କୁଖ୍ୟାତ ସୂର୍ଯ୍ୟ ହାତଖଣ୍ଡି ବିରୋଧରେ ଜାତୀୟ ନିରାପତ୍ତା ଆଇନ୍ ଲାଗୁ
ଖୋର୍ଦ୍ଧା: ନୟାଗଡ଼ ଓ ଖୋର୍ଦ୍ଧା ଜିଲ୍ଲାରେ ଆତଙ୍କ ସୃଷ୍ଟି କରିଥିବା କୁଖ୍ୟାତ ଅପରାଧୀ ସୂର୍ଯ୍ୟ ହାତଖଣ୍ଡି ବିରୋଧରେ ଜାତୀୟ ନିରାପତ୍ତା ଆଇନ (ଏନ୍ଏସ୍ଏ) ଦର୍ଜ କରାଯାଇଛି । ଏନେଇ ଆଜି ଖୋର୍ଦ୍ଧା ଗ୍ରାମାଂଚଳ ଆରକ୍ଷୀ ଅଧୀକ୍ଷକ ରାଜ କିଶୋର ଦୋରା କହିଛନ୍ତି ଯେ ସୂର୍ଯ୍ୟ ହାତଖଣ୍ଡି ବିରୋଧରେ ଖୋର୍ଦ୍ଧା ଗ୍ରାମାଂଚଳ ଜିଲ୍ଲାର ବିଭିନ୍ନ ଥାନାରେ ୧୧ରୁ ଉର୍ଦ୍ଧ୍ବ ଅପରାଧିକ ମାମଲାରେ ସମ୍ପୃକ୍ତ ରହିଛି ।
Sambad is now on WhatsApp
Join and get latest news updates delivered to you via WhatsApp
ଚଳିତ ବର୍ଷ ଜୁଲାଇ ୧୧ ତାରିଖରେ ଜଙ୍କିଆ ଥାନା ଅଧୀନ ନରଣଗଡ଼ ନିକଟରୁ ଜଣେ ରିଏଲ୍ ଇଷ୍ଟେଟ୍ କମ୍ପାନୀର ପରିଚାଳକ ସତ୍ୟନାରାୟଣ ବେହେରାଙ୍କୁ ଅପହରଣ, ମୁଣ୍ଡଜାମିନ ରଖିବା, ମରଣାନ୍ତକ ଆକ୍ରମଣ କରିବା ଆଦି ଘଟଣାରେ ସେହିମାସ ୨୪ ତାରିଖରେ ଗିରଫ ହୋଇଥିଲା । ହାତଖଣ୍ଡି ସହ ଅନ୍ୟ ୫ ସହଯୋଗୀ ମଧ୍ୟ ଗିରଫ ହୋଇଥିଲେ । ବର୍ତମାନ ସେମାନେ ଜେଲ୍ରେ ଅଛନ୍ତି । ତେବେ ସୂର୍ଯ୍ୟ ହାତଖଣ୍ଡିର ଅପରାଧିକ ପୃଷ୍ଠଭୂମୀ ଓ ଜେଲ୍ରୁ ପାରୋଲ୍, କିମ୍ବା ଜାମିନରେ ବାହରିବା କ୍ଷଣି ପୁଣି ଅପରାଧ ଘଟାଇବାର ଅନେକ ସମ୍ଭାବନା ରହିଛି । ଅତୀତରେ ମଧ୍ୟ ଏଭଳି ଏକାଧିକ ଥର ବିଭିନ୍ନ ମାମଲାରେ ଜେଲ୍କୁ ଯାଇ ଫେରିବା ପରେ ଏଭଳି ଅପରାଧ ଘଟାଇଛି । ଏଣୁ ଏହାକୁ ଦୃଷ୍ଟିରେ ରଖି ସେ ହାତଖଣ୍ଡି ବିରୋଧରେ ଏନ୍ଏସ୍ଏ ଦର୍ଜ କରିବାକୁ ଜିଲ୍ଲାପାଳଙ୍କୁ ଅନୁରୋଧ କରିଥିଲେ । ଗତକାଲି ଜିଲ୍ଲାପାଳ ଏହି ଅନୁରୋଧକୁ ଅନୁମୋଦନ କରିଛନ୍ତି ।
ସୂଚନାଯୋଗ୍ୟ, ସୂର୍ଯ୍ୟ ହାତଖଣ୍ଡି ୧୭-୧୮ ବର୍ଷ ବୟସରୁ ଅପରାଧିକ ଜଗତରେ ପାଦ ଥାପିଥିଲା । ପ୍ରଥମେ ପ୍ରଥମେ ବେଆଇନ ଖଣିରେ ଭଡ଼ାଟିଆ ଗୁଣ୍ଡା ଭାବେ କାମ କରୁଥିଲା । ସେ ଅଳ୍ପ ବୟସରୁ ହିଁ ବୋମା ଭିଡ଼ିବା କଳାରେ କୁଶଳତା ହାସଲ କରିଥିଲା । ୩-୪ବର୍ଷ ପୂର୍ବେ ବୋମା ଭିଡ଼ିବା ବେଳେ ତା’ର ବାମ ହାତର ପାପୁଲି ଉଡ଼ିଯାଇଥିଲା । ଏହାପର ଠାରୁ ତାକୁ ଅପରାଧିକ ଜଗତରେ ସୂର୍ଯ୍ୟ ହାତଖଣ୍ଡି ନାମରେ ପରିଚିତ ହୋଇଯାଇଥିଲା । ତେବେ ସୂର୍ଯ୍ୟ ହାତଖଣ୍ଡି ଜଙ୍କିଆ ଓ ସଦର ଥାନାରେ ସର୍ବାଧିକ ସକ୍ରିୟ ଥିଲା । ସେ ଏହି ଅଂଚଳରେ ଥିବା ବେଆଇନ ଖଣିଗୁଡ଼ିକରୁ ବଟି ଆଦାୟ କରିବା ସହ ବେଆଇନ ଚାଲାଣ ହେଉଥିବା ଟ୍ରକ୍ ଆଦିକୁ ସୁରକ୍ଷା ଦେବା ପାଇଁ ଦାୟିତ୍ୱ ନେଇଥିଲା । ସଦର ଥାନାରେ ୨୦୧୫ରେ ୨ଟି, ୨୦୧୬ରେ ୪ଟି, ୨୦୧୭ରେ ୩ଟି ଓ ୨୦୧୮ରେ ୩ଟି ୨୦୨୦ରେ ୩ଟି ଓ ଜଙ୍କିଆ ଥାନାରେ ୨ଟି ମାମଲା ରହିଛି । ଏଥିରେ ହତ୍ୟା ଉଦ୍ୟମ, ଦାଦା ବଟି, ବେଆଇନ ବନ୍ଧୁକ ରଖିବା, ବୋମା ମାଡ଼ କରିବା ଆଦି ମାମଲା ରହିଛି ।