ଖୋର୍ଦ୍ଧା : ପ୍ରଶାସନ ଧାନ ମଣ୍ଡି ବିଳମ୍ବରେ ଆରମ୍ଭ କରି ଅଭାବି ବିକ୍ରିକୁ ପ୍ରୋତ୍ସାହନ ଦେଉଥିବା ଓ ମଣ୍ଡିରେ ଧାନ ମାନ ନିର୍ଦ୍ଧାରଣ କରିବାରେ ବ୍ୟାପକ ଜାଲିଆତି ହେଉଥିବା ଅଭିଯୋଗ କରି ଭାରତୀୟ କିଷାନ ସଂଘ ଖୋର୍ଦ୍ଧା ଜିଲ୍ଲା ଶାଖା ପକ୍ଷରୁ ଆଜି ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିବା ସହ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ସ୍ମାରକପତ୍ର ଦିଆଯାଇଛି ।
Sambad is now on WhatsApp
Join and get latest news updates delivered to you via WhatsApp
ଆଜି ସଂଘର କର୍ମକର୍ତାମାନେ ଜିଲ୍ଲାପାଳଙ୍କ କାର୍ଯ୍ୟାଳୟରେ ପହଂଚି ଧାନମଣ୍ଡିରେ ଜାଲିଆତି ବିରୋଧରେ ପ୍ରଦର୍ଶନ କରିବା ସହ ୧୪ ଦଫା ଦାବି ସମ୍ବଳିତ ଏକ ଦାବିପତ୍ର ପ୍ରଦାନ କରିଥିଲେ । ସଂଘର ସଭାପତି ବୈକୁଣ୍ଠ ନାଥ ମହାପାତ୍ର କହିଛନ୍ତି ଯେ ଜାଲିଆତି ରୋକିବା ପାଇଁ ପ୍ରତ୍ୟେକ ମଣ୍ଡିରେ ସିସି କ୍ୟାମେରା ସ୍ଥାପନ କରାଯିବା ଆବଶ୍ୟକ । ସେହିଭଳି ପିଏସି ଓ ଆରଏମସିଏସ ଦଲାଲ ଓ ମିଲର୍ସରଙ୍କ ଉପସ୍ଥିତିକୁ ବନ୍ଦ କରାଯାଉ, ଚାଷୀଙ୍କ ଧାନ ବିକ୍ରି କରିବା ଉପରେ ପ୍ରତିବନ୍ଧକ ହଟାଯାଉ, ଧାନ ଓହ୍ଲାଇବା ଓ ଉଠାଇବା ବାବଦକୁ ଚାଷୀଙ୍କ ଠାରୁ ଅର୍ଥ ଆଦାୟ ବନ୍ଦ କରିବା, ମଣ୍ଡିରେ ଉଚ୍ଚମାନର ଯନ୍ତ୍ର ସ୍ଥାପନ ସହ ପଦସ୍ଥ ସରକାରୀ ଅଧିକାରୀଙ୍କ ଦ୍ୱାରା ନିୟମିତ ଯାଂଚ କରାଯାଉ, ମଣ୍ଡିରେ ଚାଷୀଙ୍କ ରହିବା, ରାତ୍ରୀଯାପନ ପାଇଁ ବ୍ୟବସ୍ଥା କରାଯାଉ ଆଦି ଦାବି ରହିଛି । ଏନେଇ ସେମାନେ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ସ୍ମାରକପତ୍ର ଅତିରିକ୍ତ ଜିଲ୍ଲାପାଳଙ୍କୁ ପ୍ରଦାନ କରିଛନ୍ତି ।
ଆଜିର କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ସମ୍ପାଦକ ଗଗନ ପ୍ରତିହାରୀ, ସମରେନ୍ଦ୍ର ଶତପଥି, ପବିତ୍ର ମୋହନ ରାଜଗୁରୁ, ରବୀନ୍ଦ୍ର ନାଥ ସାମନ୍ତରାୟ, ବିଭୂଦେନ୍ଦ୍ର ବିଦ୍ୟାଧର, ରଶ୍ମୀ ରଂଜନ ମହାପାତ୍ର ଆଦି ସଦସ୍ୟ ଓ ଚାଷୀ ଯୋଗ ଦେଇଥିଲେ ।