ଖୋର୍ଦ୍ଧା : ସୁପ୍ରିମକୋର୍ଟଙ୍କ ଦ୍ୱାରା ଜବତ ହୋଇଥିବା ଏକ ଚିଟଫଣ୍ଡ କମ୍ପାନୀର ଜମିକୁ କିଛି ଦଲାଲ ବିକ୍ରି କରିବାକୁ ମସୁଧା କରୁଥିବା ଓ ଏନେଇ ବିକ୍ରି କବଲା ଖୋର୍ଦ୍ଧା ସବ୍ରେଜିଷ୍ଟାର କାର୍ଯ୍ୟାଳୟରେ ପଂଜୀକୃତ ହୋଇଥିବା ଘଟଣାରେ ସିବିଆଇ ତଦନ୍ତ କରିବାକୁ କୁମାରବସ୍ତ, କାଂଜିଆମାର କେତେକ ବାସିନ୍ଦା ଦାବି କରିଛନ୍ତି ।
କୁମାରବସ୍ତ ଗାଁର ତ୍ରିଲୋଚନ ଜେନା କହିଛନ୍ତି ଯେ ପିଏସିଏଲ୍ ଲିଃ ମୂଳ କମ୍ପାନୀ ନିଜର ଶାଖା କମ୍ପାନୀ ଏମ୍ଇକେ ଲିଃ ଓ ପରର୍ଲସ୍ ଟୁରିଜମ୍ ଲିଃ ଦ୍ୱାରା ୨୦୦୯ରେ ଖୋର୍ଦ୍ଧାର କାଂଜିଆମା ଓ କୁମାରବସ୍ତ ଗାଁ ନିକଟରେ ୭୦ ଏକର ଜମି କିଣିଥିଲା । ଏହାପରେ କମ୍ପାନୀ ଚିଟଫଣ୍ଡ ଜାଲିଆତିରେ ସମ୍ପୃକ୍ତ ହୋଇଥିଲା । ୨୦୧୪ରେ ସିବିଆଇ ଏନେଇ ତଦନ୍ତ ଆରମ୍ଭ କରିଥିଲା । ୨୦୧୬ ଫେବ୍ରୁଆରୀ ୨ ତାରିଖ ସୁପ୍ରିମକୋର୍ଟ ଏହାର ସମସ୍ତ ସମ୍ପତ୍ତି ସିଜ୍ କରିବା ସହ ଲୋଧା କମିଶନ ଅଧୀନରେ ଏହାର ତଦନ୍ତ କରିବାକୁ ନିର୍ଦେଶ ଦେଇଥିଲେ ।
Sambad is now on WhatsApp
Join and get latest news updates delivered to you via WhatsApp
ଏହି ସମୟରେ କମ୍ପାନୀ କୌଣସି ସମୟରେ କୋର୍ଟଙ୍କ ବିନା ଅନୁମତିରେ ନିଜର ସମ୍ପତ୍ତି ବିକ୍ରି କରିପାରିବ ନାହିଁ ବୋଲି ମଧ୍ୟ ସ୍ପଷ୍ଟ କରିଥିଲେ ।
ସୁପ୍ରିମକୋର୍ଟଙ୍କ ନିର୍ଦେଶ ଅନୁସାରେ ୪ ଜୁନ୍ ୨୦୧୮ରେ ଜିଲ୍ଲାପାଳଙ୍କୁ ନିଜର ଚିଠି ନମ୍ବର ( ଆର୍ଡିଏମ୍ ଇ ଆର୍ଇଜି-୦୦୩/୨୦୧୭/୨୦୪୦୩) ରେ ଯେଭଳି ସିଲ୍ ହୋଇଥିବା ଜମି ଆଦି ବିକ୍ରି ହେବନାହିଁ ସେନେଇ ପଦକ୍ଷେପ ନେବାକୁ ନିର୍ଦେଶ ଦେଇଥିଲେ । କିନ୍ତୁ ୨୦୨୦ ଅଗଷ୍ଟ ୨୧ ତାରିଖରେ ଖୋର୍ଦ୍ଧା ଉପନିବନ୍ଧକ (ସବ୍ରେଜିଷ୍ଟାର୍)ଙ୍କ କାର୍ଯ୍ୟାଳୟରେ ଏନେଇ ବିକ୍ରି କବଲା (କବଲା ନମ୍ବର ୨୧୮୧)ପଂଜୀକୃତ ହୋଇଛି । କମ୍ପାନୀର ସିଲ୍ ହୋଇଥିବା ଜମିକୁ କେଶବ ଓ ଦୀପକ ନାମକ ଦୁଇଜଣ ବ୍ୟକ୍ତି ଭୁବନେଶ୍ୱର ଜଣେ ବ୍ୟକ୍ତିଙ୍କୁ ୫୦ଲକ୍ଷ ଟଙ୍କାରେ ବିକ୍ରି କରିବାକୁ ଚୁକ୍ତି କରିଥିବା ଗାଁ ଲୋକ ଅଭିଯୋଗ କରିଛନ୍ତି ।
ସେମାନେ କହିଛନ୍ତି ଯେ ବିକ୍ରି କବଲା ପଂଜୀକରଣ ନେଇ ସେମାନେ ଜାଣିନଥିଲେ । କିନ୍ତୁ ଗତ ଦୁଇ-ତିନିଦିନ ପୂର୍ବେ ସମ୍ପୃକ୍ତ ବ୍ୟକ୍ତି ସିଲ ହୋଇଥିବା ଜମିରେ ମାଟି ସମତଳ ଓ ଖୋଳିବା ଆରମ୍ଭ କରିବା ପରେ ଏନେଇ ଜାଣିବାକୁ ପାଇଥିଲେ । ସରକାରଙ୍କ ସ୍ପଷ୍ଟ ନିଦେ୍ର୍ଦଶ ଥିବା ସତ୍ୱେ କିଭଳି ଉପନିବନ୍ଧକଙ୍କ କାର୍ଯ୍ୟାଳୟରେ ଏନେଇ ବିକ୍ରି କବଲା ପଂଜୀକୃତ ହେଲା, କିଏ ଏହାକୁ ଅନୁମତି ଦେଲା ସେନେଇ ସିବିଆଇ ତଦନ୍ତର ଆବଶ୍ୟକତା ରହିଛି ବୋଲି ଗ୍ରାମବାସୀ କହିଛନ୍ତି ।