ସରକାରୀ ଉଚ୍ଚ ବିଦ୍ୟାଳୟରୁ ଅନ୍ତେବାସୀ ନିଖୋଜ, ଥାନାରେ ଏତଲା

ପାପଡାହାଣ୍ଡି: ନବରଙ୍ଗପୁର ଜିଲ୍ଲା ପାପଡାହାଣ୍ଡି ବ୍ଲକ ମାନିଗାଁ ସରକାରୀ ଉଚ୍ଚ ବିଦ୍ୟାଳୟରୁ ଜଣେ ଅନ୍ତେବାସୀ ଛାତ୍ର ନିଖୋଜ ହୋଇଯାଇଛନ୍ତି | ଏ ନେଇ ସୋମବାର ଡାବୁଗାଁ ଥାନାରେ ଏତଲା ହୋଇଛି। ଛାତ୍ରର ଘର ଥାନା ଅନ୍ତର୍ଗତ ମେଦନା ବୋଲି ଜଣାପଡିଛି। ବିଦ୍ୟାଳୟ ତରଫରୁ ପରିବାର ବର୍ଗଙ୍କୁ ଖବର ଦେବା ପରେ ମଙ୍ଗଳବାର ବିଦ୍ୟାଳୟରେ ପହଞ୍ଚିଛନ୍ତି।

ଦଶମ ଶ୍ରେଣୀର ଛାତ୍ର ଶଙ୍କର ହରିଜନ ସୋମବାର ବିଦ୍ୟାଳୟରୁ ନିଖୋଜ ହେବା ଅପରାହ୍ନ ପରେ ଜଣାପଡିଥିଲା। ବିଦ୍ୟାଳୟ ତରଫରୁ ତାଙ୍କୁ ଚାରିଆଡେ ଖୋଜାଖୋଜି କରାଯିବା ପରେ କେଉଁଆଡେ ସନ୍ଧାନ ନ ମିଳିବାରୁ ପରିବର ବର୍ଗଙ୍କୁ ଜଣାଇବା ପରେ ଡାବୁଗାଁ ଥାନାରେ ଏତଲା ଦିଆଯାଇଥିଲା।  ମଙ୍ଗଳବାର ପରିବାର ବର୍ଗ ପହଞ୍ଚି ଛାତ୍ର କୁଆଡେ ଗଲା ଚିନ୍ତାରେ ପଡ଼ି ଯାଇଛନ୍ତି।  ପୁଅକୁ ଫେରାଇ ଆଣିବାକୁ ବାପା ଖଗପତି ହରିଜନ ଦାବି ଜଣାଇବା ସହ ବିଦ୍ୟାଳୟ କର୍ତ୍ତୃପକ୍ଷଙ୍କ ଅବହେଳାକୁ ଦାୟୀ କରିଛନ୍ତି। ଏ ନେଇ ସେମାନେ ଡାବୁଗାଁ ଥାନାରେ ଏତଲା ଦେବେ ବୋଲି କହିଛନ୍ତି।

ତେବେ ଛାତ୍ରଜଣକ ଗତକାଲି ସକାଳ ୭ଟା ରୁ ନିଖୋଜ ଥିବା ବିଦ୍ୟାଳୟରୁ ସୂଚନା ମିଳିଛି। ଅପରାହ୍ନ ୩ଟା ପରେ ବିଦ୍ୟାଳୟ କର୍ତ୍ତୃପକ୍ଷ ପରିବାର ଲୋକଙ୍କୁ ଖବର ଦେଇଛନ୍ତି। ବିଦ୍ୟାଳୟ ତରଫରୁ କୌଣସି ପ୍ରତିକ୍ରିୟା ମିଳିନାହିଁ। ପ୍ରଧାନ ଶିକ୍ଷକଙ୍କ ସହ ଯୋଗାଯୋଗ ହୋଇ ପାରୁନାହିଁ।