ବେଗୁନିଆ ଫାର୍ମରେ କୁକୁଡ଼ା ମଡ଼କ, ବାର୍ଡ ଫ୍ଲୁ ଆତଙ୍କ
ବେଗୁନିଆରେ ବାର୍ଡ ଫ୍ଲୁ ନାହିଁ, ମୃତ୍ୟୁର କାରଣ ଭିନ୍ନ: ପ୍ରାଣୀଧନ ଅଧିକାରୀ
ଖୋର୍ଦ୍ଧା/ବେଗୁନିଆ : ତିନି ଦିନ ପୂର୍ବେ କେରଳ ସମେତ ଦେଶର କେତେକ ସ୍ଥାନରେ ବାର୍ଡଫ୍ଲୁ ସଂକ୍ରମଣ ଚିହ୍ନଟ ହୋଇଥିଲା । ତେବେ ଏଭଳି ଆଶଙ୍କାକୁ ଖଣ୍ଡନ କରି ଖୋର୍ଦ୍ଧା ପ୍ରାଣୀଧନ ବିଭାଗ ଜିଲ୍ଲାରେ କୌଣସି ବାର୍ଡଫ୍ଲୁ ସଂକ୍ରମଣ ନାହିଁ ବୋଲି କହିଥିଲେ । ଏଭଳି ସ୍ପଷ୍ଟୀକରଣର ୪୮ ଘଂଟା ମଧ୍ୟରେ ବେଗୁନିଆର ଏକ କୁକୁଡ଼ା ଫାର୍ମରେ ଶହଶହ ସଂଖ୍ୟାରେ କୁକୁଡ଼ା ମରିଥିବା ଖବରକୁ ନେଇ ହଇଚଇ ସୃଷ୍ଟି ହୋଇଥିଲା । ତେବେ ଉକ୍ତ କୁକୁଡ଼ା ଫାର୍ମରେ କୁକୁଡ଼ାଙ୍କ ମୃତ୍ୟୁ ବାର୍ଡଫ୍ଲୁ କିମ୍ବା ଅନ୍ୟ ସଂକ୍ରମଣ ନଥିବା ଓ ମୃତ୍ୟୁର କାରଣ ଭିନ୍ନ ରହିଥିବା ପ୍ରାଥମିକ ଅନୁସନ୍ଧାନରୁ ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ଆଜି ଗୋବିନ୍ଦପୁରର ଏକ ଫାର୍ମରେ ଶହଶହ ସଂଖ୍ୟାରେ କୁକୁଡ଼ା ମରିଥିବା ଖବର ପାଇ ସ୍ଥାନୀୟ ଅଂଚଳରେ ଏକ ପ୍ରକାର ଆତଙ୍କ ଖେଳିଯାଇଥିଲା । ଫାର୍ମର ମାଲିକ ବିରଂଚି ମହାନ୍ତିଙ୍କ କହିବାନୁସାରେ, ସେ ୩୦ ଦିନ ଧରି କୁକୁଡ଼ା ଫାର୍ମ ଆରମ୍ଭ କରିଥିଲେ । ୨୭ ଦିନରୁ କୁକୁଡ଼ା ମରିବା ଆରମ୍ଭ ହୋଇଥିଲା । ତିନି ଦିନ ମଧ୍ୟରେ ସେ ପ୍ରାୟ ୧୧୦୦-୧୨୦୦ ମୃତ କୁକୁଡ଼ାଙ୍କୁ ପୋତିଛନ୍ତି । ଏ ନେଇ ଖବର ପାଇ ଖୋର୍ଦ୍ଧା ପ୍ରାଣୀଧନ ଅଧିକାରୀ ବିଷ୍ଣୁଚରଣ ସାହୁ, ଦୁଇ ଜଣ ଡାକ୍ତର ଓ ସ୍ଥାନୀୟ ପଶୁ ଚିକିତ୍ସକଙ୍କ ସହ ଘଟଣାସ୍ଥଳରେ ପହଂଚିଥିଲେ । ଫାର୍ମରେ ଅନ୍ୟ କୁକୁଡ଼ା ନଥିବା ବେଳେ କେତେକ କୁକୁଡ଼ା ମରିପଡ଼ିଥିବା ଦେଖିବାକୁ ପାଇଥିଲେ । ଏନେଇ ଫାର୍ମର ମାଲିକ ବିରଂଚିଙ୍କୁ ପଚାରାଉଚରା କରିଥିଲେ ଓ ଫାର୍ମର ରେଜିଷ୍ଟାର ଦେଖିଥିଲେ । ମୋଟ କୁକୁଡ଼ାଙ୍କ ମଧ୍ୟରୁ ପ୍ରାୟ ୩ଶହଟି କୁକୁଡ଼ା ମରିଥିବା ବେଳେ ବଳକା କୁକୁଡା ଓ କୁକୁଡ଼ା ଖାଦ୍ୟକୁ ପୋଲ୍ଟେକ୍ କମ୍ପାନୀ ଫେରାଇନେଇଯାଇଥିବା ଜାଣିବାକୁ ପାଇଥିଲେ । ପରେ କଟକର ଫୁଲନଖରାର ଆନିମଲ ଡିଜିଜ୍ ରିସର୍ଚ୍ଚ ସେଣ୍ଟରର ଡେପୁଟି ଡାଇରେକ୍ଟର ବିଭୁ ରଂଜନ ଦାସ ଓ ଅନ୍ୟ ବିଶେଷଜ୍ଞ ସେଠାରେ ପହଂଚିଥିଲେ । କୁକୁଡ଼ା ଫେରାଇ ନେଇଥିବା ପୋଲ୍ଟେକ୍ ଫାର୍ମ ସହ ଯୋଗାଯୋଗ କରି ସେଠାକୁ ଏକ ଟିମ୍ ଅନୁସନ୍ଧାନ କରିବାକୁ ପଠାଇଥିଲେ ।
ଘଟଣା ସମ୍ପର୍କରେ ଜିଲ୍ଲା ପ୍ରାଣୀଧନ ଅଧିକାରୀ ଶ୍ରୀ ସାହୁ କହିଛନ୍ତି ଯେ ବେଗୁନିଆ ବ୍ଲକ ଗୋବିନ୍ଦପୁର ଗାଁର ବିରଂଚି ମହାନ୍ତି ଜଣେ ଗାଡ଼ି ଚାଳକ । ଅତିରିକ୍ତ ଆୟ ନିମନ୍ତେ ସେ ଏକ କୁକୁଡ଼ା ଫାର୍ମ କରିବାକୁ ମନସ୍ଥ କରି ଗୁଡ଼ୁମର ପୋଲ୍ଟେକ୍ କୁକୁଡ଼ା ଫାର୍ମ ସହ ଯୋଗାଯୋଗ କରିଥିଲେ । ଚୁକ୍ତି ଅନୁସାରେ, ପୋଲ୍ଟେକ୍ ଫାର୍ମ କୁକୁଡ଼ା ଛୁଆ, ଆବଶ୍ୟକ ଔଷଧ ଓ ଖାଦ୍ୟ ଯୋଗାଇବ । ବିରଂଚି କୁକୁଡ଼ାଗୁଡ଼ିକର କେବଳ ଲାଳନପାଳନ କରିବେ। କୁକୁଡ଼ା ଯଦି ବଡ଼ ହୁଅନ୍ତି ତେବେ ପ୍ରତି କିଲୋଗ୍ରାମ ପିଛା ୪ ଟଙ୍କା ହିସାବରେ ପୋଲଟେକ୍ ଫାର୍ମ ବିରଂଚିଙ୍କୁ ପ୍ରଦାନ କରିବେ । ୫ ତାରିଖରେ ବିରଂଚି ଓ ତାଙ୍କ ସ୍ତ୍ରୀଙ୍କ ମଧ୍ୟରେ କୌଣସି କାରଣରୁ ବିବାଦ ଘଟିଥିଲା । ଫଳରେ ତାଙ୍କ ସ୍ତ୍ରୀ କୁକୁଡ଼ା ଫାର୍ମର କୁକୁଡ଼ା ଛୁଆ ଓ ଅନ୍ୟ କୁକୁଡ଼ାଙ୍କୁ ନିୟମିତ ପାଣି ଓ ଖାଦ୍ୟ ଦେଇ ନଥିଲେ । ୫ ତାରିଖ ରାତିରୁ ପାଣି ଓ ଖାଦ୍ୟ ନପାଇ କୁକୁଡ଼ା ମରିବା ଆରମ୍ଭ କରିଥିଲେ । ଏହି ଖବର ପୋଲ୍ଟେକ୍ କମ୍ପାନୀ ପାଇ ବିରଂଚିଙ୍କ କୁକୁଡ଼ା ଫାର୍ମରୁ ସମସ୍ତ କୁକୁଡ଼ା ଖାଦ୍ୟ ଓ ଜୀବିତ ଥିବା କୁକୁଡ଼ା ନେଇ ଚାଲିଯାଇଥିଲେ । ପୋଲ୍ଟେକ୍ ଫାର୍ମରୁ ସେ ମୋଟ ୩୨୦୭ଟି କୁକୁଡ଼ା ଆଣିଥିଲେ । କୁକୁଡ଼ା ମରିବା ଖବର ପାଇ ପୋଲ୍ଟେକ୍ ଫାର୍ମ ୨୮୫୦ଟି କୁକୁଡ଼ା, ଦେଇଥିବା ଖାଦ୍ୟ ଓ ଔଷଧ ଆଦି ଫେରାଇ ନେଇଯାଇଥିଲେ । ବର୍ତମାନ ସେହି କୁକୁଡ଼ା ଫାର୍ମରେ ସମସ୍ତ କୁକୁଡ଼ା ସୁସ୍ଥ ଅଛନ୍ତି । ନଖରାକୁ ପଠାଯାଇଥିବା ନମୁନାରେ ପ୍ରାଥମିକ ପରୀକ୍ଷାରେ କୌଣସି ସଂକ୍ରମଣର ଚିହ୍ନ ନାହିଁ । ବେଗୁନିଆରେ ପ୍ରାୟ ୫୦ଟି ଏଭଳି କୁକୁଡ଼ା ଫାର୍ମ ଅଛି । ଅନ୍ୟ କୌଣସି ସ୍ଥାନରେ କିମ୍ବା ଚିଲିକା ଓ ଜିଲ୍ଲାର ଅନ୍ୟ ସ୍ଥାନରୁ ପୂର୍ବେ ସଂଗ୍ରହ କରାଯାଇ ପଠାଯାଇଥିବା କୌଣସି ନମୁନାରେ ବାର୍ଡଫ୍ଲୁର ଚିହ୍ନ ନାହିଁ । ଏଣୁ ବାର୍ଡଫ୍ଲୁକୁ ନେଇ କୌଣସି ଭୟ କରିବା କାରଣ ନାହିଁ ।