ରାୟଗଡ଼ା ଷ୍ଟେସନରେ ଅଭାବନୀୟ ଘଟଣା; ଲିକ୍ ହେଲା ଅକ୍ସିଜେନ୍ ବୋଝେଇ ଟ୍ୟାଙ୍କର

ରାୟଗଡ଼ା : ଆଜି ସକାଳେ ରାୟଗଡ଼ା ରେଳ ଷ୍ଟେସନରେ ଅଭାବନୀୟ ଘଟଣା
ଘଟିଛି। ଅକ୍ସିଜେନ୍ ନେଇ ବେଙ୍ଗାଲୁରୁ ଅଭିମୁଖେ ଯାଉଥିବା ମାଲବାହୀ ଟ୍ରେନର ଏକ
ଟ୍ୟାଙ୍କରରୁ ଗ୍ୟାସ୍ ଲିକ୍ ହୋଇଥିଲା। ଆରପିଏଫ୍ କର୍ତ୍ତୃପକ୍ଷ ଘଟଣା ସଂପର୍କରେ ଅବଗତ ହେବା ପରେ ଦମକଳ ବାହିନୀ, ରେଳ ବିଭାଗ ଓ ଜିଲ୍ଲା ପ୍ରଶାସନକୁ ସୂଚନା ଦେଇଥିଲେ। ରେଳ ବିଭାଗର କ୍ୟାରିଙ୍ଗ୍ ଆଣ୍ଡ ଫରୱାର୍ଡିଙ୍ଗ୍ ଟେକ୍ନିସିଆନଙ୍କ ସମେତ ରାୟଗଡ଼ା ଅକ୍ସିଜେନ୍ ଡିପୋ ଟେକ୍ନିସିଆନ୍ ଷ୍ଟେସନରେ ପହଞ୍ଚି ଲିକ୍ ଟ୍ୟାଙ୍କରର ମରାମତି କରିବା ପରେ ମାଲବାହୀ ଟ୍ରେନ୍ ଗନ୍ତବ୍ୟସ୍ଥଳ ଅଭିମୁଖେ ଯାତ୍ରା କରିଛି।
ରାଉରକେଲାରୁ ବେଙ୍ଗାଲୁରୁ ଅଭିମୁଖେ ୬ଟି ଅକ୍ସିଜେନ୍ ଟ୍ୟାଙ୍କର ନେଇ ଯାଉଥିବା ମାଲବାହୀ ଟ୍ରେନ୍ ସକାଳ ୬ଟାରେ ରାୟଗଡ଼ା ଷ୍ଟେସନରେ ପହଞ୍ଚିଥିଲା। ଲାଇନ୍ କ୍ଲିଅର୍ ନଥିବାରୁ ମାଲବାହୀ ଟ୍ରେନଟି ଷ୍ଟେସନ୍ ମାଷ୍ଟରଙ୍କ ସିଗନାଲକୁ ଅପେକ୍ଷା କରି ରହିଥିଲା। ସକାଳ ୭ଟାରେ ଷ୍ଟେସନରେ ପେଟ୍ରୋଲିଂ କରୁଥିବା ଆରପିଏଫ୍ ଷ୍ଟାଫ୍ ଏକ ଟ୍ୟାଙ୍କରରୁ ଗ୍ୟାସ ଲିକ୍ ହେଉଥିବା ଦେଖିଥିଲେ। ସଙ୍ଗେ ସଙ୍ଗେ ଏ ସଂପର୍କରେ ଷ୍ଟେସନ ମ୍ୟାନେଜରଙ୍କ ସମେତ ଅଗ୍ନିଶମ ବିଭାଗକୁ ଖବର ଦେଇଥିଲେ। ଏଥି ସହିତ ଟ୍ରେନଟି ଆସିଥିବା ରାଉରକେଲାର ସଂପୃକ୍ତ କଂପାନିକୁ ମଧ୍ୟ ଅବଗତ କରାଯାଇଥିଲା। ସାଢ଼େ ୭ଟାରେ ଅଗ୍ନିଶମ ବାହିନୀ, ରେଳ ବିଭାଗ
ଟେକ୍ନିସିଆନ୍ ଓ ସ୍ଥାନୀୟ ଗ୍ୟାସ୍ ଡିପୋ ଟେକ୍ନିସିଆନଙ୍କ ଜରିଆରେ ଲିକର ମରାମତି
କରାଯାଇଥିଲା। ପ୍ରାୟ ୯୯ ପ୍ରତିଶତ ଲିକର ମରାମତି ପରେ ଟ୍ରେନ୍ ରାୟଗଡ଼ା ଷ୍ଟେସନ ଛାଡ଼ିଥିଲା। ଟ୍ୟାଙ୍କରରେ ଅକ୍ସିଜେନ୍ ଥିବା ବେଳେ ଲିକ୍ ଅକ୍ସିଜେନ୍ ଯୋଗୁ କାହାର କିଛି କ୍ଷତି ହୋଇନଥିବା ଜଣା ପଡିଛି।