ଏମିତି ଚାଲିଛି କୋରାପୁଟ ପରିବହନ କାର୍ଯ୍ୟାଳୟ: ମାଲିକ ଜାଣୁନାହାନ୍ତି କେବେ ବଦଳିଯାଉଛି ତାଙ୍କ କାରର ମାଲିକାନା
ଚୋର ବଦଳାଇପାରୁଛନ୍ତି ମାଲିକାନା
କୋରାପୁଟ/ସେମିଳିଗୁଡା: ସାବଧାନ! ଗାଡି ଆପଣଙ୍କର ହୋଇପାରେ, କିନ୍ତୁ ଆଉ କିଏ ବି ମାଲିକାନା ଜାହିର କରି ପାରିବ। କୋରାପୁଟ ପରିବହନ କାର୍ଯ୍ୟଳୟରେ ଏପରି କରିତକର୍ମା କର୍ମଚାରୀ ରହିଛନ୍ତି ଯେ ବିକ୍ରେତା ଓ କେତ୍ରା ଅନୁପସ୍ଥିତ ରହିଥିଲେ ମଧ୍ୟ ମାଲିକାନା ପରିବର୍ତ୍ତନ ହୋଇପାରିବ। ଖୋଦ କୋରାପୁଟ ଜିଲ୍ଲା ସୁନାବେଡା ପୁଲିସ ସାମ୍ବାଦିକ ସମ୍ମିଳନୀ କରି ଏହି ସୂଚନା ଦେଇଛି। ସୁନାବେଡା ପୁଲିସ ଦଣ୍ଡାସୀ ଗୁଡା ଅଞ୍ଚଳର ପିଣ୍ଟୁ ହନ୍ତାଳ ଓ ବୋରିଗୁମ୍ମା ଅଞ୍ଚଳର ଜୋସେଫ କୁଲଦୀପଙ୍କୁ ଗିରଫ କରି ଲୁଟ ହୋଇଥିବା କାର ବିଷୟରେ ପଚରାଉଚରା କରିବା ସମୟରେ ଚାଞ୍ଚଲ୍ୟକର ଘଟଣା ପଦାକୁ ଆସିଥିଲା | ଲୁଟ ହୋଇଥିବା ଅଲ୍ଟୋ କାରକୁ ଦୁର୍ବୁତ୍ତମାନେ ଜାଲ କାଗଜପତ୍ର ଜରିଆରେ ଭେଜାପୁଟ ରେଲୱେ କଲୋନୀର ବିପିନ ଛତ୍ରୀୟାଙ୍କୁ ବିକ୍ରି କରି ଦେଇଥିବା ଜଣାପଡିଥିଲା |
Sambad is now on WhatsApp
Join and get latest news updates delivered to you via WhatsApp
ପୁଲିସ ବିପିନଙ୍କୁ ଥାନାକୁ ଡକାଇ ପଚରାଉଚରା କରିବା ପରେ ମାତ୍ର ୨୫ ହଜାର ଟଙ୍କା ବିନିମୟରେ ଦାମନଯୋଡି ଅଞ୍ଚଳରେ ଜନସେବା କେନ୍ଦ୍ର ଖୋଲିଥିବା ସନ୍ତୋଷ କୁମାର ଖଣ୍ଡେଇ ତାଙ୍କୁ ସମସ୍ତ କାଗଜପତ୍ର ଦେଇଥିବା କଥା ପ୍ରକାଶ କରିଥିଲା | ଗାଡିର ମାଲିକ ପରିବହନ କାର୍ଯ୍ୟାଳୟ ଆସିନାହାନ୍ତି କି କିଣିବା ଲୋକ ବି କାର୍ଯ୍ୟାଳୟ ଆସିନାହାନ୍ତି । କିନ୍ତୁ ଗାଡିଟି ବିକ୍ରି ହୋଇ ମାଲିକାନା ପରିବର୍ତ୍ତନ ହୋଇଛି । ଏହା ଆପଣଙ୍କୁ ମିଛ ଲାଗିପାରେ, କିନ୍ତୁ ଘଟଣାଟି ସଂପୂର୍ଣ୍ଣ ସତ । ଏହା ଆମେ କହୁନୁ କହିଛନ୍ତି ନିଜେ ସୁନାବେଡା ଏସଡିପିଓ ମନୋଜ କୁମାର ବେହେରା । ୨୦୨୧ ମସିହା ସେପ୍ଟେମ୍ବର ୨୧ରେ କୋରାପୁଟ ଜିଲ୍ଲା ସିମିଳିଗୁଡା କଲେଜ ନିକଟରେ ଜଗୁ ହନ୍ତାଲ ଓ ତାଙ୍କ ସଙ୍ଗ ଏକ ମାରୁତି କାର ନିକଟରେ କଥା ହେଉଥିବାବେଳେଠାରୁ ଦୁଇଟି ବାଇକ୍ରେ ୫ ଜଣ ଆସି ଛଡାଇ ନେଇଯାଇଥିଲେ। ପରେ ସୁନାବେଡା ଥାନାରେ ଏତଲା ଦେଇଥିଲେ ଜଗୁ ।
ଘଟଣାର ତଦନ୍ତ କରିବା ପରେ ଜଣାପଡିଲା ଯେ ମାରୁତି କାର (ଓଡି-୧୦-୩୭୯୬) ଗାଡିର ମାଲିକାନା ପରିବର୍ତ୍ତନ ହୋଇଯାଇଛି । ପ୍ରକୃତ ଗାଡିର ମାଲିକ ଜଗୁ ହନ୍ତାଳଙ୍କ ନାମରୁ ବିପିନ ଛାତ୍ରୀଆଙ୍କ ନାମକୁ ବଦଳିଯାଇଛି । ଏହି ଚୋରି ଗାଡିକୁ ବିପିନ ୪୦ ହଜାର ଟଙ୍କାରେ କିଣି ମାଲିକାନା ପରିବର୍ତ୍ତନ କରିବା ପାଇଁ ଦାମନଯୋଡିର ଜନସେବା କେନ୍ଦ୍ରରେ କାଗଜପତ୍ର ଦେଇଥିଲେ । ସେହି ଗାଡିର କାଗଜ ପତ୍ରକୁ ଜାଲି କରି କୋରାପୁଟ ଜିଲ୍ଲା ପରିବହନ ବିଭାଗରେ ବିପିନ ଛାତ୍ରୀଆ ନାମରେ କରିଦେଇଥିବା ଏସଡିପିଓ କହିଛନ୍ତି । ସରକାରୀ ନିୟମ ଅନୁସାରେ ବିକ୍ରେତା ଓ କେତ୍ରା ଉପସ୍ଥିତି ନହେଲେ ଗାଡି ବିକ୍ରି ହୋଇପାରିବ ନାହିଁ । କିନ୍ତୁ ବିକିବା ଲୋକ ଜଗୁ ହନ୍ତାଳ ସେ ଆରଟିଓ କାର୍ଯ୍ୟାଳୟ ଯାଇ ନଥିବାବେଳେ କିଣିବା ଲୋକ ବିପିନ ଛାତ୍ରୀଆ ବି ଚୋରି ଗାଡି କିଣିଛନ୍ତି ସତ କିନ୍ତୁ ସେ ବି ଆରଟିଓ କାର୍ଯ୍ୟାଳୟ ଯାଇନାହାନ୍ତି । ତେବେ ଗାଡିଟିର ମାଲିକାନା କେମିତି ପରିବର୍ତ୍ତନ ହେଲା ତାହାକୁ ନେଇ ସନ୍ଦେହ ଉଠିଛି। ସରକାର ୫ଟିରେ ରାଜ୍ୟର ପ୍ରତି ପରିବହନ କାର୍ଯ୍ୟାଳୟରେ ଦଲାଲମୁକ୍ତ ବୋଲି ଘୋଷଣାକୁ ନେଇ ପ୍ରଶ୍ନ ଉଠିଛି । ତେବେ ଏହି ମାଲିକାନା ପରିବର୍ତ୍ତନ କରିବାକୁ ଜନସେବା କେନ୍ଦ୍ର ଓ ଆରଟିଓର ଜଣେ ଡିଲିଂ କ୍ଲର୍କ ଏବଂ ଡାଟା ଏଣ୍ଟ୍ରି ଅପରେଟର ମଧ୍ୟରେ ସଲାସୁତରା ହୋଇଥିବାର କୁହାଯାଉଛି । ତାଙ୍କ ମାଧ୍ୟମରେ ଏହି କାର୍ଯ୍ୟ ହୋଇଥିବାରୁ ଆରଟିଓ କର୍ମଚାରୀଙ୍କୁ ମଧ୍ୟ ତଦନ୍ତ ପରିସରକୁ ନିଆଯିବ ବୋଲି ଏସଡିପିଓ ସୂଚନା ଦେଇଛନ୍ତି।