ଝାରସୁଗୁଡା: ବଜ୍ରପାତରେ ଜଣେ ମୃତ, ତିନି ଜଣ ଆହତ
ଲଇକେରା: ଝାରସୁଗୁଡା ଜିଲ୍ଲା ଲଇକେରା ଅଞ୍ଚଳରେ ଆଜି ମଧ୍ୟାହ୍ନ ସମୟରେ କାଳବୈଶାଖୀ ଯୋଗୁ ବର୍ଷା କୁଆପଥର ସହିତ ବଜ୍ରପାତରେ ଜଣଙ୍କର ମୃତ୍ୟୁ ହୋଇଥିବା ବେଳେ ତିନି ଜଣ ଆହତ ହୋଇଥିବା ସୂଚନା ମିଳିଛି । ସୂଚନା ଅନୁସାରେ ଆଜି ଅପରାହ୍ନ ସମୟରେ ହଠାତ ଘୋଟି ଆସିଲା କଳା ହାଣ୍ଡିଆ ମେଘ ସହ କୁଆପଥର ବର୍ଷା । ଗମ୍ଭାରୀଗୁଡା ଗ୍ରାମର ପରୀକ୍ଷିତ ଭଇଁସା (୨୮) ନିଜ ଘରେ ଥିବା ବେଳେ ବଜ୍ରପାତରେ ମୃତୁ ଘଟିଛି । ଗମ୍ଭାରୀଗୁଡା ଗ୍ରାମର ବର୍ଷା ବେହେରା (୧୬) ଓ କୁଲେମୁରା ଗ୍ରାମର ଶାଶୁ ମୁକ୍ତା ରୋହିଦାସ (୪୫) ଓ ବୋହୁ ସୁପ୍ରିୟା ରାଉତିଆ (୨୪) ନିଜ ଘରେ ଥିବା ବେଳେ ବଜ୍ରପାତରେ ଆହତ ହୋଇ ମୁଦ୍ରାଜୋର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଚିକିତ୍ସିତ ହେଉଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଲଇକେରା ଥାନା ଅଧିକାରୀ ପ୍ରବୀର କେଶରୀ ତ୍ରିପାଠୀ ଘଟଣା ସ୍ଥଳରେ ପହଞ୍ଚି ମୃତ ପରୀକ୍ଷିତ ଭଇଁସାର ସବକୁ ଜବତ କରି ଆସନ୍ତାକାଲି ବ୍ୟବଚ୍ଛେଦ ପାଇଁ ଝାରସୁଗୁଡା ପଠାଇବା କହିଛନ୍ତି । ଏଥିସହ ଖଇରଡ଼ିହି ଓ କୁଲେମୁରା ଗ୍ରାମର ୧୦ ରୁ ଉର୍ଦ୍ଧ୍ବ ଗାଈ ବଜ୍ରପାତରେ ମୃତୁ ହୋଇଥିବା ଜଣାପଡିଛି । କୁଆପଥର ବର୍ଷାରେ ସାହାସପୁର ଗ୍ରାମର ଆନନ୍ଦ ଅଗ୍ରୱାଲଙ୍କ ସମେତ ଚାଷୀ ମାନଙ୍କ ଅମଳ ଧାନ ପାଣିରେ ଭିଜି ନଷ୍ଟ ହୋଇଯାଇଥିବା ସୂଚନା ମିଳିଛି । ବଜ୍ରପାତରେ ମୃତ୍ୟୁ ଘଟିଥିବା ମଣିଷ ଗାଈ ଗୋରୁ ସହିତ ଭିଜିଥିବା ଧାନର ଆକଳନ କରି କ୍ଷତିପୂରଣ ଦେବାପାଇଁ ଅଞ୍ଚଳ ବାସୀ ଦାବିକରିଛନ୍ତି । ଅନେକ ସ୍ଥାନରେ ଗଛ ଭାଙ୍ଗି ପଡ଼ିଥିବାରୁ ବିଦ୍ୟୁତ ସରବରାହ ବ୍ୟାହତ ହୋଇଛି ।