ଖୋର୍ଦ୍ଧା: ନିର୍ମାଣ କାର୍ଯ୍ୟକୁ ପ୍ରୋତ୍ସାହନ ଓ ଶ୍ରମିକଙ୍କୁ ନିଯୁକ୍ତି ଦେବା ପାଇଁ ଲକଡାଉନ କଟକଣାକୁ କୋହଳ କରାଯାଇଛି । କିନ୍ତୁ ଏହି ନିର୍ମାଣ କାର୍ଯ୍ୟଗୁଡ଼ିକରେ ବ୍ୟାପକ ଅନିୟମିତତା ହେଉଥିବା ନେଇ ବିଭିନ୍ନ ସ୍ଥାନରୁ ଅଭିଯୋଗ ଆସିବା ଆରମ୍ଭ ହୋଇଛି । ଟଙ୍ଗି ବ୍ଲକ ଅଧୀନ ଓଳସିଂହ ପଂଚାୟତରେ ଏଭଳି ରାସ୍ତା କାମରେ ଜାଲିଆତି ହୋଇଥିବା ନେଇ ଖୋଦ୍ ସରପଂଚ ଅଭିଯୋଗ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଆଜି ଏନେଇ ଜିଲ୍ଲାପାଳଙ୍କୁ ଲିଖିତ ଭାବେ ଅଭିଯୋଗ କରି ଘଟଣାର ତଦନ୍ତ କରିବାକୁ ସରପଂଚ ପ୍ରେମାନନ୍ଦ ପରିଡ଼ା, ସମିତି ସଭ୍ୟା ଯସ୍ମିତା ବରିସଲ ପ୍ରମୁଖ ଦାବି କରିଛନ୍ତି । ନିଜର ଅଭିଯୋଗରେ ଦର୍ଶାଇଛନ୍ତି ଯେ ଓଳସିଂହ-ଗୟାବନ୍ଧ ରାସ୍ତାର ଡମଣାଭୂମୀ ତୋଟା ଠାରେ ୩୦୦ ମିଟର ରାସ୍ତା ନିର୍ମାଣ ପାଇଁ ଅର୍ଥ ମଂଜୁର ହୋଇଥିଲା । କିନ୍ତୁ ଏହି ରାସ୍ତା ନିର୍ମାଣ ନକରି ଅନ୍ୟ ଭଲ ରାସ୍ତାରେ ପିଚୁ ମଡ଼ାଇ କାମ ଶେଷ କରିଛନ୍ତି ।
ଓଳସିଂହ ସରପଂଚ ପ୍ରେମାନନ୍ଦ ପରିଡ଼ାଙ୍କ କହିବାନୁସାରେ, ଡମରଭୂମା-ଓଳସିଂହ ରାସ୍ତା ନିର୍ମାଣ ପାଇଁ ଗାଁର କିଛି ବଦାନ୍ୟ ବ୍ୟକ୍ତି ସ୍ୱଇଚ୍ଛାରେ ନିଜର ଘରୋଇ ଜମି ଛାଡ଼ିଥିଲେ ।
ଏନେଇ ପଂଚାୟତର ପ୍ରସ୍ତାବ ମଧ୍ୟ ଗୃହିତ ହୋଇଥିଲା । ଏହାପରେ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ପ୍ରାୟ ୨୭ଲକ୍ଷ ଟଙ୍କାର ଟେଣ୍ଡର ହୋଇଥିଲା । ଲକଡାଉନ ଯୋଗୁଁ କାମ ଅଟକି ରହିଥିଲା । କିନ୍ତୁ ଗତକାଲି ମଧ୍ୟ ରାତ୍ରିରେ ସେହି ରାସ୍ତା ନିର୍ମାଣ ନକରି ଗୟାବନ୍ଧର ଅନ୍ୟ ଏକ ଭଲ ରାସ୍ତାରେ ୩ଘଂଟାରେ ମଧ୍ୟରେ ପିଚୁ ଢାଳି କାମ ଶେଷ ହୋଇଯାଇଥିବା ଦର୍ଶାଯାଇଛି । ସରପଂଚ ଶ୍ରୀ ପରିଡ଼ା କହିଛନ୍ତି ଯେ ସେ ଏନେଇ ଗ୍ରାମ୍ୟ ଉନ୍ନୟନ ବିଭାଗ କନିଷ୍ଠଯନ୍ତ୍ରୀଙ୍କୁ ପଚାରିଥିଲେ । କନିଷ୍ଠଯନ୍ତ୍ରୀ କହିଛନ୍ତି ଯେ ଗୟାବନ୍ଧ ଲୋକ ରାସ୍ତା କାମ କରିବାକୁ ବିରୋଧ କରିଥିଲେ । ଏଣୁ କାମକୁ ପରିବର୍ତନ କରାଯାଇଛି ।
ତେବେ ବର୍ତମାନ ଯେଉଁ ସ୍ଥାନରେ ପିଚୁ ଢଳାଯାଇଛି ତାହା ଗୟାବନ୍ଧ ପଂଚାୟତରେ ପଡ଼ୁଛି । ଯଦି ଗୟାବନ୍ଧ ଲୋକ ବିରୋଧ କରିଥିଲେ ତେବେ ଡମଣଭୂମାରେ କାମ ନହୋଇ ଗୟାବନ୍ଧରେ କାହିଁକି କରାଗଲା? ଏହି ପ୍ରଶ୍ନର ଉତ୍ତରରେ ବିଭାଗୀୟ ଏସ୍ଡିଓ ମଧ୍ୟ ସନ୍ତୋଷଜନକ ଭାବେ ଦେଇପାରିନାହାନ୍ତି । ଏହି ଦୃଷ୍ଟିରୁ ଘଟଣା ପ୍ରତି ତୁରନ୍ତ ଦୃଷ୍ଟି ଦେଇ ତଦନ୍ତ କରିବା ସହ ସମ୍ପୃକ୍ତ ଠିକାଦାର, ଜେଇ ଓ ଏସ୍ଡିଓଙ୍କ ବିରୋଧରେ ପଦକ୍ଷେପ ନେବାକୁ ସରପଂଚ, ସମିତି ସଭ୍ୟ ପ୍ରମୁଖ ଦାବି କରିଛନ୍ତି ।