ରଣପୁର:ରଣପୁର ବ୍ଲକ୍‌ ଅନ୍ତର୍ଗତ ଦର୍ପନାରାୟଣପୁର ଫାଣ୍ଡି ଅଧୀନ ବାପୁଜୀପଲ୍ଲୀସ୍ଥିତ ଷ୍ଟ୍ରକ୍‌ଚର ନିକଟରେ ସଡ଼କ ଦୁର୍ଘଟଣାରେ ଜଣକର ମୃତ୍ୟୁ ଘଟିଥିବା ବେଳେ ଚାଳକ ଗୁରୁତର ହୋଇଥିବା ଜଣାଯାଇଛି। ଖବରରୁ ଜଣାପଡ଼ିଛି, ରଣପୁର ବ୍ଲକ୍‌ ଅଧୀନ ଗୌରାଙ୍ଗପୁର ଗାଁର ପ୍ରଦୀପ କୁମାର ବେହେରା (୧୯) ଓ ଦର୍ପନାରାୟଣପୁର ପଞ୍ଚାୟତ ଅଧୀନ କାକଲମା ଗାଁର ସୁରେଶ ପ୍ରଧାନ (୨୯) ଉଭୟ ଏକ ୟାମାହା ବାଇକ୍ (ଓଡି-୨୫ଜି-୬୦୭୭) ଯୋଗେ ଗତକାଲି ରାତି ସାଢେ ୧୧ଟାରେ ଦର୍ପନାରାୟଣପୁରରୁ ନିଜ ଗାଁ ଅଭିମୁଖେ ଫେରୁଥିବା ବେଳେ ବାଟରେ ବାପୁଜୀପଲ୍ଲୀସ୍ଥିତ ଷ୍ଟ୍ରକ୍‌ଚର ନିକଟରେ ବାଇକ୍‌ଟି ଏକ ଖୁଂଟରେ ପିଟି ହୋଇ ଦୁର୍ଘଟଣାଗ୍ରସ୍ତ ହୋଇଥିଲା। ଫଳରେ ବାଇକ୍ ଚାଳକ ପ୍ରଦୀପ ଗୁରୁତର ଆହତ ହୋଇଥି ବେଳେ ପଛରେ ବସିଥିବା ସୁରେଶଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା। ତେବେ ପ୍ରଦୀପଙ୍କୁ ପ୍ରାଥମିକ ଚିକିତ୍ସା ପାଇଁ ପ୍ରଥମେ ରଣପୁର ହସ୍ପିଟାଲ୍‌ ଓ ପରେ ଭୁବନେଶ୍ୱର ସ୍ଥାନାନ୍ତର କରାଯାଇଛି। ଏବେ ସେ ମୃତ୍ୟୁ ସହ ସଂଗ୍ରାମ କରୁଥିବା ଜଣାଯାଇଛି।