ପୁଲିସ ନକ୍ସଲ ଗୁଳିବିନିମୟ, ଜଣେ ନକ୍ସଲ ମୃତ

ମାଲକାନଗିରି: ମାଲକାନଗିରି ସୀମାନ୍ତ ଛତିଶଗଡର ଦନ୍ତେଵାଡା ଜିଲ୍ଲାରେ ପୁଲିସ ନକ୍ସଲ ମଧ୍ୟରେ ଗୁଳିବିନମୟ ଘଟିଛି।ଏହି ଗୁଳିବିନିମୟରେ ଜଣେ ନକ୍ସଲ ମୃତ୍ୟୁବରଣ କରିଥିବା ବେଳେ ମାଓ ସାମଗ୍ରୀ ଜବତ କରାଯାଇଛି। ଗିଦମ ଥାନା ଅଂଚଳର ଇକେଲୀ ଏବଂ ନେଲଗୋଡା ଜଂଗଲରେ ପ୍ରାୟ ୧୦ରୁ ୧୫ ନକ୍ସଲ କ୍ୟାମ୍ପ କରି ରହିଥିବା ପୁଲିସକୁ ସୂଚନା ମିଳିଥିଲା। ତୁରନ୍ତ ପୁଲିସ ଏବଂ ଡିଆରଜି ଯବାନ ଜଂଗଲରେ ସର୍ଚ୍ଚ ଅପରେସନକୁ ବାହାରିଥିଲେ।

ଜଂଗଲରେ ଇନ୍ଦ୍ରାବତୀ ନଦୀକୁ ବିପଦପୂର୍ଣ୍ଣ ଭାବେ ପାର କରିବା ପରେ ଜଂଗଲରେ ନକ୍ସଲଙ୍କ ସହ ଗୁଳିବିନିମୟ ହୋଇଥିଲା। ଦୀର୍ଘ ସମୟ ଧରି ଗୁଳିବିନିମୟ ଘଟିଥିଲା। ତେବେ ନକ୍ସଲ ଯବାନଙ୍କ ଗୁଳିର ସାମ୍ନା କରିନପାରି ଛତ୍ରଭଙ୍ଗ ଦେଇଥିଲେ। ଘଟଣାସ୍ଥଳରେ ସର୍ଚ୍ଚ ଅପରେସନ ବେଳେ ଜଣେ ନକ୍ସଲର ମୃତ ଦେହକୁ ପୁଲିସ ଉଦ୍ଧାର କରିଛି। ମୃତ ନକ୍ସଲ ପ୍ଲାଟୁନ ନମ୍ବର-୧୬ର ସଦସ୍ୟ ବୋଲି ପୁଲିସ ଅନୁମାନ କରୁଛି। ଘଟଣାସ୍ଥଳରୁ ପୁଲିସ ମାଓ ସାମଗ୍ରୀ ମଧ୍ୟ ଜବତ କରିଛି। ସୁରକ୍ଷାକର୍ମୀଙ୍କର କୌଣସି କ୍ଷୟକ୍ଷତି ହୋଇନଥିବା ପୁଲିସ କହିଛି।