ଖୋର୍ଦ୍ଧା କେନ୍ଦ୍ର ସମବାୟ ବ୍ୟାଙ୍କ ରାଉତପଡ଼ା ଶାଖାରେ ଜାଲିଆତି
ଜମାରାଶି ଫେରାଇବା ପାଇଁ କ୍ଷତିଗ୍ରସ୍ତ ହିତାଧିକାରୀଙ୍କ ଦାବିପତ୍ର
ଖୋର୍ଦ୍ଧା : ବେଗୁନିଆ ବ୍ଲକ ରାଉତପଡ଼ାରେ ଥିବା ଖୋର୍ଦ୍ଧା କେନ୍ଦ୍ର ସମବାୟ ବ୍ୟାଙ୍କ ଶାଖାର ଜଣେ ପୂର୍ବତନ ହିସାବ ରକ୍ଷକ ଦ୍ୱାରା ହିତାଧିକାରୀଙ୍କ କୋଟିଏରୁ ଅଧିକ ଟଙ୍କା ହଡ଼ପ କରାଯାଇଥିବା ଓ ଏହି ମାମଲାକୁ ବ୍ୟାଙ୍କ କର୍ତୃପକ୍ଷ ଚପାଇଦେବାକୁ ଉଦ୍ୟମ କରୁଥିବା ନେଇ ବିସ୍ତୃତ ଖବର ୨୬ ତାରିଖ ସମ୍ବାଦରେ ପ୍ରକାଶ ପାଇଥିଲା । ଏହି ଘଟଣାରେ ଆଜି କ୍ଷତିଗ୍ରସ୍ତ ହିତାଧିକାରୀମାନେ ଜିଲ୍ଲାପାଳଙ୍କୁ ସାକ୍ଷାତ କରି ୧ ସପ୍ତାହ ମଧ୍ୟରେ ସେମାନଙ୍କ ଜମା ରାଶି ଫେରାଇବା ପାଇଁ ଦାବି କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଜମାକାରୀ ଅନ୍ତର୍ଯାମୀ ଦଳେଇ, ପ୍ରମୋଦ କୁମାର ଜେନା, ବିଶ୍ୱନାଥ ଚାନ୍ଦ, ଉତ୍ତମ ଦେଈ, ନିର୍ମଳ ଦାସ, ଜଗନ୍ନାଥ ଦାସ, ବାସନ୍ତି ପରିଡ଼ା, ସୁରେନ୍ଦ୍ର ବେହେରା, ସାରଙ୍ଗଧର ବାରିକଙ୍କ ସମେତ ୬୦ରୁ ଉଦ୍ଧ୍ୱର୍ କ୍ଷତିଗ୍ରସ୍ତ ଜମାକାରୀ ଜିଲ୍ଲାପାଳଙ୍କ କାର୍ଯ୍ୟାଳୟରେ ପହଂଚିଥିଲେ । ରାଉତପଡ଼ା ଖୋର୍ଦ୍ଧା କେନ୍ଦ୍ର ସମବାୟ ବ୍ୟାଙ୍କ ଶାଖାରେ ହୋଇଥିବା ଜାଲିଆତି ସମ୍ପର୍କରେ ଜିଲ୍ଲାପାଳଙ୍କୁ ଜଣାଇବା ସହ ଏନେଇ ବ୍ୟାଙ୍କ କର୍ତୃପକ୍ଷଙ୍କ ଟାଲଟୁଳ ନୀତି ଓ ଦୋଷୀଙ୍କୁ ଖସାଇବାକୁ ଉଦ୍ୟମ ନେଇ ଅବଗତ କରାଇଥିଲେ । ସେମାନଙ୍କ କହିବା କଥା ହେଲା, ରାଉତପଡ଼ା ଓ ଆଖପାଖ ଅଂଚଳର ପ୍ରାୟ ଶତାଧିକ ଜମାକାରୀଙ୍କ କୋଟିଏରୁ ଉଦ୍ଧ୍ୱର୍ ଟଙ୍କା ହଡ଼ପ ହୋଇଛି । ଏଥିରେ ଶାଖାର କର୍ମଚାରୀ ସମ୍ପୃକ୍ତ ଅଛନ୍ତି । ଏନେଇ ସେମାନେ ଅଭିଯୋଗ କରିବା ପରେ ବ୍ୟାଙ୍କ କର୍ତୃପକ୍ଷ ୨୩ ଫେବ୍ରୁଆରୀ ୨୦୨୨ରେ ତଦନ୍ତ ଆରମ୍ଭ କରିଥିଲେ । ଏହା ମଧ୍ୟରେ ସେମାନେ ବାରମ୍ବାର ଶାଖା ଓ ଖୋର୍ଦ୍ଧା ବ୍ୟାଙ୍କର ମୁଖ୍ୟ କାର୍ଯ୍ୟାଳୟକୁ ଦୌଡ଼ୁଛନ୍ତି, କିନ୍ତୁ ବ୍ୟାଙ୍କ କର୍ତୃପକ୍ଷ ସେମାନଙ୍କୁ ଦେଖିଲେ ଲୁଚୁଛନ୍ତି ।
ସେମାନେ କହିଛନ୍ତି ସେମାନଙ୍କ ଜମା ରାଶି ଫେରାଇବାର ବ୍ୟାଙ୍କ ଗ୍ୟାରେଣ୍ଟି ଦିଆଯାଉ, ଜାଲିଆତିର ତଦନ୍ତ ରିପୋର୍ଟକୁ ସାର୍ବଜନୀନ କରାଯାଉ, ଯେହେତୁ ଏହା ୧ କୋଟି ଟଙ୍କାରୁ ଉଦ୍ଧ୍ୱର୍ ଜାଲିଆତି ହୋଇଛି ଏହାର ତଦନ୍ତ ଇଡି କିମ୍ବା ଅର୍ଥନୈତିକ ଅପରାଧ ଶାଖା ଦ୍ୱାରା କରାଯାଉ ଓ ସମ୍ପୃକ୍ତ କର୍ମଚାରୀଙ୍କୁ ତୁରନ୍ତ ଗରିଫ କରାଯାଉ । ଯଦି ୧ ସପ୍ତାହ ମଧ୍ୟରେ ସେମାନଙ୍କ ଜମାରାଶି ଫେରାଇବା ନେଇ କୌଣସି ପଦକ୍ଷେପ ନିଆନଯାଏ ତେବେ ସମସ୍ତ ଜମାକାରୀ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଆମରଣ ଅନଶନରେ ବସିବେ ।