ସାପ କାମୁଡ଼ାରେ ଖିଲପୁଟ ଗ୍ରାମର ଜଣେ ମୃତ

ବୈପାରିଗୁଡା: କୋରାପୁଟ ଜିଲ୍ଲା ବୈପାରିଗୁଡା ଥାନା ଅନ୍ତର୍ଗତ ଖିଲପୁଟ ଗ୍ରାମର ଜଣେ ବ୍ୟକ୍ତିଙ୍କ ସାପ କାମୁଡ଼ାରେ ମୃତ୍ୟୁ ଘଟିଛି। ସୂଚନା ଅନୁଯାୟୀ, ଖିଲପୁଟ ଗ୍ରାମର ଶୁକମନ ହରିଜନ (୫୨) ଗୁରୁବାର ରାତିରେ ପରିବାର ଲୋକଙ୍କ ସହ ଖାଇବା ପରେ ଶୋଇବାକୁ ନିଜ ବିଛଣାକୁ ଯାଇଥିଲେ। ଶୋଇଥିବା ଅବସ୍ଥାରେ ବିଳମ୍ବିତ ରାତିରେ ତାଙ୍କ ଡାହାଣ ହାତରେ ଏକ ବିଷଧର ସାପ କାମୁଡ଼ି ଦେଇଥିଲା। ସାପ କାମୁଡ଼ିବା ପରେ ଶୁକମନ ପ୍ରାଣ ବିକଳରେ ଚିତ୍କାର କରିବା ସହିତ ଏସମ୍ପର୍କରେ ଦୁଇ ପୁଅଙ୍କୁ ଜଣାଇଥିଲେ।

ଶୁକମନକୁ ତୁରନ୍ତ ଜୟପୁର ଜିଲ୍ଲା ହସ୍ପିଟାଲରେ ଭର୍ତ୍ତି କରାଯାଇଥିଲା। ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇ ଯାଇଥିଲା। ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିବା ବୈପାରିଗୁଡା ପୁଲିସ ସୂଚନା ଦେଇଛନ୍ତି। ଏନେଇ ବୈପାରିଗୁଡା ଥାନାରେ ଏକ ମାମଲା ରୁଜୁ କରାଯାଇ ତଦନ୍ତ ଜାରି ରହିଛି।