ପୁରୀ: ଆଜି ସକାଳେ ସ୍ଥାନୀୟ ବ୍ଲୁ ଫ୍ଲଗ ବିଚରେ ସମୁଦ୍ର ବେଳାଭୂମିର ମନୋରମ ପରିବେଶରେ ଅନୁଷ୍ଠିତ ହୋଇଯାଇଛି ସଚେତନତା ଧର୍ମୀ ଅଭିଯାନ ‘ମୋ ଧାମ ମୋ ଗର୍ବ’ର ଉଦଯାପନୀ ଉତ୍ସବ I ଏଥିରେ ଗୃହ ଓ ନଗର ଉନ୍ନୟନ ବିଭାଗ ମନ୍ତ୍ରୀ ପ୍ରତାପ ଜେନା ମୁଖ୍ୟଅତିଥି ଭାବେ ଯୋଗ ଦେଇ ପୁରୀକୁ ବିଶ୍ୱର ଏକ ସର୍ବଶ୍ରେଷ୍ଠ ଧାମରେ ପରିଣତ କରିବା ପାଇଁ ଜିଲ୍ଲା ପ୍ରଶାସନ , ପୁରୀ ପୌରପାଳିକା ଏବଂ ସମାଜର ସମସ୍ତ ବର୍ଗର ଲୋକଙ୍କ ପ୍ରୟାସକୁ ସାଧୁବାଦ ଦେଇଥିଲେ। ଓଡ଼ିଶା ସରକାର ଏଥିରେ ସମସ୍ତ ସହଯୋଗ ପ୍ରଦାନ କରିଆସିଛନ୍ତି ଓ ଭବିଷ୍ୟତରେ କରିବେ ବୋଲି ପ୍ରତିଶ୍ରୁତି ଦେଇଥିଲେ I
Sambad is now on WhatsApp
Join and get latest news updates delivered to you via WhatsApp
ପୁରୀ ବିଧାୟକ ଜୟନ୍ତ ଷଡ଼ଙ୍ଗୀ ସମ୍ମାନିତ ଅତିଥି ଭାବରେ ଯୋଗଦେଇ ଏହି ଅଭିଯାନ ଦ୍ୱାରା ସାଧାରଣ ଲୋକଙ୍କ ମଧ୍ୟରେ ସ୍ୱଚ୍ଛତା ସମ୍ବନ୍ଧରେ ଅସାଧାରଣ ସଚେତନତା ସୃଷ୍ଟି ହୋଇଥିବା ସେ ଲକ୍ଷ୍ୟ କରିଛନ୍ତି ବୋଲି କହିଥିଲେ I ପୁରୀ ଜିଲ୍ଲାପାଳ ବଲୱନ୍ତ ସିଂ ପ୍ରାରମ୍ଭିକ ଅଭିଭାଷଣ ପ୍ରଦାନ କରି ଏହି ଅଭିଯାନର ଦୂରଗାମୀ ଲକ୍ଷ୍ୟ ସମ୍ବନ୍ଧରେ ସୂଚନା ପ୍ରଦାନ କରିବା ସହ ସ୍ୱାସ୍ଥ୍ୟ , ସ୍ୱଚ୍ଛତା ଏବଂ ପବିତ୍ରତା କିପରି ପୁରୀ ସହରକୁ ଏକ ଶ୍ରେଷ୍ଠ ସହର ଏବଂ ପୃଥିବୀର ଏକ ଅନ୍ୟତମ ବିଶିଷ୍ଟ ଧାମରେ ପରିଣତ କରିବ ତାହା ପ୍ରକାଶ କରିଥିଲେ I ପୁରୀ ପୌରପାଳିକା ଏକଜିକ୍ୟୁଟିଭ୍ ଅଫିସର ବିଜୟ କୁମାର ଦାଶ ଧନ୍ୟବାଦ ଅର୍ପଣ କରିଥିଲେ ଏବଂ ଅତିରିକ୍ତ ନିର୍ବାହୀ ଅଧିକାରୀ ସରୋଜ ସ୍ୱାଇଁ କାର୍ଯ୍ୟକ୍ରମ ସଂଯୋଜନା କରିଥିଲେ I
ଏହି ଅବସରରେ ପୁଲିସ ବ୍ୟାଣ୍ଡ ତରଫରୁ ପ୍ରାରମ୍ଭରେ ଜାତୀୟ ସଂଗୀତ ଏବଂ ଶେଷରେ ବନ୍ଦେ ଉତ୍କଳ ଜନନୀ ପରିବେଷଣ କରାଯାଇଥିଲା I ସ୍ୱଚ୍ଛତା ଯାନରେ ଧଳା ବୋର୍ଡରେ ସାହି ସାହି ବୁଲି ସମସ୍ତ ବାସିନ୍ଦାଙ୍କ ଠାରୁ ନିଆ ଯାଇଥିବା ଶପଥ ଦସ୍ତଖତକୁ ପୃଷ୍ଠଭୂମିରେ ରଖି ସ୍ୱଚ୍ଛସାଥୀମାନେ ଏବଂ ଉପସ୍ଥିତ ସମସ୍ତେ ପୁରୀକୁ ସ୍ଵଚ୍ଛ ରଖିବା ପାଇଁ ଶପଥ ନେଇଥିଲେ I ମନ୍ତ୍ରୀ ଶ୍ରୀ ଜେନା ଏହି ଶପଥ ପାଠ କରାଇଥିଲେ I