ବାଇକ୍‌ ଉପରେ ଚଢ଼ିଗଲା ଦ୍ରୁତଗାମୀ ଟ୍ରକ୍‌; ଜଣେ ମୃତ, ଅନ୍ୟ ଜଣେ ଗୁରୁତର 

ଭଦ୍ରକ: ୧୬ ନମ୍ବର ଜାତୀୟ ରାଜପଥ ଗେଲପୁର ଛକ ନିକଟସ୍ଥ ଗୋପବନ୍ଧୁ ନଗର ଛକ ଠାରେ ଏକ ବାଇକ ଉପରେ ଟ୍ରକ ଚଢ଼ିଯାଇଛି। ଘଟଣାସ୍ଥଳରେ  ଜଣେ ଲୋକଙ୍କର ମୃତ୍ୟୁ ଘଟିଥିବା ବେଳେ ଅନ୍ୟ ଜଣଙ୍କୁ ଗୁରୁତର ଭାବେ ଡାକ୍ତରଖାନାରେ ଭର୍ତ୍ତି କରାଯାଇଛି। ମୃତକ ହେଲେ ପ୍ରକାଶ ସାହୁ। ପ୍ରଶାନ୍ତଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି।

ସୂଚନା ଅନୁଯାୟୀ ଆରଏନ ବେତଡା ପଞ୍ଚାୟତର ବିରିପଡା ଅଞ୍ଚଳର ଧନେଶ୍ୱର ସାହୁଙ୍କ ପୁଅ ପ୍ରକାଶ ସାହୁ ଓ ତାଙ୍କ ସାଙ୍ଗ ପ୍ରଶାନ୍ତ ଆଜି ଅପରାହ୍ନରେ ଏକ ବାଇକ୍‌‌ ଯୋଗେ ଘରୁ ବାହାରି ଭଦ୍ରକ ଅଭିମୁଖେ ଆସୁଥିବା ବେଳେ ଏକ ଦ୍ରୁତଗାମୀ ଟ୍ରକ୍‌ ଆସି ତାଙ୍କ ପଛପଟୁ ଚଢ଼ି ଯାଇଥିଲା।  ଫଳରେ ଘଟଣାସ୍ଥଳରେ ପ୍ରକାଶ ସାହୁଙ୍କର ମୃତ୍ୟୁ ହୋଇଥିବା ବେଳେ ତାଙ୍କ ସାଙ୍ଗ  ପ୍ରଶାନ୍ତ ଗୁରୁତର ହୋଇ ଭଦ୍ରକ ମୁଖ୍ୟ ଚିକିତ୍ସାଳୟ ଭର୍ତ୍ତି ହୋଇଛନ୍ତି। ଘଟଣା ସ୍ଥଳରେ ସ୍ଥାନୀୟ ଲୋକମାନେ  ଉତ୍ତେଜନା ହୋଇ ରାସ୍ତା ଅବରୋଧ କରିଥିଲେ। ଟାଉନ ପୁଲିସ ଓ ସିଟି ଡ଼ିଏସପି ପହଞ୍ଚି ଲୋକମାନଙ୍କୁ ବୁଝା ସୁଝା କରିବା ପରେ ଉତ୍ତେଜନା ଥମିବା ସହ ରାସ୍ତା ଉପରେ ଓହରିଥିଲେ ଲୋକମାନେ।

ଏହି ଦୁର୍ଘଟଣା ଘଟାଇ ଥିବା ଟ୍ରକଟି ଖସି ପଳାଉଥିବା ବେଳେ ଟାଉନ ପୁଲିସ ଟ୍ରକ ଟିକୁ ଜବତ କରିଛି। ପୁଲିସ ସେହି ଟ୍ରକରେ ଥିବା ୩ ଜଣକୁ ଅଟକ ରଖିଛି । ଦୁର୍ଘଟଣା ଘଟଇଥିବା ଟ୍ରକ୍‌ଟି ଆନ୍ଦ୍ରପ୍ରଦେଶର ହୋଇଥିବା ନେଇ ପୁଲିସ ସୂଚନା ଦେଇଛି। ଏହି ଘଟଣା ପରେ ସ୍ଥାନୀୟ ଅଂଚଳରେ ପ୍ରବଳ ଉତ୍ତେଜନା ପ୍ରକାଶ ପାଇଛି।