୧ଲକ୍ଷ ଟଙ୍କାରୁ ଊର୍ଦ୍ଧ୍ବ ବ୍ରାଉନସୁଗାର ଜବତ, ଜଣେ ଗିରଫ

ଖୋର୍ଦ୍ଧା: ଜଙ୍କିଆ ପୁଲିସ ପକ୍ଷରୁ ଚଢ଼ଉ କରାଯାଇ ଆଜି ୧ଲକ୍ଷ ଟଙ୍କାରୁ ଊର୍ଦ୍ଧ୍ବ ମୂଲ୍ୟର ବ୍ରାଉନସୁଗାର ଜବତ କରିବା ସହ ଏହି ମାମଲାରେ ଜଣକୁ ଗିରଫ କରି କୋର୍ଟ ଚାଲାଣ କରାଯାଇଛି। ଜଙ୍କିଆ ଥାନା ପକ୍ଷରୁ ମିଳିଥିବା ସୂଚନାନୁସାରେ, ଆଜି କୌଣସି ସୂତ୍ରରୁ ଖବର ପାଇଁ ମଧ୍ୟାହ୍ନ ପ୍ରାୟ ୧୨ଟା ବେଳେ ଏସ୍ଆଇ ବେଣୁଧର ରାୟଙ୍କ ନେତୃତ୍ୱରେ ଏକ ଟିମ୍ ଛଣଗିରି ଖେଳପଡ଼ିଆର ଏକ ବିଶ୍ରାମ ଘର ଉପରେ ଚଢ଼ଉ କରିଥିଲେ। ଏଥିରେ ଗୁରୁଜଙ୍ଗ ଭୋଇସାହିର ବାବୁଲୁ ନାୟକ (୨୨) ଧରାପଡ଼ିବା ସହ ତା’ ନିକଟରୁ ୧୧.୯୩ ଗ୍ରାମ ବ୍ରାଉନସୁଗାର ଜବତ କରାଯାଇଥିଲା।

ଜବତ ବ୍ରାଉନସୁଗାରର ମୂଲ୍ୟ ୧ଲକ୍ଷ ୨୫ ହଜାର ଟଙ୍କା ହେବ। ଅଭିଯୁକ୍ତ ବିରୋଧରେ ୪୪୭/୨୦୨୨ରେ ଏକ ମାମଲା ରୁଜୁ କରାଯାଇ ଆଜି କୋର୍ଟ ଚାଲାଣ କରାଯାଇଥିବା ଥାନା ଅଧିକାରୀ ଅନୀତା ସାହୁ ସୂଚନା ଦେଇଛନ୍ତି।