ଖୋର୍ଦ୍ଧା/ବେଗୁନିଆ: ଗତକାଲି ବେଗୁନିଆ ନୂଆସାହିରେ ଘଟିଥିବା ଗୁଳିକାଣ୍ଡ ଘଟଣାରେ ବେଗୁନିଆ ପୁଲିସ ଜଣେ ଅବସରପ୍ରାପ୍ତ ସେନା କର୍ମଚାରୀଙ୍କୁ ଗିରଫ କରିଛି । ତାଙ୍କ ନିକଟରୁ ଆକ୍ରମଣରେ ବ୍ୟବହୃତ ବନ୍ଧୁକ ଓ ଗୁଳି ଜବତ କରିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନାନୁସାରେ, ଗତକାଲି ଅପରାହ୍ଣ ପ୍ରାୟ ସାଢ଼େ ୧୨ଟା ବେଳେ କୌଣି କାରଣରୁ ଗଣ୍ଡଗୋଳ ଘଟି ଗୁଳିମାଡ଼ରେ ବିଭୂତିଭୂଷଣ ଜେନା ଗୁରୁତର ଆହତ ହୋଇଥିଲେ । ଏନେଇ ବେଗୁନିଆରେ ଚାଂଚଲ୍ୟ ଖେଳିଯାଇଥିଲା । ସୂଚନା ପାଇ ପୁଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା । ଘଟଣାର ସମ୍ବେଦନଶୀଳତାକୁ ଦୃଷ୍ଟିରେ ରଖି ଆରକ୍ଷୀ ଅଧୀକ୍ଷକ ରାଜକିଶୋର ଦୋରାଙ୍କ ନିର୍ଦ୍ଦେଶରେ ଏସ୍ଡିପିଓ ସୁଶୀଲ ମିଶ୍ରଙ୍କ ତତ୍ୱାବଧାନରେ ଦୁଇଟି ଟିମ୍ ଅଭିଯୁକ୍ତଙ୍କୁ ଧରିବାକୁ ବିଭିନ୍ନ ସ୍ଥାନରେ ଚଢ଼ଉ କରିଥିଲେ । କେବଳ ଏହାନୁହେଁ ଖୋଦ୍ ଏସ୍ପି ନିଜ ଖର୍ଚ୍ଚରେ ଆହତଙ୍କୁ ଚିକିତ୍ସା ପାଇଁ ଭୁବନେଶ୍ୱର ପଠାଇଥିଲେ । ଅପରପକ୍ଷରେ, ମାତ୍ର ୨ ଘଂଟା ମଧ୍ୟରେ ପୁଲିସ ଅଭିଯୁକ୍ତ ପ୍ରସନ୍ନ ନାୟକଙ୍କୁ ଜଟଣୀରୁ ଗିରଫ କରିଥିଲା ।
ପୁଲିସ ପକ୍ଷରୁ ଏନେଇ ଦିଆଯାଇଥିବା ସୂଚନାରେ, ପୁରୀ ଅସ୍ତରଙ୍ଗ ନିକଟ ମଧୂପୁର ଗାଁର ପ୍ରସନ୍ନ ନାୟକ(୫୮)ଙ୍କ ସହ ବେଗୁନିଆ ନୂଆସାହିରେ ରହୁଥିବା ଆଦିତ୍ୟପ୍ରସାଦ ରଥ ଓ ବିଦ୍ୟୁତପ୍ରଭା ରଥ ମଧ୍ୟରେ ଟଙ୍କା ନେଣଦେଣକୁ କେନ୍ଦ୍ର କରି ବିବାଦ ରହିଥିଲା । ଏହାକୁ ନେଇ ଗତକାଲି ପ୍ରସନ୍ନ ବିଦ୍ୟୁତ୍ପ୍ରଭାଙ୍କ ଘରକୁ ଯାଇ ଗଣ୍ଡଗୋଳ କରିଥିଲେ । ଏହି ସମୟରେ ବିଦ୍ୟୁତପ୍ରଭାଙ୍କ ଜଣେ ଦୂରସମ୍ପର୍କୀୟ ବିଭୂତିଭୂଷଣ ଜେନା ସେଠାରେ ପହଂଚି ବିଦ୍ୟୁତପ୍ରଭାଙ୍କ ପକ୍ଷ ନେଇଥିଲେ । ଏଥିରେ ଉତ୍କ୍ଷୀପ୍ତ ହୋଇ ପ୍ରସନ୍ନ ନିଜର ବନ୍ଧୁକରେ ଗୋଟିଏ ରାଉଣ୍ଡ ଗୁଳି ଚଳାଇଥିଲେ । ଗୁଳିଟି ବିଭୂତିଙ୍କ ପେଟରେ ବାଜିଥିଲା । ଏନେଇ ସୂଚନା ପାଇଁ ପୁଲିସ ପହଂଚିବା ବେଳକୁ ପ୍ରସନ୍ନ ଘଟଣାସ୍ଥଳରୁ ନିଜ ମୋଟର ସାଇକଲରେ ସେଠାରୁ ଚାଲିଯାଇଥିଲେ । ଏନେଇ ପୁଲିସ ଆଦିତ୍ୟ ପ୍ରସାଦ ରଥଙ୍କ ଅଭିଯୋଗକ୍ରମେ ବେଗୁନିଆ ଥାନାରେ ଦଫା ୪୫୨/୩୦୭/୨୯୪ ଓ ଅସ୍ତ୍ରଶସ୍ତ୍ର ଆଇନ ୨୫ ଓ ୨୭ ଦଫାରେ ୨୦୪/୨୦୨୧ରେ ମାମଲା ରୁଜୁ କରିଥିଲା ।
ଏନେଇ ଏସ୍ପି ଶ୍ରୀ ଦୋରା କହିଛନ୍ତି ଯେ ପ୍ରସନ୍ନ ନାୟକ ନିକଟରେ ସେନାବାହିନୀରୁ ସୁବେଦାର ମେଜର ଭାବେ ଅବସର ଗ୍ରହଣ କରିଛନ୍ତି ଓ ବର୍ତମାନ ଆଇଆଇଟି ଅରୁଗୁଳରେ ସୁରକ୍ଷାକର୍ମୀ ଭାବେ କାର୍ଯ୍ୟ କରୁଛନ୍ତି । ଟଙ୍କା ନେଣଦେଣକୁ ନେଇ ବିଦ୍ୟୁତପ୍ରଭା ଓ ତାଙ୍କ ମଧ୍ୟରେ ବିବାଦ ରହିଥିଲା । ଗୁଳିମାଡ଼ ପରେ ପ୍ରସନ୍ନ ନିଜର ମୋଟର ସାଇକଲରେ ଜଟଣୀ ଫେରିଯାଇଥିଲେ । ପୁଲିସ ସେଠାରେ ପହଂଚି ତାଙ୍କୁ ଗିରଫ କରିବା ସହ ତାଙ୍କ ନିକଟରୁ ପଏଂଟ୍ ୨୨ କାଲିବରର ଏକ ରିଭଲଭର, ୪୩ ରାଉଣ୍ଡ ଅଫୁଟା ଗୁଳି ଜବତ କରିଛି । ତାଙ୍କ ବନ୍ଧୁକ ଲାଇସେନ୍ନସକୁ ରଦ୍ଦ କରାଯାଇଛି । ଗତକାଲି ଗିରଫ ପରେ ଡାକ୍ତରୀ ପରୀକ୍ଷା ପରେ ଆଜି କୋର୍ଟ ଚାଲାଣ କରାଯାଇଛି ।