ମା’ ମଝିଘରିଆଣୀଙ୍କ ନିକଟରେ ଲାଗି ହେଲା ନବାନ୍ନ
ରାୟଗଡ଼ା : ରାୟଗଡ଼ାର ଅଧିଷ୍ଠାତ୍ରୀ ଦେବୀ ମା’ ମଝିଘରିଆଣୀଙ୍କ ନିକଟରେ ଆଜି ଲାଗି ହୋଇଛି ନବାନ୍ନ। ପରମ୍ପରା ଓ ରୀତିନୀତି ଅନୁଯାୟୀ ଦଶମୀ ତିଥିରେ ମା’ଙ୍କୁ ନବାନ୍ନ ଅର୍ପଣ କରାଯାଇଛି। ଭୋର ୫ଟାରେ ମନ୍ଦିର ଖୋଲିବା ପରେ ମଙ୍ଗଳ ଆରତୀ କରାଯାଇ ଭକ୍ତଙ୍କ ଦର୍ଶନ ପାଇଁ ମନ୍ଦିର ଖୋଲା ଯାଇଥିଲା। ସକାଳ ୮ଟା ୪୦ ମିନିଟରେ ମା’ଙ୍କୁ ନବାନ୍ନ ଭୋଗ ଅର୍ପଣ କରାଯାଇଥିଲା। ନୂଆ ଧାନ, ତେନ୍ତୁଳି, କଖାରୁ, କଖାରୁ ଫୁଲ, ସାରୁ, ଚୁଡା ଭୋଗ ସହ ନୂଆ ଫଳରେ ପ୍ରସ୍ତୁତ ଭୋଗକୁ ମା’ଙ୍କ ନିକଟରେ ଲାଗି କରାଯାଇଥିଲା। ପ୍ରଥମେ ପୀଠରେ ନବାନ୍ନ ଲାଗିବା ପରେ ପାର୍ଶ୍ବ ଦେବତା ଓ ଚାରି ଦିଗରେ ପୂଜାର୍ଚନା କରାଯାଇଥିଲା ନବାନ୍ନ ଅର୍ପଣ ହୋଇଥିଲା।
Sambad is now on WhatsApp
Join and get latest news updates delivered to you via WhatsApp
ପୂଜକ ଚନ୍ଦ୍ରଶେଖର ପୂଜାରୀ, ଚକ୍ରପାଣି ପୂଜାରୀ, ତାରିଣୀ ପୂଜାରୀ, ପ୍ରତାପ ଚନ୍ଦ୍ର ପୂଜାରୀଙ୍କ ସମସ୍ତ ସେବାୟତ ପୂଜାର୍ଚ୍ଚନା ଓ ନବାନ୍ନ ଲାଗି ସମୟରେ ମନ୍ଦିରରେ ଉପସ୍ଥିତ ଥିଲେ। ନବାନ୍ନ ଲାଗି ପରେ ସମସ୍ତ ସେବାୟତ ପରିବାର ନବାନ୍ନକୁ ଘରକୁ ନେଇ ପୂଜାର୍ଚ୍ଚନା କରିବା ପରେ ନୂଆ ଖାଇଥିଲେ। ଏହି ଅବସରରେ ରାୟଗଡ଼ା, କୋରାପୁଟ, ମାଲକାନଗିରି, ନବରଙ୍ଗପୁର ସମେତ କଳାହାଣ୍ଡି ଜିଲ୍ଲାର ବହୁ ଭକ୍ତ ମା’ଙ୍କୁ ଦର୍ଶନ କରି ନବାନ୍ନ ଭୋଗ ଅର୍ପଣ କରିଥିଲେ। ପଶ୍ଚିମ ଓଡ଼ିଶାର ସମଲେଶ୍ବରୀ, ପାଟଣେଶ୍ବରୀ, ମାଣିକେଶ୍ବରୀ ପୀଠରେ ପଞ୍ଚମୀ ତିଥିରେ ନବାନ୍ନ ଲାଗି ହେଉଥିବା ବେଳେ ମା’ ମଝିଘରିଆଣୀ ପୀଠରେ ସବୁ ବର୍ଷ ଦଶମୀ ତିଥିରେ ମା’ଙ୍କୁ ନବାନ୍ନ ଲାଗି କରାଯାଉଛି ।