ଜଗତସିଂହପୁର ସହରରେ ଛନକା: ସନ୍ ହସ୍ପିଟାଲ-କ୍ଲିନିକ୍କୁ ସିଲ୍ କଲା ପ୍ରଶାସନ
ଡାକ୍ତରଙ୍କୁ ଦେଖାଇବାକୁ ଆସିଥିବା ରୋଗୀଙ୍କ ଠାରୁ ବାହାରିଲା କରୋନା, ୧୦ କର୍ମଚାରୀଙ୍କୁ ବଡ଼ବାଗ କ୍ୱାରେଣ୍ଟିନ୍କୁ ସ୍ଥାନାନ୍ତର
ଜଗତସିଂହପୁର ଟାଉନ୍: ଜଗତସିଂହପୁର ଜିଲ୍ଲା ମୁଖ୍ୟ ଚିକିତ୍ସାଳୟ ନିକଟରେ ଥିବା ସନ୍ ହସ୍ପିଟାଲ-କ୍ଲିନିକ୍କୁ ଆଜି ସନ୍ଧ୍ୟାରେ ସିଲ୍ କରିଛି ପ୍ରଶାସନ । ସମ୍ପୂର୍ଣ୍ଣ ଅଂଚଳକୁ ସାନିଟାଇଜ୍ କରାଯାଇଛି । ତେବେ ଆଜି ସନ୍ ହସ୍ପିଟାଲ-କ୍ଲିନିକ୍କୁ ଆସିଥିବା ଜଣେ ରୋଗୀ କରୋନା ପଜିଟିଭ୍ ଚିହ୍ନଟ ପରେ ଏଭଳି ପଦକ୍ଷେପ ନିଆଯାଇଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ ରଘୁନାଥପୁର ବ୍ଳକ୍ ପୁରୁଣାବସନ୍ତ ପଂଚାୟତର ପୂର୍ବତନ ସରପଂଚଙ୍କ ଦେହ ଖରାପ ହେବାରୁ ସେ ଆଜି ଜଗତସିଂହପୁର ସନ୍ ହସ୍ପିଟାଲ-କ୍ଲିନିକ୍କୁ ଚିକିତ୍ସା ପାଇଁ ଆସିଥିଲେ । ସେଠାରେ ଟିକେଟ୍ କରି ଡ. ହିମାଂଶୁ ନନ୍ଦଙ୍କୁ ଦେଖାଇଥିଲେ । ହେଲେ କରୋନା ଲକ୍ଷଣ ଥିବାରୁ ଡ.ନନ୍ଦ ତୁରନ୍ତ ଜଗତସିଂହପୁର ମୁଖ୍ୟ ଚିକିତ୍ସାଳୟକୁ ପଠାଇ ଦେଇଥିଲେ । ଏହାପରେ ମେଡିକାଲ ସମେତ ସ୍ଥାନୀୟ ଅଂଚଳରେ ଭୟର ବାତାବରଣ ସୃଷ୍ଟି ହୋଇଛି । ପ୍ରଶାସନ ତୁରନ୍ତ ସନ୍ ହସ୍ପିଟାଲ, ସନ୍ କ୍ଲିନିକ୍, ସନ୍ ମେଡିସିନ୍ ଷ୍ଟୋର ଏବଂ ସନ୍ ଡାଇଗ୍ନୋଷ୍ଟିକ୍ ସହ ସମ୍ପୂର୍ଣ୍ଣ ଅଂଚଳକୁ ସାନିଟାଇଜ୍ କରିବା ପରେ ସିଲ୍ କରାଯାଇଛି । ଜଗତସିଂହପୁର ପୌର ନିର୍ବାହୀ ଅଧିକାରୀ ବିମଳ କୁମାର ଲେଙ୍କା, ଜଗତସିଂହପୁର ଥାନା ଅଧିକାରୀ ରଜନୀକାନ୍ତ ମିଶ୍ର ଉପସ୍ଥିତ ରହି ସିଧାସଳଖ ଯୋଗାଯୋଗରେ ଆସିଥିବା ୧୦ ଜଣଙ୍କୁ ବଡ଼ବାଗ କ୍ୱାରେଣ୍ଟିନ୍ ସେଣ୍ଟରକୁ ନିଆଯାଇଛି । ୪ ଜଣଙ୍କୁ ହୋମ୍ କ୍ୱାରେଣ୍ଟିନ୍ ଏବଂ ଚିକିତ୍ସା କରିଥିବା ଡାକ୍ତରଙ୍କୁ ହୋମ୍ କ୍ୱାରେଣ୍ଟିନ୍ ରେ ରହିବାକୁ ନିର୍ଦ୍ଦେଶ ଦିଆଯାଇଛି । ସବୁଠାରୁ ବଡ଼ କଥା ହେଉଛି ଜିଲ୍ଲା ମୁଖ୍ୟ ଚିକିତ୍ସାଳୟର ଅଧିକାଂଶ ଡାକ୍ତର ଏଠାରେ ଆସି ରୋଗୀ ଦେଖିଥାନ୍ତି । ତେବେ ଆଜି ଯେଉଁମାନେ ଆସି ଏଠାରେ ଦେଖିବା ପରେ ପୁଣି ଡାକ୍ତରଖାନାରେ ରୋଗୀ ଦେଖିଛନ୍ତି ତାକୁ ନେଇ ମଧ୍ୟ ଚିନ୍ତା ବଢ଼ି ଯାଇଛି ।