ଭୁବନେଶ୍ବର : ରାୟଗଡ଼ା ଜିଲ୍ଲା କାଶୀପୁରରେ କଲେରା ବା ହଇଜା ସଂକ୍ରମଣ ଚିହ୍ନଟ ହୋଇଛି ବୋଲି ସ୍ବଷ୍ଟ କରିଛନ୍ତି ଜନସ୍ବାସ୍ଥ୍ୟ ନିର୍ଦ୍ଦେଶକ ଡାକ୍ତର ନିରଞ୍ଜନ ମିଶ୍ର। ସେ ଗଣମାଧ୍ୟମରେ ତାଙ୍କର ବୟାନ ଦେଇ କହିଛନ୍ତି, କାଶୀପୁରରେ ପାଣି ସଂକ୍ରମଣ ହେତୁ କଲେରା ହୋଇଥିବା ଜଣାପଡିଛି । ପରୀକ୍ଷାରୁ କଲେରା କରାଉଥିବା ଭିବ୍ରିଓ କଲେରା ବ୍ୟାକ୍ଟେରିଆ ମିଳିଛି । ରୋଗୀଙ୍କ ରେକ୍ଟାଲ ସ୍ୱାବରୁ ମଧ୍ୟ କଲେରା ବ୍ୟାକ୍ଟେରିଆ ମିଳିଛି । ପରୀକ୍ଷା ଲାଗି ମୋଟ ୧୪ଟି ରେକ୍ଟଲ ସ୍ୱାବ ଓ ବିଭିନ୍ନ ଜାଗାରୁ ୭-୮ଟି ଜଳ ଉତ୍ସରୁ ପାଣିର ନମୁନା ନିଆଯାଇଥିଲା । ୩ଟି ପାଣି ନମୁନା ଏବଂ ୭ଟି ରେକ୍ଟାଲ ସ୍ୱାବ ନମୁନାରୁ କଲେରା ବ୍ୟାକ୍ଟେରିଆ ମିଳିଛି ।
Sambad is now on WhatsApp
Join and get latest news updates delivered to you via WhatsApp
ଏଥିସହ ସେ ଆହୁରି ମଧ୍ୟ କହିଛନ୍ତି ଯେ କାଶୀପୁର ବ୍ଲକର ଟିକରି ପଞ୍ଚାୟତର ୩ଟି ଗାଁରେ ୧୨ ତାରିଖରୁ ଝାଡ଼ାବାନ୍ତି ହୋଇଥିଲା । ବର୍ତ୍ତମାନ ସୁଦ୍ଧା ଏଥିରେ ୯୬ ଜଣ ଆକ୍ରାନ୍ତ ହୋଇଛନ୍ତି । ୭ ଜଣଙ୍କର ମୃତ୍ୟୁ ହୋଇଛି । ସ୍ଥିତି ନିୟନ୍ତ୍ରଣ ଲାଗି ଆବଶ୍ୟକୀୟ ପଦକ୍ଷେପ ନିଆଯାଉଛି । ସ୍ୱାସ୍ଥ୍ୟକର୍ମୀ, ଆଶା କର୍ମୀ ଘର ଘର ବୁଲୁଛନ୍ତି । ମେଡିକାଲ ଟିମ ମୁତୟନ ହୋଇଛି । ଉତ୍କଳ ଆଲୁମିନା ହସ୍ପିଟାଲରେ ୫୦ ବେଡ଼ର ସ୍ବତନ୍ତ୍ର ଡାଇରିଆ ୱାର୍ଡ ଖୋଲାଯାଇଛି । ସେଠାରେ ୪ ଜଣ ଡାକ୍ତର ନିୟୋଜିତ ହୋଇଛନ୍ତି । ରାୟଗଡାର ମେଡ଼ିସିନ ସ୍ପେସାଲିଷ୍ଟଙ୍କ ତତ୍ତ୍ବାବଧାନରେ ଚିକିତ୍ସା ଚାଲିଛି । ଭୁବନେଶ୍ୱରର ଏକ ଟିମ ଯାଇ କିଭଳି ଏହା ନବ୍ୟାପିବ ତା’ ଉପରେ କାର୍ଯ୍ୟ କରୁଛନ୍ତି । ପାଣି ଟ୍ୟାଙ୍କରରେ ଯୋଗାଇ ଦିଆଯାଉଛି । ଦୂଷିତ ପାଣି ପିଇବା ବନ୍ଦ କରାଯାଇଛି । ନାଳ ପାଣି ବ୍ୟବହାର ନ କରିବାକୁ ଜିଲ୍ଲା ପ୍ରଶାସନ ପକ୍ଷରୁ କଡ଼ା ନିର୍ଦ୍ଦେଶ ହୋଇଛି । ଲୋକଙ୍କୁ ସଚେତନ କରାଯାଉଛି । ଖାଦ୍ୟ ଓ ପାଣି ଯତ୍ନ ସହ ହାତ ଧୋଇବା ଓ ପରିମଳ ଦ୍ୱାରା ଏହାକୁ ରୋକାଯାଇପାରିବ।’
ଆପଣ ଜାଣନ୍ତି କି ଭିବ୍ରିଓ କଲେରା କ’ଣ?
ଭିବ୍ରିଓ କଲେରା ଏକ ବ୍ୟାକ୍ଟେରିଆ । ଏହା ଦ୍ବାରା ବାନ୍ତି, ତରଳ ଝାଡ଼ା ସହ ପେଟ ଦରଜ ମଧ୍ୟ ହୁଏ । ସବୁ ବ୍ୟାକ୍ଟେରିଆଠାରୁ ଏହି ବ୍ୟାକ୍ଟେରିଆ ଟିକେ ଅଲଗା । ସାଧାରଣତଃ ଏହା ଏକ ଟକସିନ ରିଲିଜ କରେ ଯାହା ପେଟରେ ଯାଇ ସଂକ୍ରମଣ କରାଇଥାଏ। ଏହି ବ୍ୟାକ୍ଟେରିଆଟି ପାଣିରେ ରହିଥାଏ। ଦୂଷିତ ପାଣି ପିଇଲେ ବା ଦୂଷିତ ପାଣିରେ ରନ୍ଧା ହୋଇଥିବା ଖାଦ୍ୟ ଖାଇଲେ ଏହି ରୋଗ ହୋଇଥାଏ । ସମୁଦ୍ର ପାଣି ଓ ସମୁଦ୍ରରେ ଥିବା ଜୀବ ଯେମିତିକି ଶାମୁକା ଆଦି ଦେହରେ ଟକ୍ସିନ୍ ଲାଗିଥାଏ। ପାଣିକୁ ନ ଫୁଟେଇ ସିଧା ପିଇଲେ ବା ସିଧାସଳଖ କଞ୍ଚା ଖାଦ୍ୟ ଖାଇଲେ ବା ସି ଫୁଡ୍ ଖାଇଲେ ରୋଗ ହେବାର ଆଶଙ୍କା ଅଧିକା ରହିଛି । ଏହି ରୋଗରେ ମୃତ୍ୟୁ ହେବାର ମୁଖ୍ୟ କାରଣ ଡ଼ିହାଇଡ୍ରେସନ। ଚାଉଳ ଧୁଆ ପାଣି ପରି ଦେହରୁ ଲିକୁଇଡ ଲସ ହୋଇଥାଏ। ଏହାକୁ ରାଇସ ୱାଟର ଡାଇରିଆ ବୋଲି କୁହାଯାଏ।