ଦୁର୍ଘଟଣାରେ ଯୁବକ ମୃତ, ୧୯ ବର୍ଷରୁ କମ ଓଡ଼ିଶାଦଳର କ୍ରିକେଟ ଖେଳାଳି ଗୁରୁତର
ବାଲିଅନ୍ତା: ଭୁବନେଶ୍ବର–ପୁରୀ ଜାତୀୟ ରାଜପଥର ମଙ୍ଗଳପୁର ଛକ ପେଟ୍ରୋଲ ପମ୍ପ ନିକଟରେ ଗତକାଲି ଏକ ମର୍ମନ୍ତୁଦ ସଡ଼କ ଦୁର୍ଘଟଣାରେ ସ୍ଥାନୀୟ ଅଞ୍ଚଳର ଜଣେ ଯୁବ ବ୍ୟବସାୟୀଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ଜଣେ ଗୁରୁତର ଭାବେ ଆହତ ହୋଇଛନ୍ତି । ମୃତକ ହେଲେ ବାଳକାଟି ଫାଣ୍ଡି ଅଧୀନ ଅଶିଘର ସାହିର ସତ୍ୟବାଦୀ ସାହୁ ଓ ଆହତଙ୍କ ନାମ ଆଶୁତୋଷ ସାହୁ (୧୭) । ଆଶୁତୋଷ ୧୯ ବର୍ଷରୁ କମ ଓଡ଼ିଶା କ୍ରିକେଟ ଦଳର ଜଣେ ଖେଳାଳି ।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ ଜଣାଶୁଣା ପୋଷାକ ବ୍ୟବସାୟୀ ଆଲୋକ ସାହୁଙ୍କ ଏକମାତ୍ର ପୁଅ ଆଶୁତୋଷ ଗତକାଲି ତାଙ୍କର ମଝିଆଁ ଭଉଣୀ ବାହାଘର ନେଇ ଗୁଆଦିଆ ଲାଗି ପୁରୀରେ ଥିବା ତାଙ୍କ ବଡ଼ ଭଉଣୀଙ୍କ ଘରକୁ ଯାଇଥିଲେ । ଗୁଆଦେଇ ସାରି ଅପରାହ୍ନରେ ସତ୍ୟବାଦୀ ଓ ଆଶୁତୋଷ ବାଇକ ଯୋଗେ ବାଳକାଟି ଅଭିମୁଖେ ଫେରୁଥିଲେ । ହେଲେ ସେମାନଙ୍କୁ ପଛପଟୁ ଏକ ଦ୍ରୁତଗାମୀ କାର ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ସତ୍ୟବାଦୀଙ୍କ ମୃତ୍ୟୁ ହୋଇଯାଇଥିବା ବେଳେ ଆଶୁତୋଷଙ୍କ ଅବସ୍ଥା ସଂକଟାପନ୍ନ ହୋଇପଡ଼ିଥିଲା । ଉଭୟ ସତ୍ୟବାଦୀ ଓ ଆଶୁତୋଷଙ୍କୁ ଉଦ୍ଧାର କରି ସ୍ଥାନୀୟ ଲୋକ ସେଠାରେ ଥିବା ସରକାରୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତି କରାଇଥିଲେ । ହେଲେ ଡାକ୍ତର ସତ୍ୟବାଦୀଙ୍କୁ ମୃତ ଘୋଷଣା କରିଥିବା ବେଳେ ଆଶୁତୋଷଙ୍କୁ ଭୁବନେଶ୍ବର ସ୍ଥାନାନ୍ତର କରାଯାଇଥିଲା ।
ଏବେ ଆଶୁତୋଷ ଲୁଇସରୋଡ଼ସ୍ଥିତ ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅଛନ୍ତି । ତାଙ୍କ ସ୍ବାସ୍ଥ୍ୟ ଅବସ୍ଥାରେ ସାମାନ୍ୟ ଉନ୍ନତି ଘଟିଥିବା ଖବର ମିଳିଛି । ଏନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଥିବା ବେଳେ ଆଶୁତୋଷଙ୍କ ଆଶୁ ଆରୋଗ୍ୟ କାମନା କରି କ୍ରିକେଟ ପ୍ରେମୀ ସାଥୀମାନେ ମନ୍ଦିରରେ ଦୀପ ପ୍ରଜ୍ଜ୍ବଳନ କରୁଥିବା ଦେଖିବାକୁ ମିଳିଛି । ଦୁର୍ଘଟଣା ଘଟାଇଥିବା କାରକୁ ପିପିଲି ଥାନା ପୁଲିସ ଜବତ କରି ଚାଳକକୁ ଗିରଫ କରିଛି ।