୍ଥ ଜଙ୍ଗଲରେ ବୃଦ୍ଧ ଜଣଙ୍କ ଅଚେତ ଅବସ୍ଥାରେ ପଡ଼ି ରହିଥିବା ଖବର ପାଇ ଘଟଣା ସ୍ଥଳରେ ପରିବାର ଲୋକେ ପହଂଚିଥିଲେ | ବୃଦ୍ଧଙ୍କ ଶରୀରର ଅନେକ ଅଂଶ ଖଣ୍ଡିଆଖାବରା ହେବା ସହ କିଛି ଅଂଶ ଭାଲୁ ଖାଇ ଦେଇଥିବା ଗ୍ରାମବାସୀ ପ୍ରକାଶ କରିଛନ୍ତି | ତେବେ ସଙ୍କଟାପନ୍ନ ଅବସ୍ଥାରେ ଥିବା ବୃଦ୍ଧଙ୍କୁ ନବରଙ୍ଗପୁର ମୁଖ୍ୟ ଚିକିତ୍ସାଳୟ କୁ ଚିକିତ୍ସା ପାଇଁ ନେଇଥିଲେ ହେଁ ଡାକ୍ତର ମୃତ ଘୋଷଣା କରିଥିଲେ | ଏନେଇ ତେନ୍ତୁଳିଖୁଣ୍ଟି ଥାନା କେଶ ନମ୍ବର ୧୭/୨୦୨୦ ଅନୁଯାୟୀ ଏକ ମାମଲା ରୁଜୁ ହୋଇଛି |
ଏ.ଏସ.ଆଇ କୁବେର ଦିଗାଲ କେଶର ତଦନ୍ତ କରୁଥିବା ବେଳେ ନବରଙ୍ଗପୁର ମୁଖ୍ୟ ଚିକିତ୍ସାଳୟରେ ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରା ଯାଇଥିବା ପୁଲିସ ସୂତ୍ରରୁ ସୂଚନା ମିଳିଛି | ଡ଼ମୁ ଭତରା ନିହାତି ଗରିବ ପରିବାର ହୋଇଥିବା ଯୋଗୁଁ ତୁରନ୍ତ ତାଙ୍କ ପରିବାରକୁ କ୍ଷତିପୂରଣ ସହାୟତା ରାଶି ଯୋଗାଇ ଦେବାକୁ ଗ୍ରାମବାସୀ ଦାବି କରିଛନ୍ତି |