ନବରଙ୍ଗପୁର: ନବରଙ୍ଗପୁର ଜିଲ୍ଲାରୁ ପଶ୍ଚିମ ଓଡ଼ିଶା, ଛତିଶଗଡ, ଆନ୍ଧ୍ର ପ୍ରଦେଶ ସହିତ ରାଜଧାନୀ ଭୁବନେଶ୍ୱରକୁ ସଂଯୋଗ କରୁଥିବା ଇନ୍ଦ୍ରାବତୀ ନଦୀ ଉପରେ ନିର୍ମାଣ ହୋଇଥିବା ଏକମାତ୍ର ପୋଲ ଦିନକୁ ଦିନ ଦୁର୍ବଳ ହେଉଛି । ପୋଲର ଉପର ଭାଗରେ ବର୍ତ୍ତମାନ ବିଭିନ୍ନ ଖାଲଖମା ସୃଷ୍ଟି ହେବା ସହ ପଡ଼ିଥିବା ସ୍ଲାପର ଲୁହାଛଡ କେତେକାଂଶରେ ଦେଖାଦେଉଛି। ଅଳ୍ପ ବର୍ଷା ହେଲେ ବି ପାଣି ଜମିଯିବା ଦ୍ୱାରା ପୋଲ ଉପରେ ଥିବା ଖାଲଗୁଡିକ ଜଣାପଡୁନାହିଁ । ଯାହାଫଳରେ ପୋଲ ଉପରେ ବେଳେ ବେଳେ କୃତ୍ରିମ ପୋଖରୀ ସୃଷ୍ଟି ହେଉଥିବାର ଦେଖିବାକୁ ମିଳୁଛି । ଏହାଦ୍ୱାରା ପ୍ରାୟତଃ ଛୋଟ ବଡ଼ ଦୁର୍ଘଟଣା ମଧ୍ୟ ଘଟୁଛି ।

Advertisment

ଇନ୍ଦ୍ରାବତୀ ନଦୀ ଉପରେ ରହିଥିବା ପୁରୁଣା ପୋଲ ଏବେ ଜରାଜୀର୍ଣ୍ଣ ଅବସ୍ଥାରେ ରହିଛି । ନୂଆପୋଲ ଉପରେ ଏବେ ଗାଡି ମୋଟର ଯାତାୟତ କରୁଛି । ନବରଙ୍ଗପୁର ଦେଇ ପଶ୍ଚିମ ଓଡ଼ିଶାକୁ ପ୍ରତ୍ୟେହ ଶତାଧିକ ଗାଡ଼ି ମୋଟର ଯାତାୟତ କରିଥାଏ । ୨୬ ନମ୍ବର ଜାତୀୟ ରାଜପଥ ପାପଡାହାଣ୍ଡି ଛକଠାରୁ ୩୯ ନମ୍ବର ରାଜ୍ୟ ରାଜପଥ ଡ଼ାବୁଗାଁ, ଉମରକୋଟ , ରାଇଘର ଦେଇ ଛତିଶଗଡ ସହିତ ପଶ୍ଚିମ ଓଡ଼ିଶା , ଉତ୍ତର ଓଡ଼ିଶା ଏବଂ ପୂର୍ବ ଓଡ଼ିଶାକୁ ମଧ୍ୟ ଏହି ଗୋଟିଏ ରାସ୍ତା ସଂଯୋଗ କରୁଛି । 

ଏହାବ୍ୟତୀତ କୋରାପୁଟ ଜିଲ୍ଲାରୁ ନବରଙ୍ଗପୁର ଜିଲ୍ଲାକୁ କୌଣସି ମାଲବାହୀ ଟ୍ରକ , ଯାତ୍ରୀବାହୀ ବସ ଯିବାଆସିବା କରେ ତେବେ ଏହି ଗୋଟିଏ ମାତ୍ର ଇନ୍ଦ୍ରାବତୀ ପୋଲ ଉପରେ ନିର୍ଭର । ଏବେ ପୋଲର ଦୁଇ ପାର୍ଶ୍ଵ ଖାଇବାରେ ଲାଗିଛି । ଆଗକୁ ବର୍ଷା ଦିନ ରହିଥିବାରୁ ବନ୍ୟା ସୃଷ୍ଟି ହେବାର ଯଥେଷ୍ଟ ସମ୍ଭାବନା ରହିଛି । ଅନ୍ୟପକ୍ଷେ ପୋଲ ତଥା ନଦୀର ପୂର୍ବ ଭାଗକୁ କିଛି ଦୂରରେ ନଦୀ ମଧ୍ୟରେ ଏକ ବ୍ୟାରେଜ ନିର୍ମାଣ କାର୍ଯ୍ୟ ଚାଲିଛି । ତାହାର ନିମ୍ନ ଭାଗକୁ ପ୍ରତ୍ୟେକ ବର୍ଷ ନଦୀକୂଳ ଖାଇ ଚାଷୀଙ୍କ ଚାଷ ଜମି ଲୀନ ହୋଇ ସାରିଲାଣି । ଏହି ସମସ୍ତ ପାରିପାର୍ଶ୍ବିକ ଦୃଷ୍ଟି କୋଣରୁ ଇନ୍ଦ୍ରାବତୀ ନଦୀର ସୁରକ୍ଷା ଦିଗରେ ବିଭାଗ ଦୃଷ୍ଟି ଦେବା ଆବଶ୍ୟକ ରହିଛି ବୋଲି ଜନସାଧାରଣ ଦାବି ହୋଇଛି। ଏହାସହିତ ନବରଙ୍ଗପୁର କୋରାପୁଟ ସୀମାବର୍ତ୍ତୀ ତଥା ଅଭିବ୍ୟକ୍ତ କୋରାପୁଟ କଳାହାଣ୍ଡିଜିଲ୍ଲା ସହିତ ଛତିଶଗଡ ଏବଂ ଆନ୍ଧ୍ର ପ୍ରଦେଶକୁ ସଂଯୋଗ କରୁଥିବା ଏହି ଏକମାତ୍ର ପୋଲ ପ୍ରାୟତଃ ଗତ ୧୯୮୧ ମସିହାରେ ନିର୍ମାଣ ହୋଇଥିଲା ।

ଯାହାକୁ କି ନିର୍ମାଣ ହୋଇ ପାଖାପାଖି ୪୦ ବର୍ଷରୁ ଉର୍ଦ୍ଧ୍ବ ହୋଇ ସାରିଲାଣି। ଏଥିସହିତ ବିଭାଗର ରକ୍ଷଣାବେକ୍ଷଣ ଅଭାବରୁ ଏହି ପୋଲ ବର୍ତ୍ତମାନ ଜରାଜୀର୍ଣ୍ଣ ଅବସ୍ଥାରେ ଆସି ପହଞ୍ଚିଛି। ଏଭଳି ସ୍ଥଳେ ବଡ ବଡ ମାଲ ବୋଝେଇ ଟ୍ରକ ସହ କାର, ମୋଟରସାଇକେଲ ଆଦିରେ ନିଜ ଜୀବନକୁ ବାଜି ଲଗେଇ ଲୋକେ ପ୍ରତିଦିନ ହଜାର ହଜାର ସଂଖ୍ୟାରେ ଯିବାଆସିବା କରୁଛନ୍ତି। 

ବେଳେ ବେଳେ ଇନ୍ଦ୍ରାବତୀ ଜଳ ଭଣ୍ଡାରରୁ ଗେଟ ଖୋଲା ହେଲେ ନଦୀ ଜଳ ଦୁଇକୂଳ ଖାଇବା ସହିତ ବେଳେ ବେଳେ ପୋଲ ଉପର ପାଖକୁ ମଧ୍ୟ ଛୁଉଁଛି। ତେଣୁ ପୋଲ ନିର୍ମାଣ ହୋଇ ଦୀର୍ଘ ବର୍ଷ ବିତି ଯାଇଥିବା ସହିତ କେତେକ ସ୍ଥାନରେ ଖାଲଖମା ହେବା ଦ୍ବାରା ପାଣି ଜମି ପୋଲ ଉପର ଭାଗ ଆହୁରି ନଷ୍ଟ ହେବାରେ ବସିଲାଣି। ଏଥିସହିତ କେତେ ବେଳେ ଏହି ପୋଲ ଭାଙ୍ଗିଯିବ ତାହା କହି ହେବ ନାହିଁ। ଏଭଳି ଦୀର୍ଘ ବର୍ଷର ପୋଲ ନବରଙ୍ଗପୁର , କଳାହାଣ୍ଡି ସହିତ ଗୁଜୁରାଟ ରାଜ୍ୟରେ ମଝିରୁ ଦୁଇ ଖଣ୍ଡ ହେବାର ବିଗତ ଦିନରେ ଦେଖିବାକୁ ମିଳିଛି।

ତେବେ ଯଦି ଏହି ଇନ୍ଦ୍ରାବତୀ ନଦୀ ଉପରେ ଥିବା ଏହି ପୋଲର ମଧ୍ୟ କିଛି ଅସୁବିଧା ରହିଛି। ତେବେ ନବରଙ୍ଗପୁର ଜିଲ୍ଲା ସହିତ ବହୁ ଜିଲ୍ଲା ଏବଂ ରାଜ୍ୟର ଯୋଗାଯୋଗ ବିଚ୍ଛିନ୍ନ ହୋଇଯିବାର ଆଶଙ୍କା ରହିଛି। କାରଣ ବର୍ତ୍ତମାନ ନିଜ ଜୀବନକୁ ବାଜି ଲଗେଇ ଯିବା ଆସିବା କରୁଛନ୍ତି ଲୋକେ। ତେଣୁ ଏଭଳି ସ୍ଥଳେ ମଧ୍ୟ ଜିଲ୍ଲା ପ୍ରଶାସନଙ୍କ ଏହି ପୋଲ ନିର୍ମାଣ କରିବା ନେଇ ଦୃଷ୍ଟି ପଡୁ ନଥିବାରୁ ଦୃଢ ନିନ୍ଦା କରିବା ସହିତ  ତୁରନ୍ତ ଏହି ବ୍ରିଜ ମରାମତି ସହିତ ଇନ୍ଦ୍ରାବତୀ ପୋଲ ଉପରେ ଆଉ ଗୋଟିଏ ନୂତନ ବ୍ରିଜ ନିର୍ମାଣ କରାଯିବାକୁ ସାଧାରଣରେ ଦାବି କରିଛନ୍ତି  ।