ହାତୀ କଙ୍କାଳ ଉଦ୍ଧାର ଘଟଣାରେ ରେଞ୍ଜର ନିଲମ୍ବିତ

କଟକ: ଆଠଗଡ଼ ବନଖଣ୍ଡର ନରସିଂହପୁର ମାଟି ତଳୁ ଗାତ ଖୋଳି ଏସ୍‌ଟିଏଫ୍‌ର ହାତୀ କଙ୍କାଳ ଜବତ୍‌ ଘଟଣାରେ ଶେଷରେ ମାସକ ପରେ ଖସିଯିବାକୁ ବସିଥିବା ରେଞ୍ଜର ଅଶୋକ ବେହେରାଙ୍କୁ ନିଲମ୍ବନ କରିଛି ବନବିଭାଗ। ଘଟଣା ପରେ ପରେ ସପ୍ତାହକ ଭିତରେ ବିଭାଗ କେବଳ ଫରେଷ୍ଟର ଓ ଗାର୍ଡଙ୍କୁ ନିଲମ୍ବନ କରି ବନବିଭାଗ ତାର ଦାୟିତ୍ବ ସାରି ଦେଇଥିବାବେଳେ ଖସିଯିବାକୁ ବସିଥିବାବେଳେ ନରସିଂହପୁର ପଶ୍ଚିମାଞ୍ଚଳର ତତ୍କାଳୀନ ରେଞ୍ଜର ତଥା ବର୍ତ୍ତମାନ ଚନ୍ଦକା ରେଞ୍ଜ ଦାୟିତ୍ବରେ ଥିବା ଶ୍ରୀ ବେହେରାଙ୍କୁ ଆଜି ନିଲମ୍ବନ କରାଯାଇଥିବା ନେଇ ଡିଏଫ୍‌ଓ ସୂଚନା ଦେଇଛନ୍ତି।

ହାତୀ ଶିକାର ଘଟଣାକୁ ନେଇ ଏସ୍‌ଟିଏଫ୍‌ ଖୋଳତାଡ଼ ଘଟଣାରେ ପୂର୍ବରୁ ବନବିଭାଗ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଘଟଣାର ତଦନ୍ତ କରାଯାଇ ଦାୟିତ୍ବରେ ଥିବା ଫରେଷ୍ଟର୍‌ ବିବେକାନନ୍ଦ ଜାନି ଓ ଗାର୍ଡ ସୁନାୟକ ମାଝୀଙ୍କୁ ନିଲମ୍ବିତ କରାଯାଇଥିବା ବେଳେ ତତ୍କାଳୀନ ରେଞ୍ଜର୍‌ ଅଶୋକ ବେହେରାଙ୍କୁ କାରଣଦର୍ଶାଅ ନୋଟିସ୍‌ ଜାରି କରାଯାଇଥିଲା। ତେବେ ଏହି ଘଟଣା ଦୁଇବର୍ଷ ତଳର ବୋଲି ବନବିଭାଗ କହିଥିଲା।

ସୂଚନାଯୋଗ୍ୟ, ନରସିଂହପୁର ପଶ୍ଚିମାଞ୍ଚଳ ରେଞ୍ଜରେ ହାତୀ ଶିକାର କରି ଦାନ୍ତ କାଟିନେବା ସହ ଗାତ ଖୋଳି ପୋତି ଦିଆଯାଇଥିଲା। ଏ ନେଇ ଭିଡିଓ ଭାଇରାଲ୍‌ ହେବା ପରେ ଗତମାସ ୭ତାରିଖ ଦିନ ଭୁବନେଶ୍ବରରୁ ଏସ୍‌ଟିଏଫ୍‌ ଟିମ୍‌ ନରସିଂହପୁରରେ ପହଞ୍ଚି ତଦନ୍ତ ଆରମ୍ଭ କରିଥିଲେ। ତଦନ୍ତ ସମୟରେ ବନକର୍ମଚାରୀମାନଙ୍କ ପକ୍ଷରୁ ଟିମ୍‌କୁ ବିରୋଧ ମଧ୍ୟ କରାଯାଇଥିଲା। ତେବେ ଏସ୍‌ଟିଏଫ୍‌ ଟିମ୍‌ ବାରସିଙ୍ଗା ସେକ୍ସନ୍‌ର ବାଲିକିଆରି କମ୍ପାର୍ଟମେଣ୍ଟ୍‌ ୧୧ରୁ ମାଟି ଖୋଳି ଦନ୍ତାହାତୀର କଙ୍କାଳ ଗତକାଲି ଜବତ୍‌ କରିଥିଲା। ହାତୀ ଦାନ୍ତ କାଟି ନିଆଯିବା, ମୃତଦେହକୁ ନଷ୍ଟ କରିବା ପାଇଁ ପୋତିବା ସ୍ଥାନରେ ପୋଡ଼ି ଦିଆଯାଇଥିବା ପ୍ରାଥମିକ ତଦନ୍ତରୁ ଜଣାପଡିଥିଲା। ଦନ୍ତାହାତୀର ବୟସ ୧୦ ବର୍ଷରୁ କମ୍‌ ହେବ କୁହାଯାଉଛି। ମାଟିତଳୁ ଏସ୍‌ଟିଏଫ୍‌ ଜବତ୍‌ କରିଥିବା ହାତୀ କଙ୍କାଳର ବ୍ୟବଚ୍ଛେଦ ପରେ ଓୟୁଏଟିରୁ ଯାଇଥିବା ବିଶେଷଜ୍ଞ ତଥା ସାଇଣ୍ଟିଫିକ୍‌ ଟିମ୍‌ ଏଭଳି ଅନେକ ତଥ୍ୟକୁ ନେଇ ସନ୍ଦେହ ପ୍ରକଟ କରିଛନ୍ତି। ତେବେ, ହାତୀକୁ କେମିତି ମରାଯାଇଛି, ନା ତାର ମୃତ୍ୟୁ ହୋଇଛି, ଏହା କେତେଦିନ ତଳର ଘଟଣା, ପୋଡ଼ିବା ପାଇଁ କେଉଁପ୍ରକାର କେମିକାଲ ବ୍ୟବହୃତ ହୋଇଛି, ଏସବୁ ଜାଣିବା ପାଇଁ ଜବତ ହାଡ଼କୁ ଓୟୁଏଟିର ସେଣ୍ଟର୍‌ ଫର୍ ୱାଇଲ୍ଡଲାଇଫ୍ ହେଲ୍‌ଥକୁ ପଠାଯାଇଥିଲା। ନ‌

ସମ୍ବନ୍ଧିତ ଖବର