ନୂଆପଡାରେ ଚମତ୍କାର : ଟ୍ରାକରେ ଶୋଇଥିଲେ ଯୁବକ, ଉପରେ ଚାଲିଗଲା ଟ୍ରେନ୍ ଆଉ ତା’ପରେ…

ନୂଆପଡ଼ା: ରଖେ ହରି ତ ମାରେ କିଏ । ଏହି କଥାର ସତ୍ୟତା ଦେଖିବାକୁ ମିଳିଛି ନୂଆପଡ଼ା ଜିଲ୍ଲାରେ । ଟ୍ରେନ ତଳୁ ବଂଚିଗଲା ଜୀବନ । ଜୀବନ୍ତ ଅବସ୍ଥାରେ ଯୁବକଙ୍କୁ ଉଦ୍ଧାର କଲେ ଆରପିଏଫ ଯବାନ । ଆପଣମାନେ ଭାବନ୍ତୁ ତ  ଯେତେବେଳେ ପ୍ଲାଟଫର୍ମରେ ଠିଆ ହୋଇଥାନ୍ତି ଟ୍ରେନ ଆସିଲେ ଆପଣ ଦୂରକୁ ଚାଲିଆସନ୍ତି । କାହିଁକି ନା ଟ୍ରେନର ବେଗ ସହିତ ପବନର ବେଗ ଏତେ ଦ୍ରୁତ ଥାଏ। ମନେହୁଏ ସତେ ଯେମିତି ଆମକୁ ଉଡାଇନେବ । ହେଲେ ଜଣେ ଯୁବକ ଟ୍ରେନ ତଳେ ଶୋଇ ରହିବ ଓ ତା’ ଉପରେ ଟ୍ରେନ ଚାଲିଯିବ ପୁଣି ସେ ଅକ୍ଷତ ରହିବ ଏକଥା କେବଳ ସିନେମାରେ ଦେଖିବାକୁ ମିଳିଥାଏ । କିନ୍ତୁ ଏଭଳି ଏକ ଘଟଣା ନୂଆପଡ଼ା ଜିଲ୍ଲାରୁ ସାମ୍ନାକୁ ଆସିଛି।

ଜଣେ ଯୁବକ ଆତ୍ମହତ୍ୟା କରିବାକୁ ଯାଇ ଟ୍ରେନ୍ ଲାଇନରେ ଶୋଇଥିବା ବେଳେ ତାଙ୍କ ଉପରେ ୧୬ଟି ବଗି ଅତିକ୍ରମ କରି ଚାଲିଗଲା ହେଲେ ଯୁବକ ଜଣକ ଅକ୍ଷତ ଅବସ୍ଥାରେ ଥିଲେ । ସୂଚନା ମୁତାବକ, ନୂଆପଡ଼ା ଜିଲ୍ଲା ଖରିଆର ରୋଡ଼ ଅନ୍ତର୍ଗତ ଗୌତମା ଗାଁର ଜଣେ ଯୁବକ  ପାଟିତୁଣ୍ଡ କରି ଘରୁ ବାହାରି ଆସିଥିଲେ । ଜୀବନ ହାରିବା ପାଇଁ ମାଲବାହୀ ଟ୍ରେନ ଆସୁଥିବା ଦେଖି ଟ୍ରାକରେ ଶୋଇ ଯାଇଥିଲେ । ତାଙ୍କୁ ଦେଖିପାରି ଲୋକୋ ପାଇଲଟ ହର୍ଣ୍ଣ ମାରିବା ସହ ଜରୁରୀକାଳୀନ ବ୍ରେକ ମଧ୍ୟ ଦେଇଥିଲେ । ସେତେବେଳକୁ ୪୨ରୁ ୧୬ଟି ବଗି ଯୁବକଙ୍କ ଉପରେ ଅତିକ୍ରମ କରିସାରିଥିଲା । ଯୁବକ ଜଣକ ଟ୍ରାକ ମଝିରେ ରହି ଯାଇଥିବାରୁ ତାଙ୍କୁ ସୁରକ୍ଷିତ ଅବସ୍ଥାରେ ଉଦ୍ଧାର କରାଯାଇଥିଲେ। ହେଲେ ଭୟରେ ସେ ବେହୋସ ହୋଇ ଯାଇଥିଲେ। ତାଙ୍କୁ ତୁରନ୍ତ ହସ୍ପିଟାଲକୁ ନିଆ ଯାଇଥିଲା ସେଠାରେ ଚିକିତ୍ସା ପରେ ଯୁବକଙ୍କ ହୋସ ଆସିଥିଲା । ତାଙ୍କ ପରିବାର ଲୋକ ହସ୍ପିଟାଲରେ ପହଂଚି ଯୁବକଙ୍କୁ ବୁଝାଶୁଝା କରି ଘରକୁ ନେଇଛନ୍ତି ।