ଖୋର୍ଦ୍ଧା: ଖୋର୍ଦ୍ଧା ଉପକଣ୍ଠ ନରଣଗଡ଼ ଠାରେ ପ୍ରଭୁ ଲିଙ୍ଗରାଜ ଓ ବଡ଼ଦେଉଳର ମରାମତି ପାଇଁ ନରଣଗଡ଼ରେ ଓଡ଼ିଶା ଖଣି ନିଗମ (ଓଏମ୍ସି)କୁ ଦିଆଯାଇଥିବା ଖଣିକୁ ନେଇ ସ୍ଥାନୀୟ ଭିଟାମାଟି ସଂଗ୍ରାମ ସମିତି ବିରୋଧ କରିଛନ୍ତି । ଓଏମ୍ସିର ପଥର ଖଣିକୁ ଯାଇଥିବା ରାସ୍ତାଗୁଡ଼ିକୁ ଖୋଳି ପ୍ରତିବାଦ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସୂଚନାନୁସାରେ, ଆଜି ନରଣଗଡ଼ ଭିଟାମାଟି ସଂଗ୍ରାମ ସମିତିର ସଦସ୍ୟମାନେ ଓଏମ୍ସି ଅଧୀନ କୁଣ୍ଡାକୁଣ୍ଡି ପଥର ଖଣିକୁ ସଂଯୋଗ କରିଥିବା ରାସ୍ତାଗୁଡ଼ିକୁ ଖୋଳି ଦେଇଥିଲେ । ଫଳରେ ଓଏମ୍ସିର ଖନନ କାର୍ଯ୍ୟ ବାଧାପ୍ରାପ୍ତ ହୋଇଥିଲା । ଏହା ପରେ ଉପଜିଲ୍ଲାପାଳ ଅଶୋକ କୁମାର ବେଉରିଆ ସ୍ଥାନୀୟ ପଂଚାୟତିରାଜ ପ୍ରତିନିଧିଙ୍କୁ ଡକାଇ ଆଲୋଚନା କରିଥିଲେ । ଏନେଇ ଉପଜିଲ୍ଲାପାଳ ଅଶୋକ କୁମାର ବେଉରିଆ କହିଛନ୍ତି ଯେ ବିରୋଧ କରି ଖୋଳି ଥିଲେ ତେବେ ଆଲୋଚନା ପରେ ସମାଧାନ ହୋଇଛି । ଜୁନ ୯ ତାରିଖ (ବୁଧବାର) ଠାରୁ କାମ ସ୍ୱାଭାବିକ ଭାବେ ଚାଲିବ ।
ଏନେଇ ସ୍ଥାନୀୟ ସରପଂଚଙ୍କ ସହ ଯୋଗାଯୋଗ କରିବାରେ ସେ କହିଛନ୍ତି ଯେ ଆଜିର ବୈଠକକୁ ଭିଟାମାଟି ସଂଗ୍ରାମ ସମିତିର କୌଣସି ସଦସ୍ୟ ଆସିନଥିଲେ । ତେବେ ବୈଠକରେ ପରବର୍ତୀ ଆଲୋଚନା ୧୧ ତାରିଖରେ କରିବାକୁ ନିଷ୍ପତ୍ତି ହୋଇଛି ।
ସୂଚନାଯୋଗ୍ୟ, ଶ୍ରୀଜଗନ୍ନାଥ ମହାପ୍ରଭୁ ବିଜେ ତରଫ ଶ୍ରୀମନ୍ଦିର ପରିଚାଳକ ଖେୱାଟ୍ ନମ୍ବର ଏଖରାଜତମାହାଲରେ ୧୫୨ଖଣ୍ଡ ଗାଁ ଥିଲା । ୧୯୬୨ରେ ଏହା ମଧ୍ୟରୁ ୧୨୦ଟି ଗ୍ରାମର ରେକର୍ଡ ସଂଶୋଧନ ହୋଇ ରାଜ୍ୟ ସରକାରଙ୍କ ମାର୍ଫତ ପରିବର୍ତିତ ହୋଇଥିଲା । ବର୍ତମାନ ୩୨ଟି ରାଜସ୍ୱ ଗ୍ରାମରେ ଜଗନ୍ନାଥଙ୍କ ମାର୍ଫତରେ ଥିବା ଜମିର ପଟ୍ଟାର ମାର୍ଫତଦାର ପରିବର୍ତନ ହୋଇନାହିଁ । ଫଳରେ ଶ୍ରୀଜଗନ୍ନାଥଙ୍କ ଭୋଗ ଜମି ଦଖଲ କରିଥିବା ଲୋକଙ୍କ ଜମିପଟ୍ଟା ଏଯାଏଁ ରାଜ୍ୟ ସରକାରଙ୍କ ଅଧୀନକୁ ଆସିନାହିଁ । ପଟ୍ଟାରେ ଶ୍ରୀଜଗନ୍ନାଥ ଜମିଦାର ଥିବାରୁ ସେମାନେ ଋଣ, ବିକାକିଣା ଆଦିରେ ଅନେକ ସମସ୍ୟା ସୃ୍ଷ୍ଟି ହେଉଛି ।
ପ୍ରାୟ ୧ ବର୍ଷ ପୂର୍ବେ ନରଣଗଡ଼ର କୁଣ୍ଡିକୁଣ୍ଡା ପାହାଡ଼ରୁ ନିର୍ମାଣ ପଥର ଖନନ ପାଇଁ ଓଏମ୍ସିକୁ ରାଜ୍ୟ ସରକାର ଅନୁମତି ଦେଇଥିଲେ । ଏହା ପରେ ସ୍ଥାନୀୟ ଲୋକ ପ୍ରତିବାଦ କରିବା ଆରମ୍ଭ କରିଥିଲେ । ଭିଟାମାଟି ସଂଗ୍ରାମ ସମିତି ନାମରେ ଏକ କମିଟି ଗଢ଼ିଥିଲେ । ସେମାନଙ୍କ ଦାବି ଥିଲା ଯେ ଏନେଇ ନରଣଗଡ଼ ଭିଟାମାଟି ସଂଗ୍ରାମ ସମିତି ପକ୍ଷରୁ ବିଭିନ୍ନ ସମୟରେ ଆନ୍ଦୋଳନ, ବିକ୍ଷୋଭ ଆଦି ପ୍ରଦର୍ଶନ କରାଯାଉଛି । କିନ୍ତୁ ସରକାର ସେମାନଙ୍କ ଦାବି ଶୁଣୁନାହାନ୍ତି । ବର୍ତମାନ ଓଏମ୍ସିର ଖନନକୁ ବିରୋଧ ନୁହେଁ ବରଂ ବିରୋଧ ଦ୍ୱାରା ସେମାନଙ୍କ ପଟ୍ଟାକୁ ରାଜ୍ୟ ସରକାରଙ୍କ ମାର୍ଫତକୁ ପରବର୍ତନରେ ବିଳମ୍ବ ହେଉଥିବାରୁ ଏହାକୁ ବିରୋଧ କରାଯାଇଛି ।