ପ୍ରାଣନାଥ କଲେଜର ଯୁକ୍ତ ତିନି ପରୀକ୍ଷା ଫଳ ପ୍ରକାଶିତ
ଖୋର୍ଦ୍ଧା: ପ୍ରାଣନାଥ ପଟ୍ଟନାୟକ ସ୍ୱୟଂ ଶାସିତ ମହାବିଦ୍ୟାଳୟର ଯୁକ୍ତ ତିନି ବାର୍ଷିକ ପରୀକ୍ଷା ଫଳ ଆଜି ପ୍ରକାଶ ପାଇଛି । ଏହି ଅବସରରେ ଅନୁଷ୍ଠିତ ସଭାରେ କୃତି ଛାତ୍ରଛାତ୍ରୀଙ୍କୁ ସମ୍ମାନୀତ କରାଯାଇଥିଲା ।
Sambad is now on WhatsApp
Join and get latest news updates delivered to you via WhatsApp
ମହାବିଦ୍ୟାଳୟର ଅଧ୍ୟକ୍ଷା ରଂଜିତା ସେଠୀ ପରୀକ୍ଷା ଫଳ ସମ୍ପର୍କରେ ସୂଚନା ଦେଇ କହିଥିଲେ ଯେ ୬ଟି ସେମିଷ୍ଟର ପରୀକ୍ଷାର ମୋଟ ଫଳକୁ ନେଇ ଚୂଡ଼ାନ୍ତ ପରୀକ୍ଷା ଫଳ ପ୍ରକାଶ କରାଯାଇଛି । ୨୦୧୮-୨୧ ଶିକ୍ଷା ବର୍ଷରେ ମୋଟ ପାସ ହାର ୮୬.୨ ପ୍ରତିଶତ ରହିଛି । ଏହା ମଧ୍ୟରୁ ଛାତ୍ରୀଙ୍କ ପାସ ହାର ୮୯.୯୬ ପ୍ରତିଶତ ଓ ଛାତ୍ରଙ୍କ ପାସ ହାର ୮୨.୭୬ ପ୍ରତିଶତ ରହିଛି ।
କଳା ବିଭାଗରେ ପାସ୍ ହାର ୮୬.୯ ପ୍ରତିଶତ, ବିଜ୍ଞାନରେ ୮୮.୮ ଓ ବାଣିଜ୍ୟରେ ୮୩ ପ୍ରତିଶତ ପାସ୍ ହାର ରହିଛି । ବାଣିଜ୍ୟ ବିଭାଗରେ ଏଲ୍ ଭେନିଲା, କଳା (ଶିକ୍ଷା ସମ୍ମାନ ବିଭାଗ)ର ବେବିନା ବେହେରା ଓ ବିଜ୍ଞାନ (ରସାୟନ ବିଭାଗ)ର ମନୀଷା ମହାରଣା ସର୍ବାଧିକ ନମ୍ବର ରଖିଛନ୍ତି । ସମସ୍ତ କୃତି ଛାତ୍ରଛାତ୍ରୀଙ୍କୁ ଆସନ୍ତା ସାମ୍ବତ୍ସରିକ ଉତ୍ସବରେ ମହାବିଦ୍ୟାଳୟର ସ୍ୱର୍ଣ୍ଣପଦକ ମିଳିବ । ଏହି ଅବସରରେ କୃତି ଛାତ୍ରଛାତ୍ରୀଙ୍କୁ ଅତିଥିମାନେ ପୁଷ୍ପଗୁଚ୍ଛ ଦେଇ ସମ୍ମାନୀତ କରିଥିଲେ ।
କାର୍ଯ୍ୟକ୍ରମରେ ଅତିଥି ଭାବେ ବିଧାୟକ ତଥା କଲେଜ ପରିଚାଳନା ସମିତି ଅଧ୍ୟକ୍ଷ ଜ୍ୟୋତିରିନ୍ଦ୍ର ନାଥ ମିତ୍ର, ପ୍ରାକ୍ତନ କୁଳପତି ମେଜର କ୍ଷୀରୋଦ ପ୍ରସାଦ ମହାନ୍ତି ଯୋଗ ଦେଇଥିଲେ । ଅନ୍ୟମାନଙ୍କ ମଧ୍ୟରେ ମହାବିଦ୍ୟାଳୟର ଅଧ୍ୟାପକ, ଅଧ୍ୟାପିକା, କର୍ମଚାରୀ ଓ ଛାତ୍ରଛାତ୍ରୀ ଉପସ୍ଥିତ ଥିଲେ ।