ଝୁଲନ୍ତା ଅବସ୍ଥାରେ ଅଜଣା ଯୁବକଙ୍କ ମୃତଦେହ ଉଦ୍ଧାର

ନବରଙ୍ଗପୁର: ନବରଙ୍ଗପୁର ସହର ନିକଟ ବେହେରାଗୁଡ଼ା ମଣ୍ଡେଇ ପଡ଼ିଆ ସାମ୍ନା ଏକ ଗଛରେ ଅଜଣା ବ୍ୟକ୍ତିର ଝୁଲନ୍ତା ଅବସ୍ଥାରେ ମୃତଦେହ ଉଦ୍ଧାର ହୋଇଛି। ମୃତକଙ୍କ ଗୋଡ଼ରେ ଏକ ଗାମୁଛା ବନ୍ଧା ଅବସ୍ଥାରେ ଗଛରେ ଝୁଲିଥିବା ଦେଖା ଦେଇଛି। ପୁଲିସ ଏନେଇ ସୂଚନା ପାଇବା ପରେ ଘଟଣାସ୍ଥଳରେ ପହଞ୍ଚି ଶବର ପ୍ରାଥମିକ ତଦନ୍ତ ଆରମ୍ଭ କରିଛି। ମାଜିଷ୍ଟ୍ରେଟ ଆସିଲେ ଶବ ଜବତ କରିବା ସହ ଘଟଣାର ତଦନ୍ତ ଆରମ୍ଭ ହେବ ବୋଲି ପୁଲିସ ସୂଚନା ଦେଇଛି।

ପାରିପାର୍ଶ୍ବିକ ପରିସ୍ଥିତି ଓ ଗୋଡ଼ବନ୍ଧା ହୋଇଥିବା ଅବସ୍ଥାକୁ ନେଇ କେହି ହତ୍ୟା କରି ଟାଙ୍ଗି ଦେଇଥିବା ପୁଲିସ ସନ୍ଦେହ କରୁଛି। ଶବ ବ୍ୟବଚ୍ଛେଦ ପରେ ପ୍ରକୃତ ସତ୍ୟ ସାମ୍ନାକୁ ଆସିବ ବୋଲି ପୁଲିସ ସୂଚନା ଦେଇଛି। ତେବେ ବର୍ତ୍ତମାନ ଯାଏଁ ମୃତକଙ୍କ ପରିଚୟ ମିଳିପାରିନାହିଁ।