ପିକନିକରେ ଆଉ ଏକ ଅଘଟଣ, ବ୍ରାହ୍ମଣୀ ନଦୀରେ ବୁଡି ଯୁବକଙ୍କ ମୃତ୍ୟୁ
ରାଉରକେଲା: ସୁନ୍ଦରଗଡ଼ ଜିଲ୍ଲା ଜାମସେରା କୋଏଲ ନଦୀ ଘାଟ ପରି ଚାନ୍ଦିପୋଷ ବିରତୋଳି ବ୍ରାହ୍ମଣୀ ନଦୀ ଘାଟରେ ସମାନ ଅଘଟଣ ଘଟିଛି l ସାଙ୍ଗ ସହ ବଣଭୋଜି କରିବାକୁ ଯାଇଥିବାବେଳେ ନଦୀରେ ବୁଡି ଜଣେ ଯୁବକଙ୍କର ମୃତ୍ୟୁ ହୋଇଛି l ମୃତକ ଜଣକ ହେଲେ ଲହୁଣୀପଡ଼ା କୁଡାପଡ଼ାର ମାନସ ରଞ୍ଜନ ମହାନ୍ତ l ଚାନ୍ଦିପୋଷ ପୁଲିସ ଶବ ଜବତ କରି ବ୍ୟବଛେଦ ପାଇଁ ବଣାଇ ସରକାରୀ ଡାକ୍ତରଖାନାକୁ ପଠାଇ ତଦନ୍ତ ଚଳାଇଛି l ସୂଚନା ମୁତାବକ ମାନସ ଗାଁର ଜଣେ ସାଙ୍ଗ ସହ ବଣ ଭୋଜି କରିବାକୁ ବ୍ରାହ୍ମଣୀ ନଦୀ ବିରତୋଳା ଘାଟକୁ ବାହାରି ଥିଲେ l ଭୋଜି ସାରି ଅପରାହ୍ନ ପ୍ରାୟ ତିନିଟାରେ ଗାଧୋଇବାକୁ ନଦୀ ଭିତରକୁ ପଶିଥିଲେ l ପଥରେ ଗୋଡ଼ ଖସି ଯିବାରୁ ବୁଡି ଯାଇ ନିଖୋଜ ହୋଇ ଯାଇଥିଲେ l ସ୍ଥାନୀୟ ପୁଲିସ, ଅଗ୍ନିଶମ କର୍ମଚାରୀ ପ୍ରାୟ ଦେଢ ଘଣ୍ଟା ପରେ ମାନସଙ୍କ ଶବ ଉଦ୍ଧାର କରିଥିଲେ l
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ, ଆଜି ବିଶ୍ରା ଜାମସେରା ଘାଟ କୋଏଲ ନଦୀରେ ବୁଡି ଦୁଇ ଛାତ୍ରଙ୍କ ମୃତ୍ୟୁ ହୋଇଛି। ଅନ୍ୟ ଜଣେ ନିଖୋଜ ଅଛନ୍ତି। ମୃତକ ଦୁଇ ଛାତ୍ର ହେଲେ ସେକ୍ଟର -୧୮ର ଭୁବେଶ ପ୍ରସାଦ (୧୭), ଛେଣ୍ଡ କଲୋନିର ସୁଜନ ଶର୍ମା (୧୭)। ନିଖୋଜ ଛାତ୍ର ହେଲେ ସେକ୍ଟର ୫ର କୌଶିକ ମଲିକ (୧୬)। ସମସ୍ତ ଛାତ୍ର ସେକ୍ଟର ୫ ଦୀପିକା ଇଂରାଜୀ ସ୍କୁଲର ଯୁକ୍ତ ୨ରେ ପଢ଼ନ୍ତି। ବନ୍ଧମୁଣ୍ଡା ପୁଲିସ ମୃତ ଦୁଇ ଛାତ୍ରଙ୍କ ଶବ ଜବତ କରିଛି। ନିଖୋଜ ଛାତ୍ର କୌଶିକକୁ ଠାବ କରିବାକୁ ଅଗ୍ନିଶମ ଉଦ୍ଧାର କାମ ଜାରି ରଖିଛନ୍ତି।
