ଖୋର୍ଦ୍ଧା: କରୋନା ମହାମାରୀ ସମୟରେ ସମ୍ମୁଖ କରୋନା ଯୋଦ୍ଧାରେ ନର୍ସ, ସ୍ୱାସ୍ଥ୍ୟକର୍ମୀ, ଆଶାକର୍ମୀ ଆଦି ରହିଛନ୍ତି । ସେମାନଙ୍କ ସୁରକ୍ଷାକୁ କେନ୍ଦ୍ର ଓ ରାଜ୍ୟ ସରକାର ପ୍ରାଥମିକତା ଦେଇଛନ୍ତି । କିନ୍ତୁ ଖୋର୍ଦ୍ଧା ଜିଲ୍ଲା ମୁଖ୍ୟ ଚିକିତ୍ସାଳୟରେ କାର୍ଯ୍ୟରତ ଜଣେ ନର୍ସ ଦୀର୍ଘ ଦିନ ଧରି ସରକାରୀ କ୍ୱାଟର ନପାଇ ଧାରଣାରେ ବସିବା ଜିଲ୍ଲାରେ ସମ୍ମୁଖ କରୋନା ଯୋଦ୍ଧାଙ୍କ ପ୍ରତି ପ୍ରଶାସନର ବ୍ୟବସ୍ଥାକୁ ପଦାରେ ପକାଇଦେଇଛି ।
Sambad is now on WhatsApp
Join and get latest news updates delivered to you via WhatsApp
ଆଜି ସକାଳ ପ୍ରାୟ ୧୦ଟା ବେଳେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଷ୍ଟାଫ୍ ନର୍ସ ଭାବେ କାମ କରୁଥିବା ଭାଗ୍ୟବତୀ ସିଂହ ଜିଲ୍ଲା ମୁଖ୍ୟ ଚିକିତ୍ସାଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଥିଲେ । ଧାରଣା ସମ୍ପର୍କରେ ସୂଚନା ଦେଇ ସେ କହିଛନ୍ତି ଯେ କରୋନା ମହାମାରୀ ସମୟରେ ଅନେକ ସମୟରେ ଘରକୁ ଫେରିବାରେ ସମସ୍ୟା ହେଉଛି । ଏଣୁ ସେ ଗତ ୧ ବର୍ଷ ମଧ୍ୟରେ ଦୁଇ ଦୁଇ ଥର ନର୍ସଙ୍କ ପାଇଁ ଉଦ୍ଦିଷ୍ଟ ଥିବା ସରକାରୀ ଘର ପାଇଁ ଆବେଦନ କରିଥିଲେ ମଧ୍ୟ କୌଣସି ପଦକ୍ଷେପ ନିଆଯାଇନାହିଁ । ସେ ଜଣେ ବରିଷ୍ଠ ନର୍ସ ଏଣୁ ଅଗ୍ରାଧିକାର ଭିତ୍ତିରେ ତାଙ୍କ ପାଇଁ ସରକାରୀ ଘରର ବ୍ୟବସ୍ଥା କରିବା କଥା, କିନ୍ତୁ ଏହା କରାଯାଇନାହିଁ । କିଛି ସମୟ ଧାରଣାରେ ବସିବା ପରେ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ତାଙ୍କୁ ବୁଝାଶୁଝା କରି ସମସ୍ୟାର ତୁରନ୍ତ ସମାଧାନ କରାଯିବ ବୋଲି ପ୍ରତିଶ୍ରୁତି ଦେଇଥିଲେ । ଏହାପରେ ନର୍ସଜଣକ ଧାରଣାରୁ ଉଠିଥିଲେ ।