ବୃଦ୍ଧଙ୍କୁ ଦଳି ମାରିଦେଲେ ହାତୀପଲ: ଘର ଭାଙ୍ଗିଲେ, ଫସଲ ନଷ୍ଟ କଲେ

ରାଇଘର: ନବରଙ୍ଗପୁର ଜିଲ୍ଲା ରାଇଘର ବ୍ଲକ ସୀମାନ୍ତ ବର୍ତ୍ତି ହାଟଭରାଣ୍ଡି ପଞ୍ଚାୟତ ଅନ୍ତର୍ଗତ ସିଉନାପାଲି ଗ୍ରାମର ତେଜୁ ଗଣ୍ଡ (୬୦)ଙ୍କୁ ଗତକାଲି ରାତିରେ ଛତିଶଗଡ଼ ଅଞ୍ଚଳରୁ ଏକ ହାତୀପଲ ଆସି ଦଳି ମାରି ଦେଇଥିବା ଜଣାପଡିଛି।
ସୂଚନା ଅନୁଯାୟୀ, ଗତକାଲି ରାତି ପ୍ରାୟ ୨ ଟା ସମୟରେ ଏକ ହାତୀପଲ ଛତିଶଗଡ଼ ଅଞ୍ଚଳର ବୋରେଇ ଜଙ୍ଗଲରୁ ଘୁଟକେଲ୍ ଦେଇ ଓଡ଼ିଶା ସୀମାନ୍ତର ଖିଲୋଲି ଜଙ୍ଗଲକୁ ପଶି ଆସିଥିଲେ। ସେଠାରୁ ସେମାନେ କାନାଡ଼ିହି, ସିଉନାପାଲି ଓ ଝଟିଆରପାରା ଚାଷ ଜମି ଦେଇ ମାରିଗାଁ ପର୍ଯ୍ୟନ୍ତ ଯାଇଥିଲେ। କିନ୍ତୁ ସେ ଅଂଚଳରେ ଆଉ ଜଂଗଲ ନଥିବା ଦେଖି ପୁଣି ସେହି ହାତୀପଲ ପଛକୁ ଫେରିଥିଲେ।

ଏହି ହାତୀପଲ ଫେରିବା ସମୟରେ ସିଉନାପାଲି ଗ୍ରାମ ଭିତରକୁ ପଶି ଆସିଥିଲେ। ରାତି ପ୍ରାୟ ୩ଟା ସମୟରେ ହାତୀପଲର ଗର୍ଜନ ଶୁଣି ଲୋକେ ବାହାରକୁ ବାହାରି ତଡ଼ିବା ଆରମ୍ଭ କରିଥିଲେ। ଠିକ୍ ଏହି ସମୟରେ ତେଜୁ ଗଣ୍ଡ ମଧ୍ୟ ଘରୁ ବାହାରି ଆସି ହାତୀପଲ ହାବୁଡ଼ରେ ପଡି ଯାଇଥିଲେ। ତେଜୁ ଗଣ୍ଡଙ୍କୁ ଏକା ଥରକେ ବହୁ ହାତୀ ଆକ୍ରମଣ କରି ଦଳି  ମାରି ଦେଇଥିବା ଜଣାପଡିଛି। ଘରଠାରୁ ପ୍ରାୟ ୫୦ ମିଟର ଭିତରେ ତେଜୁ ଗଣ୍ଡଙ୍କ ଶରୀର ଖଣ୍ଡ ବିଖଣ୍ଡିତ ହୋଇ ଏଣେତେଣେ ପଡ଼ି ରହିଥିବା ଦେଖିବାକୁ ମିଳିଛି।