ସମ୍ବଲପୁର: ଭୁଲ କଲେଜର କିନ୍ତୁ କ୍ଷତିରେ ରହିବେ ବିଦ୍ୟାର୍ଥୀ। ଭୁଲ ଏତେ ବଡ଼ ଯେ ଯୋଗ୍ୟ ହୋଇ ମଧ୍ୟ ଇଚ୍ଛା ଥିବା ବଡ଼ କଲେଜର ଯୁକ୍ତ ତିନି ନାମଲେଖାରୁ ପାଠ ପଢାରୁ ବଞ୍ଚିତ ହୋଇ ପାରନ୍ତି ସମ୍ବଲପୁର ସ୍ଥିତ ଏନଏସସିବି କଲେଜର ୬୦ ବିଦ୍ୟାର୍ଥୀ। ସେମାନଙ୍କ ବୋର୍ଡ ପରୀକ୍ଷା ସହିତ ଇଣ୍ଟରନାଲ ପରୀକ୍ଷାର ନମ୍ବର ଯୋଡ଼ା ଯାଇଥିନବାରୁ ଏଭଳି ସ୍ଥିତି ଉତ୍ପନ୍ନ ହୋଇଛି। ଏହାକୁ ନେଇ ଆଜି ବିଦ୍ୟାର୍ଥୀମାନେ ଅଧ୍ୟକ୍ଷଙ୍କ କାର୍ଯ୍ୟାଳୟ ଘେରାଉ ସହିତ ପ୍ରବଳ ପାଟିତୁଣ୍ଡ କରିଥିଲେ।

Advertisment

 ସୂଚନା ଅନୁଯାୟୀ, ଯୁକ୍ତ ଦୁଇ ବୋର୍ଡର ସମୁଦାୟ ୬୦୦ ନମ୍ବର ସହିତ ଇଣ୍ଟରନାଲ ପରୀକ୍ଷା ୧୨୦ ନମ୍ବର ରହିଛି। ବୋର୍ଡ ପରୀକ୍ଷା ଫଳାଫଳ ସିଏଚଏସଇ ଦେଇଥାଏ। ଏହାପରେ କଲେଜ ପକ୍ଷରୁ ଇଣ୍ଟରନାଲ ପରୀକ୍ଷା ଫଳାଫଳ ଦିଆଯାଏ। ଉଭୟ ପରୀକ୍ଷା ଫଳାଫଳ ଯୋଡ଼ି ହୋଇଗଲେ ନମ୍ବର ବୃଦ୍ଧି ପାଏ। ସେହି ବର୍ଧିତ ନମ୍ବରକୁ ଆଧାର କରି ଯୁକ୍ତ ତିନି ନାମଲେଖା ପାଇଁ ସବୁ ବିଦ୍ୟାର୍ଥୀ ଆବେଦନ କରିଛନ୍ତି। ମାତ୍ର ଏନଏସସିବିର ଦ୍ବାଦଶ ଶ୍ରେଣୀର ୬୦ ବିଦ୍ୟାର୍ଥୀଙ୍କ ସହିତ କଲେଜହିଁ ଅନ୍ୟାୟ କରିଛି। ବୋର୍ଡ ନମ୍ବର ସହିତ ଇଣ୍ଟରନାଲ ନମ୍ବର ମିଶାଇ ମାର୍କ ତାଲିକା ଦିଆଯାଇ ନାହିଁ। ଏଥିରେ କଳାରେ ୨୩, ବାଣିଜ୍ୟରେ ୨୯ ଓ ବିଜ୍ଞାନରେ ୯ ଜଣ ବିଦ୍ୟାର୍ଥୀ ଅଛନ୍ତି ଯେଉଁମାନେ ୧୨୦  ଇଣ୍ଟରନାଲ ନମ୍ବରରୁ ବଞ୍ଚିତ ହୋଇଛନ୍ତି।

ମାର୍କସିଟ୍ ପାଇବାର ପ୍ରଥମ ଦିନରୁ ହିଁ ଏତେ ବଡ଼ ତ୍ରୁଟିକୁ ନେଇ ବିଦ୍ୟାର୍ଥୀମାନେ ଅଧ୍ୟକ୍ଷଙ୍କ ନିକଟରେ ଅଭିଯୋଗ କରିଥିଲେ। ସେତେବେଳେ ତ୍ରୁଟି ଯଥାଶୀଘ୍ର ସଂଶୋଧିତ କରି ଦିଆଯିବ ବୋଲି କଲେଜ ପକ୍ଷରୁ ଆଶ୍ବାସନା ଦିଆଯାଇଥିଲା। ବିଦ୍ୟାର୍ଥୀମାନେ କଲେଜକୁ ବିଶ୍ବାସ ମଧ୍ୟ କରିଥିଲେ। କିନ୍ତୁ ୨ ମାସ ପରେ ବି ଭୁଲ ସୁଧାରିବା ନେଇ କଲେଜ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଗଲା ନାହିଁ। ଫଳସ୍ବରୂପ ତୃତୀୟ ଚୟନ ପରେ ମଧ୍ୟ ଅନେକ ବିଦ୍ୟାର୍ଥୀଙ୍କ ନାମ ଆସିନାହିଁ। ଏହାକୁ ନେଇ ଅସନ୍ତୁଷ୍ଟ ବିଦ୍ୟାର୍ଥୀମାନେ କଲେଜ ଆସି ନିଜ ସହିତ ହୋଇଥିବା ଅନ୍ୟାୟର ପ୍ରତିବାଦ କରିଥିଲେ। କେବେ ମାର୍କସିଟ୍ ଠିକ କରିବେ ବୋଲି ପ୍ରଶ୍ନ କରିଥିଲେ। ଏ ଘଟଣାକୁ ନେଇ କଲେଜ ଅଧ୍ୟକ୍ଷ ଭୁଲକୁ ସ୍ବୀକାର କରିଛନ୍ତି। ଏହି ତ୍ରୁଟି ସମ୍ପର୍କରେ ବୋର୍ଡକୁ ଚିଠି ଜରିଆରେ ଅବଗତ କରିଥିବା କହିଛନ୍ତି।