ଆବାସ ଯୋଜନା କାହାପାଇଁ ? ୫ବର୍ଷ ଦୌଡିବା ପରେ ବି ବୃଦ୍ଧାଙ୍କୁୁ ମିଳିନି ପକ୍କାଘର
ଜୟପୁର : ସରକାର ବିଭିନ୍ନ ପ୍ରକାର ଯୋଜନା ମାଧ୍ୟମରେ ଗରୀବ ଓ ନିରାଶ୍ରୟ ଲୋକମାନଙ୍କୁ ସମାଜର ମୁଖ୍ୟସ୍ରୋତରେ ସାମିଲ୍ କରିବା ପାଇଁ ଭୂମିହୀନଙ୍କୁ ଭୂମି ଓ ପକ୍କାଘର ନଥିବା ଲୋକଙ୍କୁ ପକ୍କାଘର ଦେବାକୁ ବି ଯୋଜନା କରିଛନ୍ତି। ତେବେ ପ୍ରକୃତ ହିତାଧିକାରୀ ବାରମ୍ବାର ଦୌଡି ଦୌଡି ନୟାନ୍ତ ହେବା ପରେ ବି ତାଙ୍କୁ ପକ୍କା ଘର ଖଣ୍ଡିକ ମିଳୁନି । ଏଠାରେ ପ୍ରଶ୍ନ ଉଠୁଛି ଏହି ଆବାସ ଯୋଜନା କାହାପାଇଁ ?
Sambad is now on WhatsApp
Join and get latest news updates delivered to you via WhatsApp
ଏହିପରି ଏକ ଦୃଷ୍ଟାନ୍ତ ଦେଖିବାକୁ ମିଳିଛି କୋରାପୁଟ ଜିଲ୍ଲାର କୋଟପାଡ଼ବ୍ଲକର କୁସୁମି ପଂଚାୟତ ଅନ୍ତର୍ଗତ ଚରାମୁଳା ଗ୍ରାମ ୱାର୍ଡ ନଂ ୮ର ପ୍ରେମଶିଳାଙ୍କ କ୍ଷେତ୍ରରେ । ପ୍ରେମଶିଳା ନୀଳକମଲ ଜଣେ ଅନୁସୂଚିତ ସଂପ୍ରଦାୟର ବୃଦ୍ଧା। ବୟସ ୬୬ବର୍ଷ । ଆଖି ଭଲ ଭାବେ ଦିଶୁନି। ମୁଣ୍ଡ ଗୁଞ୍ଜିବାକୁ ଘର ଖଣ୍ଡିକ ନାହିଁ। ନୂଆଣିଆ ଚାଳଘରକୁ ପ୍ରତିବର୍ଷ ଛାଉଣି କରିପାରୁ ନଥିବାରୁ ଦିନରେ ସୂର୍ଯ୍ୟ ଓ ରାତିରେ ଚନ୍ଦ୍ର କିରଣ ଘର ଭିତରକୁ ପଡ଼ିଥାଏ । ବର୍ଷା ଦାଉରୁ ରକ୍ଷା ପାଇବା ପାଇଁ ପଲିଥିନ ଖଣ୍ଡମାନ ଛପର ସାରା ଭର୍ତ୍ତି । ପ୍ରଧାନମନ୍ତ୍ରୀ ଆବାସ ପାଇବା ପାଇଁ ବ୍ଲକ୍ ଓ ପଂଚାୟତ କାର୍ଯ୍ୟାଳୟକୁ ଗତ ୫ବର୍ଷ ହେବ ଦୌଡ଼ିଦୌଡ଼ି ନୟାନ୍ତ ହେଲେଣି ଅଥଚ ଏହା ତାଙ୍କ ଭାଗ୍ୟରେ ଆଜିଯାଏ ଜୁଟି ପାରି ନାହିଁ । ଉପଜିଲ୍ଲାପାଳଙ୍କୁ ଭେଟି ଅଭିଯୋଗ କରିବାକୁ ଆସିଥିଲେ ହେଁ ଭେଟି ନ ପାରି ନିରାଶ ହୋଇ ଫେରିଛନ୍ତି ପ୍ରେମଶିଳା। ସେ ସବୁ ଦୃଷ୍ଟି କୋଣରୁ ଆବାସ ପାଇବାକୁ ଯୋଗ୍ୟ ଥିବାବେଳେ ତାଙ୍କୁ କାହିଁକି ଘର ଖଣ୍ଡିକ ଯୋଗାଇ ଦିଆଯାଉନି ତାହାକୁ ନେଇ ସେ ନିଜେ ବି ସନ୍ଦିହାନ । ବିଭାଗୀୟ ଉଚ୍ଚକର୍ତ୍ତୃପକ୍ଷ ସରକାରୀ ଯୋଜନାକୁ ପ୍ରହସନରେ ପରିଣତ ନକରି ତୁରନ୍ତ ବୃଦ୍ଧା ପ୍ରେମଶିଳାକୁ ଆବାସ ପ୍ରଦାନ କରିବାକୁ ସାଧାରଣରେ ଦାବି ହୋଇଛି ।