ଚନ୍ଦାହାଣ୍ଡି: ନବରଙ୍ଗପୁର ଜିଲ୍ଲା ଚନ୍ଦାହାଣ୍ଡି ବ୍ଲକ ବେହେରାମୁଣ୍ଡା ପଂଚାୟତ ବାବୁରିଆ ବିଦ୍ୟାଳୟ ଗେଟ୍ ରେ ଆଜି ଜମି ମାଲିକ ତାଲା ପକାଇଥିବା ବେଳେ ପୁଲିସ ଓ ବ୍ଲକ ପ୍ରଶାସନ ପହଞ୍ଚି ବିଦ୍ୟାଳୟର ତାଲା ଖୋଲିଥିବା ଜଣାପଡିଛି। ସୂଚନାରୁ ପ୍ରକାଶ ବାବୁରିଆ ଗ୍ରାମର ପରୀକ୍ଷୀତ ନାଗଙ୍କ ପିତା ବୈଦର ନାଗଙ୍କ ପଟ୍ଟା ଜମିରେ ଆଜକୁ ପଚାଶ ବର୍ଷରୁ ଉର୍ଦ୍ଧ୍ବ ହେବ ବିଦ୍ୟାଳୟ ନିର୍ମାଣ ହୋଇଛି । ତେବେ ବିଦ୍ୟାଳୟରେ ରୋଷେୟା ନିଯୁକ୍ତି ଦାବି କରି ପରୀକ୍ଷୀତ ନାଗ ଦୀର୍ଘ ଦିନରୁ ଦାବି କରି ଆସୁଛନ୍ତି । ଏନେଇ ପୂର୍ବରୁ ବିଦ୍ୟାଳୟ ପରିଚାଳନା କମିଟିର ସଦସ୍ୟମାନେ ପରୀକ୍ଷୀତଙ୍କୁ ଅତିରିକ୍ତ ରୋଷେୟା ନିଯୁକ୍ତ କରିବା ନିମନ୍ତେ ଚନ୍ଦାହାଣ୍ଡି ବ୍ଲକ ସଭାଗୃହଠାରେ ହୋଇଥିବା ଜିଲ୍ଲାପାଳଙ୍କ ଅଭିଯୋଗ ଶିବିରରେ ଲିଖିତ ଭାବେ ପ୍ରଦାନ କରିଥିଲେ । ତେବେ ବିଦ୍ୟାଳୟରେ କାର୍ଯ୍ୟରତ ରୋଷେୟା ଭଗବତ ସୋରୀ ୧୯୯୨ ମସିହାରେ ରୋଷେୟା ଭାବେ କୋରାପୁଟ ଜିଲ୍ଲା ମଙ୍ଗଳ ଅଧିକାରୀଙ୍କ ଚିଠି ନମ୍ବର ୩୯୯/୧୯୯୨ ପ୍ରକାରେ ନିଯୁକ୍ତ ହୋଇଥିବାବେଳେ ୨୦୨୮ ମସିହାରେ ସେ ଅବସର ନେବେ ।
Sambad is now on WhatsApp
Join and get latest news updates delivered to you via WhatsApp
ପରୀକ୍ଷୀତ ନାଗ ବାରମ୍ବାର ବିଦ୍ୟାଳୟ କୁ ଯାଇ ତାଲା ପକେଇବେ ବୋଲି ପ୍ରଧାନ ଶିକ୍ଷକଙ୍କୁ ଧମକ ଦେଇ ଆସୁଥିବା ନେଇ ଗତ ୨୨/୬/୨୨ ରେ ବିଦ୍ୟାଳୟର ପ୍ରଧାନ ଶିକ୍ଷକ ଚନ୍ଦାହାଣ୍ଡି ଗୋଷ୍ଠୀ ଶିକ୍ଷା ଅଧିକାରୀ ଏବଂ ଚନ୍ଦାହାଣ୍ଡି ଗୋଷ୍ଠୀ ଉନ୍ନୟନ ଅଧିକାରୀଙ୍କୁ ଲିଖିତ ଭାବେ ଅବଗତ କରାଇଥିଲେ । କିନ୍ତୁ ପ୍ରଶାସନ ଏଥିପ୍ରତି ଦୃଷ୍ଟି ଦେଇ ନଥିଲେ । ଫଳ ସ୍ବରୂପ ଆଜି ପରୀକ୍ଷୀତ ନାଗ ବିଦ୍ୟାଳୟରେ ତାଲା ପକେଇ ଥିଲେ । ବିଦ୍ୟାଳୟରେ ତାଲା ପକେଇବା ଖବର ପାଇ ଚନ୍ଦାହାଣ୍ଡି ବିଡିଓ ଧର୍ମରାଜ ମାଝୀ ଏବଂ ଚନ୍ଦାହାଣ୍ଡି ଥାନା ଏସ ଆଇ ବିଜୁରାମ ବାଘ ପହଞ୍ଚି ବୁଝାସୁଝା କରିବା ସହ ବିଦ୍ୟାଳୟ ଗେଟରୁ ତାଲା ଖୋଲିବା ପରେ ପରିସ୍ଥିତି ସ୍ବାଭାବିକ ହୋଇଥିଲା ।
ପ୍ରକାଶ ଥାଉକି ଏହି ବିଦ୍ୟାଳୟରେ ଅନ୍ତେବାସୀ ଛାତ୍ରଛାତ୍ରୀ ରହୁଥିବା ବେଳେ ଶନିବାର ଓ ରବିବାର ବିଦ୍ୟାଳୟ ଛୁଟି ଥିବାରୁ ଅନ୍ତେବାସୀ ଛାତ୍ରଛାତ୍ରୀମାନଙ୍କୁ ନେଇ ନିଜ ନିଜ ଅଭିଭାବକଙ୍କ ସହ ବିଦ୍ୟାଳୟକୁ ଆସିଥିବା ବେଳେ ଗେଟ୍ ରେ ତାଲା ପଡିଥିବା ସହ ବର୍ଷା ଲାଗିରହିଥିବାରୁ ଛାତ୍ର ଛାତ୍ରୀ ଓ ଅଭିଭାବକ ବର୍ଷାରେ ଭିଜି ହିନସ୍ତା ହୋଇଥିଲେ । ଏଥି ପ୍ରତି ଜିଲ୍ଲା ପ୍ରଶାସନ ସ୍ୱତନ୍ତ୍ର ଦୃଷ୍ଟି ଦେବାକୁ ଗ୍ରାମବାସୀ ଦାବି କରିଛନ୍ତି ।