ଖୋର୍ଦ୍ଧା : ଖୋର୍ଦ୍ଧା ଜିଲ୍ଲାରେ ଆଜି ଠାରୁ ସାନିଟାଇଜେସନ ଅଭିଯାନ ଆରମ୍ଭ ହୋଇଛି । ଜିଲ୍ଲାପାଳଙ୍କ କାର୍ଯ୍ୟାଳୟରେ ଅତିରିକ୍ତ ଜିଲ୍ଲାପାଳ ଓ ଜରୁରୀକାଳୀନ ଅଧିକାରୀଙ୍କ ଉପସ୍ଥିତିରେ ଏହାର ଶୁଭାରମ୍ଭ ହୋଇଛି ।
Sambad is now on WhatsApp
Join and get latest news updates delivered to you via WhatsApp
କାର୍ଯ୍ୟକ୍ରମ ହାତକୁ ନେଇ ଥିବା ଅନୁଷ୍ଠାନ ଅନ୍ୟନ୍ତ ଟେଲିକ୍ରୋନିକ୍ସ ପ୍ରାଇଭେଟ ଲିଃ(ଏଟିପିଏଲ୍)ର ଜ୍ୟୋତି ରଂଜନ ମହାପାତ୍ର କହିଛନ୍ତି ଯେ ଆଜି ଏହି କାର୍ଯ୍ୟକ୍ରମର ଶୁଭାରମ୍ଭ ହୋଇଛି । ଆସନ୍ତା କାଲି ଠାରୁ ଭୁବନେଶ୍ୱର ମହାନଗର ନିଗମରେ ଏହି କାର୍ଯ୍ୟ କରାଯିବ । ପ୍ରତି ୮ ମାସରେ ଥରେ ୩ଟି ପର୍ଯ୍ୟାୟରେ ଜିଲ୍ଲାର ସମସ୍ତ ସରକାରୀ କାର୍ଯ୍ୟାଳୟ ଓ ଘରର ଦାଣ୍ଡ ଏଭଳି ସାନିଟାଇଜ୍ କରାଯିବ । ଏହି କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ ହେଉଛି, ଲୋକଙ୍କ ମଧ୍ୟରେ କୋଭିଡ୍, ପରିଷ୍କାର ଓ ପରିଚ୍ଛନ୍ନତା ପ୍ରତି ସଚେତନତା ଓ ବେକାରୀ ଯୁବକଯୁବତୀଙ୍କୁ କର୍ମନିଯୁକ୍ତି । ପ୍ରଥମ ଦଫାରେ ୧୫ଜଣ ସ୍ୱେଚ୍ଛାସେବୀ ଏହି ସାନିଟାଇଜ୍ କାର୍ଯ୍ୟରେ ଯୋଗ ଦେଇଛନ୍ତି । ଆଗାମୀ ଦିନରେ ପୌରାଂଚଳ ଓ ବ୍ଲକ ୱାରୀ ସ୍ୱେଚ୍ଛାସେବୀଙ୍କୁ ନିଯୁକ୍ତି କରାଯାଇ ସେମାନଙ୍କୁ ଏହି କାମ ପାଇଁ କିଛି ପାରିଶ୍ରମିକ ଦେବାର ବ୍ୟବସ୍ଥା କରାଯାଇଛି ।
ଆଜି ପୂର୍ବାହ୍ଣ ପ୍ରାୟ ୧୧ଟାରେ ଏଟିପିଏଲର ସ୍ୱେଚ୍ଛାସେବୀମାନେ ଜିଲ୍ଲାପାଳଙ୍କ କାର୍ଯ୍ୟାଳୟକୁ ସଂପୂର୍ଣ୍ଣ ସାନିଟାଇଜ୍ କରିଥିଲେ । ଏହି କାର୍ଯ୍ୟକ୍ରମରେ ଅତିରିକ୍ତ ଜିଲ୍ଲାପାଳ ଅନୁଜ ଦାସପଟ୍ଟନାୟକ, ଜରୁରୀକାଳୀନ ଅଧିକାରୀ ସଂଘମିତ୍ରା ବେହେରା, ଡିପିଓ ସଚ୍ଚିଦାନନ୍ଦ ପତି, ଏଟିପିଏଲ ମୁଖ୍ୟ ବିରଞ୍ଚି ନାରାୟଣ ଆଚାର୍ଯ୍ୟ, ସନ୍ତୋଷ କୁମାର ଖିଲାର, ଦୀପକ ଜେନା ପ୍ରମୁଖ ଉପସ୍ଥିତ ଥିଲେ ।