ଡାବୁଗାଁରେ ଚୋରଙ୍କ ଉତ୍ପାତ : ସପ୍ତାହକ ମଧ୍ୟରେ ୩ଟି ଚୋରି
ଡାବୁଗାଁ : ନବରଙ୍ଗପୁର ଜିଲ୍ଲା ଡାବୁଗାଁ ଥାନା ଅଧୀନ ଚଚରାଗୁଡ଼ା ପଞ୍ଚାୟତରେ ଗତ ଏକ ସପ୍ତାହ ହେଲା ଚୋରଙ୍କ ଉତ୍ପାତ ବଢିଚାଲିଛି । ଦୁର୍ବୃତ୍ତ ମାନେ ଏହି ସପ୍ତାହ ମଧ୍ୟରେ ଦୁଇଟି ଗାଁ ର ତିନି ଜଣଙ୍କ ପାଖରୁ ଦାମୀ ବାଇକ୍ ଓ ମୋବାଇଲ ଚୋରି ନେଇଥିବା ବେଳେ ଜଣେ ବୁଲା ପରିବା ବେପାରୀ କୁ ଅଟକାଇ ତାର ସବୁତକ ଟଙ୍କା ଲୁଟି ନେଇଛନ୍ତି । ଚୋରି ହେବା ପରେ ଡାବୁଗାଁ ଥାନାରେ ତିନୋଟି ଭିନ୍ନ ଭିନ୍ନ ଅଭିଯୋଗ ହୋଇଥିବା ଜଣା ପଡ଼ିଛି । ତେବେ ଦୁର୍ବୃତ୍ତ ମାନଙ୍କ କୌଣସି ସୁରାଗ୍ ମିଳି ପାରି ନାହିଁ ।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ ଗତ ମଙ୍ଗଳବାର ୨୦ ତାରିଖ ଦିନ ଡାବୁଗାଁ ଥାନା ଚଚରାଗୁଡ଼ା ପଞ୍ଚାୟତ ଅଧୀନ ଡଙ୍ଗରିଗୁଡ଼ା ଗ୍ରାମର ଫକୀର ମୋହନ ମାଝୀ ତାଙ୍କ ନୂଆ ହିରୋ ଗ୍ଲେମର ବାଇକ୍ (ଓଡି ୨୪ ସି ୪୦୯୫ ) ଘର ମଧ୍ୟରେ ରଖିଥିଲେ । ବିଳମ୍ବିତ ରାତିରେ ଦୁର୍ବୃତ୍ତ ମାନେ ଆସି ତାଙ୍କ ଘରର ସମ୍ମୁଖ କବାଟ ବନ୍ଦ କରି ବାଇକଟିକୁ ନେଇ ଯାଇଥିଲେ । ସେହିପରି, ଗତ ୨୫ ତାରିଖ ଶନିବାର ଦିନ ସନ୍ଧ୍ୟା ପ୍ରାୟ ୬ ଘଣ୍ଟା ସମୟରେ କଲାର୍ ଗୁଡ଼ା ଗ୍ରାମର ବରୁଣ କଲାରଙ୍କ ଦୋକାନ ମଧ୍ୟରେ ଥିବା ଏକ ଦାମୀ ମୋବାଇଲକୁ କୌଶଳ କରି ଦୁର୍ବୃତ୍ତ ମାନେ ନେଇ ଚମ୍ପଟ ମାରିଥିଲେ । ଚୋରି ମୋବାଇଲର ଆନୁମାନିକ ମୂଲ୍ୟ ୧୫ ହଜାର ଟଙ୍କା ବୋଲି ଜଣା ପଡିଛି । ସେହି ଶନିବାର ଦିନ ଚଚରାଗୁଡ଼ା ପଞ୍ଚାୟତ ର ବରଗୁଡ଼ା ଗ୍ରାମର ପରିବା ବେପାରୀ ରୁକ୍ ଧର ଭତରା ବିଭିନ୍ନ ଗ୍ରାମ ବୁଲି ପରିବା ବିକ୍ରି କରି ନିଜ ଗ୍ରାମ କୁ ଫେରୁଥିବା ସମୟରେ ଅପରାହ୍ନ ପ୍ରାୟ ୪ ଟା ବେଳେ କୁସୁମ ବନ୍ଧ ଓ ଜନ୍ଦରିଗୁଡ଼ା ଗ୍ରାମ ମଝିରେ ଥିବା ଏକ ନିଛାଟିଆ ସ୍ଥାନରେ ଦୁଇ ଜଣ ଦୁର୍ବୃତ୍ତ ଏକ ବାଇକ୍ ରେ ଆସି ରୁକ୍ ଧର କୁ ଅଟକାଇ ତାକୁ ଛୁରୀ ଦେଖାଇ ଟାଠାରୁ ସବୁତକ ଟଙ୍କା ନେଇ ଯାଇଥିଲେ । ସୋମବାର ୨୬ ତାରିଖ ଦିନ ସକାଳ ପ୍ରାୟ ୮ ଘଣ୍ଟା ସମୟରେ ଡଙ୍ଗରିଗୁଡ଼ା ଗ୍ରାମର ଶିକ୍ଷକ କର୍ଣ୍ଣ ମାଝୀଙ୍କ ଘର ଭିତରେ ପ୍ରବେଶ କରି ଦୁର୍ବୃତ୍ତ ମାନେ କୌଶଳ କରି ଏକ ଦାମୀ ମୋବାଇଲ ଚୋରି କରି ନେଇଯାଇଥିଲେ । ଯାହାର ମୂଲ୍ୟ ୨୦ ହଜାର ବୋଲି ଜଣାପଡିଛି । ତେବେ ଗୋଟିଏ ସପ୍ତାହ ମଧ୍ୟରେ ଡାବୁଗାଁ ଥାନା ଚଚରାଗୁଡ଼ା ପଞ୍ଚାୟତ ର ବିଭିନ୍ନ ଗ୍ରାମରେ ଏପରି ଚୋରି ଓ ଡକାୟତ ହୋଇଥିବାରୁ ଲୋକେ ଆତଙ୍କିତ ହୋଇ ପଡିଛନ୍ତି । ବାଇକ୍ ଓ ମୋବାଇଲ ଚୋରି ପରେ ସମସ୍ତ ୩ ଜଣ ଡାବୁଗାଁ ଥାନାରେ ଏତଲା ଦେଇଥିବା ବେଳେ ଦୁର୍ବୃତ୍ତ ମାନଙ୍କ କୌଣସି ସୁରାଗ୍ ମିଳିପାରି ନାହିଁ ।