ଚାନ୍ଦବାଲି : ଉତ୍ତରାଖଣ୍ଡର ଚମୋଲି ଜିଲ୍ଲାରେ ଗତ ରବିବାର ହୋଇଥିବା ଗ୍ଲାସିୟର ଭୁଷୁଡ଼ିବା ଘଟଣାରେ ପ୍ରାୟ ୧୭୦ ଶ୍ରମିକ ଓ ସ୍ଥାନୀୟ ଲୋକ ନିଖୋଜ ହୋଇଯାଇଛନ୍ତି । ନିଖୋଜଙ୍କ ମଧ୍ୟରେ ଚାନ୍ଦବାଲିର ଜଣେ ଶ୍ରମିକ ନିଖୋଜ ଥିବା ପରିବାର ଲୋକେ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ନିଖୋଜ ଯୁବକ ଜଣଙ୍କ ହେଉଛନ୍ତି ଚାନ୍ଦବାଲି ବ୍ଲକ ଯଶିପୁର ପଂଚାୟତ କୁଦକାନ୍ଥି ଗାଁର ରବିନ୍ଦ୍ର ଦାସଙ୍କ ପୁଅ ନାଗାର୍ଜୁନ ଦାସ ବୋଲି ଜଣାପଡ଼ିଛି । ଗତ ବର୍ଷ ନଭେମ୍ବର ମାସ ଜଣେ ପ୍ରବାସୀ ଶ୍ରମିକ ଭାବରେ ଉତ୍ତରାଖଣ୍ଡକୁ ଯାଇଥିବା ବେଳେ ସେଠାରେ ଋଷିଗଙ୍ଗା ନଦୀରେ ନିର୍ମିାଣାଧୀନ ବିଦ୍ୟୁତ ପ୍ରକଳ୍ପରେ କାର୍ଯ୍ୟକରୁଥିଲେ ।
ଦୁର୍ବିପାକର ଦିନକ ପୂର୍ବରୁ ଅର୍ଥାତ ଗତ ୬ ତାରିଖରେ ସେ ଫୋନ ଯୋଗେ ଘର ଲୋକଙ୍କ ସହିତ କଥାବାର୍ତ୍ତା କରିଥିଲେ । ମାତ୍ର ୭ ତାରିଖ ବରଫ ବନ୍ୟା ପରେ ତାଙ୍କ ସହ ପରିବାର ଲୋକଙ୍କ ଯୋଗାଯୋଗ ସମ୍ଭବ ହୋଇପାରୁନାହିଁ । ଏହାକୁ ନେଇ ପରିବାର ଲୋକେ ଆଶଙ୍କାରେ ରହିଛନ୍ତି ।
ଘରେ ୩ ମାସର ଶିଶୁପୁତ୍ର
ନାଗାର୍ଜୁନ ଗତ ୨୦୧୯ରେ ବିବାହ କରିଥିବା ବେଳେ ମାତ୍ର ୩ମାସର ଗୋଟିଏ ଶିଶୁ ପୁତ୍ର ଅଛନ୍ତି । ତେବେ ନିଜ ଶିଶୁପୁତ୍ରକୁ ସେ ଏପର୍ଯ୍ୟନ୍ତ ଦେଖିନାହାନ୍ତି । କାରଣ ସେ ଗତ ବର୍ଷ ରୋଜଗାର ସନ୍ଧାନରେ ଘର ଛାଡ଼ିବାବେଳକୁ ପତ୍ନୀ ଅନ୍ତଃସତ୍ତ୍ବା ଥିଲେ ।
ଗତ ୬ତାରିଖ ଫୋନ ଯୋଗେ ଶିଶୁପୁତ୍ର ଓ ପତ୍ନୀ ସହିତ ସେ ହସଖୁସିରେ କଥା ହୋଇଥିଲେ । ମାତ୍ର ଏପରି ତାଙ୍କ ନିଖୋଜ ଖବର ପାଇବା ପରେ ହସଖୁସିର ପରିବାର ହଠାତ ନିସ୍ତବ୍ଧ ହୋଇଯାଇଛି ।