ଦୁଇ ବାଇକ ମୁହାଁମୁହିଁ ଧକ୍କା; ଜଣେ ମୃତ, ଜଣେ ଗୁରୁତର 

ଖଜୁରିଆକଟା: ହିନ୍ଦୋଳ ଉପଖଣ୍ଡ ବାଲିମି ଥାନା ଅନ୍ତର୍ଗତ ଦୁଦୁରକୋଟ ଛକ ନିକଟରେ ଅପରାହ୍ନ ୨.୩୦ ମିନିଟ ସମୟରେ ଦୁଇ ବାଇକ ମଧ୍ୟରେ ମୁହାଁମୁହିଁ ଧକ୍କା ହେବା ଫଳରେ ଜଣେ ବାଇକ ଆରୋହୀଙ୍କ ମୃତ୍ୟୁ ଘଟିଥିବା ବେଳେ ଜଣେ ଗୁରୁତର ହୋଇଛନ୍ତି। ସୂଚନା ଅନୁଯାୟୀ ଅନୁଗୋଳ ଜିଲ୍ଲା ଜରପଡା ଥାନା ଅନ୍ତର୍ଗତ ଜୁକୁବୁ ଗ୍ରାମର ପ୍ରଭାକର ସାହୁଙ୍କ ଦୁଇ ପୁଅ ଆଶିଷ ସାହୁ (୨୨) ଓ ଆକାଶ ସାହୁ (୨୦) ବାଇକ୍‌ (ଓଡି ୧୯ଡି ଏସ୍‌ ୧୮୧୮୮)ରେ ଦାଦା ଝିଅର ଶ୍ବଶୁର ଘର ଢେଙ୍କାନାଳ ଜିଲ୍ଲା ରାସୋଳ ଥାନା ମୁଣ୍ଡିଆପଶି ଗ୍ରାମକୁ ଆସୁଥିବା ବେଳେ ବିପରୀତ ଦିଗରୁ ଏକ ଆପାଚି (ଓଡି୦୬୬ସି ୨୯୫୬) ଦୁଇ ଭାଇଙ୍କୁ ଜୋରରେ ଧକ୍କା ଦେଇଥିଲା। ସେହି ସମୟରେ ଆପାଚି ଗାଡିର ହ୍ୟାଣ୍ଡଲଟି ଆଶିଷ ସାହୁଙ୍କ ପେଟରେ ଗଳି ଜାଇଥିଲା ଫଳରେ ପ୍ରବଳ ରକ୍ତ ସ୍ରାବ ଯୋଗୁଁ ଘଟଣାସ୍ଥଳରେ ଆଶିଷର ପ୍ରାଣବାୟୁ ଉଡି ଯାଇଥିଲା। ପଛରେ ବସିଥିବା ନିଜ ଭାଇ ସାମାନ୍ୟ ଗୁରୁତର ହୋଇଥିଲେ । ଆକାଶଙ୍କୁ ତୁରନ୍ତ ଚିକିତ୍ସା ନିମନ୍ତେ ଅନୁଗୁଳ ପଠାଯାଇଥିଲା।

ଦୁର୍ଘଟଣା ଘଟାଇ ଆପାଚି ଗାଡିର ଦୁଇ ଯୁବକ ଫେରାର ହୋଇ ଯାଇଥିଲେ । ଖବର ପାଇ ବାଲିମି ପୁଲିସ ପହଞ୍ଚି ଆଶିଷର ଦାଦାଙ୍କ ଲିଖିତ ଅଭିଯୋଗ ଅନୁଯାୟୀ ଶବକୁ ଜବତ କରିବା ସହ ବ୍ୟବଚ୍ଛେଦ ପାଇଁ ହିନ୍ଦୋଳ ଡାକ୍ତରଖାନାକୁ ପଠାଇଥିଲେ । ଘଟଣାସ୍ଥଳକୁ ଆଶିଷଙ୍କ ଗ୍ରାମ ଲୋକେ ପହଞ୍ଚିବା ପରେ କିଛି ସମୟ ପାଇଁ ରାସ୍ତାରୋକ କରିଥିଲେ। ଏହି ସ୍ଥାନରେ ବାରମ୍ବାର ଦୁର୍ଘଟଣା ଘଟୁଥିବାରୁ ଏହାର ତୁରନ୍ତ ପ୍ରତିକାର ନିମନ୍ତେ ଉପସ୍ଥିତ ଜନସାଧାରଣ ଦାବି କରିଛନ୍ତି।