ସୁରକ୍ଷାକର୍ମୀଙ୍କୁ ଟାର୍ଗେଟ କରି ଖଞ୍ଜିଥିଲେ ଲ୍ୟାଣ୍ଡମାଇନ: ବିସ୍ଫୋରଣରେ ଗଲା ମହିଳାଙ୍କ ଜୀବନ

ମାଲକାନଗିରି: ମାଲକାନଗିରି ସୀମାନ୍ତ ଛତିଶଗଡର ଜଂଗଲରେ ପାଦ ପାଦକେ ନକ୍ସଲ ଲ୍ୟାଣ୍ଡମାଇନ ଖଞ୍ଜିଛନ୍ତି। ପ୍ରାୟତଃ ପ୍ରତି ମାସରେ ଜଣେ ଗ୍ରାମବାସୀ କିମ୍ବା ଶିଶୁ ନକ୍ସଲଙ୍କ ଲ୍ୟାଣ୍ଡମାଇନର ଶିକାର ହେଉଛନ୍ତି। ନକ୍ସଲ ସୁରକ୍ଷାକର୍ମୀଙ୍କୁ ଟାର୍ଗେଟ କରି ଜଂଗଲରେ ଲ୍ୟାଣ୍ଡମାଇନ ଓ ପ୍ରେସର ବୋମା ଖଞ୍ଜୁଛନ୍ତି। କିନ୍ତୁ ଏଥିରେ ନିରୀହ ଜନତା ଫସୁଛନ୍ତି। ଏଭଳି ଏକ ଘଟଣା ସୀମାନ୍ତ ସୁକମା ଜିଲ୍ଲାରେ ଘଟିଛି। ନକ୍ସଲଙ୍କ ଦ୍ବାରା ଖଞ୍ଜାଯାଇଥିବା ପ୍ରେସର ବୋମାରେ ଜଣେ ମହିଳାଙ୍କର ମୃତ୍ୟୁ ହୋଇଛି | ଏହି ଘଟଣା ସୁକମା ଜିଲ୍ଲାର କିସ୍ଟରାମ ଥାନା ଅଂଚଳର ଡାଆମାର୍କା ଜଂଗଲରେ ଘଟିଛି।

କାବାସି ସୁକି ନାମକ ମହିଳା ନିଜର ଗାଈଗୋରୁଙ୍କ ନେଇ ଜଂଗଲରେ ଚରାଇବାକୁ ବାହାରିଥିଲେ। ଜଂଗଲରେ ଗାଈ ଚରାଉଥିବା ବେଳେ ତାଂକର ପାଦ ନକ୍ସଲଙ୍କର ଦ୍ବାରା ଖଞ୍ଜାଯାଇଥିବା ପ୍ରେସର ବୋମା ଉପରେ ପଡିଥିଲା। ଯାହାଫଳରେ ଏକ ବଡ ଧରଣର ବିସ୍ଫୋରଣ ହୋଇଥିଲା। ବିସ୍ଫୋରଣରେ ମହିଳା ଜଣକ ଘଟଣାସ୍ଥଳରେ ହିଁ ମୃତ୍ୟୁବରଣ କରିଥିଲେ। ବିସ୍ଫୋରଣ ଶଦ୍ଦ ଶୁଣି ଗ୍ରାମବାସୀ ଜଂଗଲରେ ପହଞ୍ଚିଥିଲେ। ତୁରନ୍ତ ମହିଳାଙ୍କୁ ଉଦ୍ଧାର କରିଥିଲେ ମଧ୍ୟ ତାଂକର ମୃତ୍ୟୁ ହୋଇଯାଇଥିଲା।ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରୁଥିବା ଜଣାପଡିଛି।