ଭାରସାମ୍ୟ ହରାଇ ଓଲଟିଲା ଅଟୋ: ଜଣେ ମୃତ ,୫ ଗୁରୁତର ଆହତ

ଲକ୍ଷ୍ମୀପୁର: କୋରାପୁଟ-ରାୟଗଡାକୁ ସଂଯୋଗ କରୁଥିବା ୩୨୬ ନମ୍ବର ମୁଖ୍ୟ ରାସ୍ତାର ତୁନପାର ଛକରେ ଭାରସାମ୍ୟ ହରାଇ ଏକ ପାସେଞ୍ଜର ଅଟୋ ଓଲଟି ପଡିବାରୁ ଘଟଣାସ୍ଥଳରେ ଅଟୋ ତଳେ ଚାପି ହୋଇ ଜଣଙ୍କର ମୃତ୍ୟୁ ହୋଇଥିବାବେଳେ ୫ ଜଣ ଗୁରୁତର ଆହତ ହୋଇଛନ୍ତି। ସୋମବାର କାକିରିଗୁମା ସାପ୍ତାହିକ ହାଟ ଥାଏ | ଆଉ ଏହି ହାଟକୁ କାକିରିଗୁମା ସମେତ ଆଖପାଖ ଅଞ୍ଚଳର ଲୋକମାନେ ସଉଦା ଆଣିବା ସକାଶେ ଅଞ୍ଚଳର ଲୋକେ ଆସିଥାନ୍ତି । ପ୍ରତ୍ୟେକ ସପ୍ତାହ ପରି ଆଜି ଅପରାହ୍ନରେ କାକିରିଗୁମାରୁ ଓଡି ୧୦ ଏଫ୍ ୮୩୫୫ ନମ୍ବରର ଏକ ଅଟୋ ୧୭ ଜଣ ଯାତ୍ରୀକୁ ନେଇ ତୁନପାର ଅଭିମୁଖେ ଯାଉଥିଲା । ତୁନପାର ଛକ ନିକଟ ବୁଲାଣିଠାରେ ଡ୍ରାଇଭର ଅଟୋ ଉପରୁ ନିୟନ୍ତ୍ରଣ ହରାଇଥିଲା ଓ ଅଟୋଟି ରାସ୍ତା କଡରେ ଓଲଟି ପଡିଥିଲା ।

ଅଟୋ ଓଲଟି ପଡିବା ପରେ ଅଟୋରେ ଥିବା ଯାତ୍ରୀ ଅଟୋ ତଳେ ଚାପି ହୋଇଥିଲେ । ସ୍ଥାନୀୟ ଲୋକମାନେ ସେଠାରେ ପହଞ୍ଚି ଅଟୋ ଭିତରୁ ଲୋକମାନଙ୍କୁ ବାହାର କରିବା ସହ ଆହତ ବ୍ୟକ୍ତିଙ୍କୁ କାକିରିଗୁମା ଡାକ୍ତରଖାନାକୁ ସ୍ଥାନାନ୍ତର କରିଥିଲେ । ଘଟଣାସ୍ଥଳରେ ତୁନପାର ପଞ୍ଚାୟତ ତରିଗୁଡାଗ୍ରାମର ନାମ ଯାନୀ (୭୫)ଙ୍କର ମୃତ୍ୟୁ ହୋଇଯାଇଥିବାବେଳେ ଖବର ପାଇ କାକିରିଗୁମା ପୁଲିସ ଘଟଣାସ୍ଥଳରେ ପହଞ୍ଚି ଗାଡି ଓ ମୃତଦେହ ଜବତ କରିବା ସହ ଗୁରୁତର ଆହତ ବ୍ୟକ୍ତିଙ୍କୁ କୋରାପୁଟ ସହିଦ ଲକ୍ଷ୍ମଣ ନାୟକ ମେଡିକାଲ କଲେଜକୁ ପଠାଇଥିଲେ | ଅଟୋ ଡ୍ରାଇଭର ଫେରାର ଥିବା ସୂଚନା ମିଳିଛି ।