ଖୋର୍ଦ୍ଧା: ଆଜି ସକାଳେ ଗଡ଼ଖୋର୍ଦ୍ଧା ଛକ ବରୁଣେଇ ଓଭରବ୍ରିଜ୍ ନିକଟରେ ଏକ ଚଳନ୍ତା ଟ୍ରକ୍ର ପଛପଟକୁ ଏକ ଯାତ୍ରିବାହୀ ବସ୍ ଧକ୍କା ଦେବା ଫଳରେ ଜଣଙ୍କ ମୃତ୍ୟୁ ଘଟିଥିବା ବେଳେ ୧୦ଜଣ ଆହତ ହୋଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସୂଚନାନୁସାରେ, ଆଜି ସକାଳ ପ୍ରାୟ ୮ଟା ବେଳେ ଭୁବନେଶ୍ୱରରୁ ବୁଗୁଡ଼ା ଯାଉଥିବା ଓମ୍ ଶାନ୍ତି ନାମକ ଏକ ଯାତ୍ରିବାହୀ ବସ୍ (ଓଆର୍ ୦୨ବିକେ ୦୯୭୨)ବସ୍ଟି ବରୁଣେଇ ଓଭରବ୍ରିଜ୍ ନିକଟରେ ଏକ ଚଳନ୍ତା ଟ୍ରକକୁ ପଛପଟୁରୁ ଧକ୍କା ଦେଇଥିଲା । ଫଳରେ ବସଟିର ସମ୍ମୁଖ ଭାଗ ଚୂରମାର ହୋଇଯାଇଥିଲା । ସମ୍ମୁଖଭାଗରେ ବସିଥିବା ଜଣେ ବ୍ୟକ୍ତି ଆଗକୁ ଛିଟିକି ପଡ଼ିଥିଲେ, ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା । ମୃତବ୍ୟକ୍ତିଙ୍କ ନାମ ରଜନୀକାନ୍ତ ମାର୍ଥା ଓ ତାଙ୍କ ଘର ଜଙ୍କିଆ ରମ୍ଭାଭିଲି-ବାଲିଗାଡ଼ିଆ ବୋଲି ଜଣାଯାଇଛି । ସେ ଭୁବନେଶ୍ୱରରେ ସେକ୍ୟୁରିଟି ଗାର୍ଡ ଭାବେ କାମ କରନ୍ତି । ବସ୍ରେ ବସିଥିବା ପ୍ରାୟ ୪୨ଜଣ ଯାତ୍ରୀଙ୍କ ମଧ୍ୟରୁ ୧୧ଜଣ ଆହତ ହୋଇଥିଲେ । ପୁଲିସ ଘଟଣାସ୍ଥଳରେ ପହଂଚି ଆହତଙ୍କୁ ଉଦ୍ଧାର କରି ଖୋର୍ଦ୍ଧା ଜିଲ୍ଲା ମୁଖ୍ୟ ଚିକିତ୍ସାଳୟ ପଠାଇଥିଲେ । ଆହତମାନେ ହେଲେ, ନୟାଗଡ଼ ମର୍ଦ୍ଦକୋଟର ହୀନ ନାହାକ (୫୬) ଓ ସାହିବ ନାୟକ(୬୦) , ବୁଗୁଡ଼ା ବକ୍ସିପଲ୍ଲୀର ସୁନୀଲ ପ୍ରଧାନ (୧୧) ଓ ପ୍ରଭାସିନୀ ପ୍ରଧାନ, କଟକ କନ୍ଦରପୁରର ଶିବ ପ୍ରସାଦ ଦତ୍ତ(୫୮), ନୟାଗଡ଼ ଲୋଧାଚୂଆର ଝରଣା ମାଝି (୬୦), ଗଂଜାମ ବିରିପୁରର ଭାନୁମତି ପାଣିଗ୍ରାହୀ, ଭଗବାନ ନାୟକ ଓ କାହ୍ନୁ ବେହେରା । ଜିଲ୍ଲା ମୁଖ୍ୟ ଚିକିତ୍ସାଳୟରେ କେତେକଙ୍କୁ ପ୍ରାଥମିକ ଚିକିତ୍ସା ପରେ ଛାଡ଼ିଦିଆଯାଇଛି । ତେବେ ଯେଉଁମାନଙ୍କ ମୁଣ୍ଡରେ ଆଘାତ ଲାଗିଛି ସେମାନଙ୍କୁ ନିରୀକ୍ଷଣରେ ରଖାଯାଇଥିବା ଓ ଆବଶ୍ୟକ ପଡ଼ିଲେ ଭୁବନେଶ୍ୱର ପଠାଯିବ ବୋଲି ଚିକିତ୍ସାଳୟ କର୍ତୃପକ୍ଷଙ୍କ ପକ୍ଷରୁ ସୂଚନା ଦିଆଯାଇଛି । ଦୁର୍ଘଟଣା ନେଇ ଖୋର୍ଦ୍ଧା ଶିଳ୍ପାଂଚଳ ଫାଣ୍ଡିରେ ଏକ ମାମଲା ରୁଜୁ କରାଯାଇ ତଦନ୍ତ ଆରମ୍ଭ କରାଯାଇଛି ।