ସୁନ୍ଦରଗଡ଼: ବଜ୍ରପାତରେ ଜଣେ ବାଳକ ମୃତ, ୩ ଗୁରୁତର
ସୁନ୍ଦରଗଡ଼: ବଜ୍ରପାତରେ ଆଜି ଜଣେ ବାଳକ ପ୍ରାଣ ହରାଇଛି। ସୁନ୍ଦରଗଡ଼ ସଦର ବ୍ଲକ ଅନ୍ତର୍ଗତ ସାଲେପାଲି ଦେଉରାପଡ଼ା ଗାଁର ଅରବିନ୍ଦ ନାଏକ (୧୭)ଙ୍କ ମୃତ୍ୟୁ ହୋଇଛି।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ ଅରବିନ୍ଦ ଆଜି ଅପରାହ୍ନ ପ୍ରାୟ ୩ଟାରେ ନିଜର ଅନ୍ୟ ୩ ଜଣ ସାଙ୍ଗମାନଙ୍କ ସହିତ ଆମଲିପାଲି ଅଂଚଳକୁ ବୁଲିବାକୁ ଯାଇଥିଲା। ବାଏପାସ ନିକଟରେ ଚାରି ଜଣ ସାଙ୍ଗ ଛିଡ଼ା ହୋଇଥିବା ବେଳେ ପ୍ରବଳ ବର୍ଷା ହୋଇଥିଲା। ଫଳରେ ବର୍ଷାରୁ ରକ୍ଷା ପାଇବା ପାଇଁ ୪ ଜଣ ସାଙ୍ଗ ଏକ ଗଛ ମୂଳରେ ଛିଡ଼ା ହୋଇଥିଲେ। ଏହି ସମୟରେ ବଜ୍ରପାତ ହୋଇଥିଲା ଏବଂ ଅରବିନ୍ଦର ଘଟଣାସ୍ଥଳରେ ମୃତ୍ୟୁ ହୋଇଥିଲା। ଗୁରୁତର ୩ ଜଣ ବାଳକଙ୍କୁ ସ୍ଥାନୀୟ ଲୋକଙ୍କର ସହାୟତାରେ ବୁର୍ଲା ହସ୍ପିଟାଲ ନିଆଯାଇଛି।
ସୂଚନାଯୋଗ୍ୟ, ଅରବିନ୍ଦ ନିକଟରେ ପ୍ରକାଶିତ ଦଶମ ପରୀକ୍ଷାରେ ପାସ କରିଥିଲା। ସେ ଥିଲା ପିତା-ମାତଙ୍କର ଏକମାତ୍ର ସନ୍ତାନ। ଅରବିନ୍ଦର ମୃତ୍ୟୁରେ ପରିବାର ଲୋକ ଭାଙ୍ଗିପଡ଼ିଥିବା ବେଳେ ଗାଁରେ ଶୋକର ଛାୟା ଖେଳିଯାଇଛି।