ଖୋର୍ଦ୍ଧା : ସାଇବର ଠକେଇର ଶିକାର ହୋଇ ଦୀର୍ଘ ୧ ବର୍ଷ ଧରି ଦୋଷୀ ଧରାନପଡ଼ିବା ଓ ଟଙ୍କା ଫେରିନପାଇବା ଘଟଣାକୁ ନେଇ ଆଜି ବେଗୁନିଆର ଜଣେ କାଠ ବ୍ୟବସାୟୀ ଆତ୍ମଦାହ ଉଦ୍ୟମ କରିବା ବେଳେ ପୁଲିସ ଦ୍ୱାରା ଉଦ୍ଧାର ହୋଇଛନ୍ତି । ପରେ ଉପଜିଲ୍ଲାପାଳଙ୍କ କୋର୍ଟରେ ବ୍ୟକ୍ତିଗତ ମୁଚଲିକାରେ ଖଲାସ ହୋଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସାଇବର ଠକେଇର ଶିକାର ହୋଇଥିବା ବେଗୁନିଆର ଜଣେ କାଠ ବେପାରୀ ବ୍ରଜବନ୍ଧୁ ସାହୁ ଆଜି ସକାଳେ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଆତ୍ମଦାହ କରିବାକୁ ଉଦ୍ୟମ କରିବା ବେଳେ ସେଠାରେ ଉପସ୍ଥିତ ଥିବା ପୁଲିସ ଦ୍ୱାରା ଗିରଫ ହୋଇଛନ୍ତି । ଏନେଇ ଏସ୍ପି ଅଜୟ ପ୍ରତାପ ସ୍ୱାଇଁ ସୂଚନା ଦେଇ କହିଛନ୍ତି ଯେ ଏହି ଘଟଣାରେ ତାଙ୍କ ବିରୋଧରେ ମାମଲା ରୁଜୁ କରାଯାଇନାହିଁ । କିନ୍ତୁ ଉପଜିଲ୍ଲାପାଳଙ୍କ କୋର୍ଟରେ ବ୍ୟକ୍ତିଗତ ମୁଚଲିକାରେ ଛଡ଼ାଯାଇଛି । ଏହା ସହ ତାଙ୍କରି ଉପସ୍ଥିତିରେ ବ୍ରଜବନ୍ଧୁ କ୍ରାଇମ୍ବ୍ରାଂଚ ଏଡିଜିଙ୍କ ସହ କଥାବାର୍ତା କରିଛନ୍ତି । ମାମଲା ତଦନ୍ତାଧୀନ ରହିଥିବା ଓ ଠକେଇରେ ନାଇଜେରିଆ ନାଗରିକ ସମ୍ପୃକ୍ତ ଥିବା ଜଣାପଡ଼ିଛି । ତେବେ ମାମଲା ସଂକ୍ରାନ୍ତରେ ଅଧିକ ଆଲୋଚନା କରିବାକୁ ଏଡିଜି ଆସନ୍ତାକାଲି ବ୍ରଜବନ୍ଧୁଙ୍କୁ ଭୁବନେଶ୍ୱର କାର୍ଯ୍ୟାଳୟ ଡକାଇଛନ୍ତି ।
ସୂଚନାନୁସାରେ, ବେଗୁନିଆ ବାଙ୍କୋଇର ବ୍ରଜବନ୍ଧୁ ସାହୁ ଜଣେ କାଠ ବେପାରୀ । ତାଙ୍କର ଜଗନ୍ନାଥ ଟିମ୍ବର ଡିପୋ ନାମରେ ଏକ ବଡ଼ କାଠ ବ୍ୟବସାୟ ରହିଛି । ସେ ବର୍ଷକୁ ପ୍ରାୟ ଦେଢ଼-ଦୁଇ କୋଟି ଟଙ୍କାର କାଠ ବ୍ୟବସାୟ କରିଥାନ୍ତି । ୨୦୧୯ ଅଗଷ୍ଟ ୧ ତାରିଖରେ ପୋଲାଣ୍ଡରୁ ଶାଗୁଆନ କାଠ କିଣିବାକୁ ଏକ ବିଦେଶୀ କମ୍ପାନୀ ଟ୍ରେଡ୍ ୱିଣ୍ଡୋ ସହ ଯୋଗାଯୋଗ କରିଥିଲେ । କମ୍ପାନୀ ବମ୍ବେ ଓ ଆସାମରେ ଥିବା ସେମାନଙ୍କ ଏଜେଣ୍ଟଙ୍କ ସହ କଥାବାର୍ତା କରିବାକୁ କହିଥିଲେ । ପରାମର୍ଶ ଅନୁସାରେ ବମ୍ବେର ଏଜେଂଟ୍ ସହ କଥାବାର୍ତା କରି କାଠ ବାବଦକୁ ୨୩ଲକ୍ଷ ଟଙ୍କା ଦେବାକୁ ଚୁକ୍ତି ହୋଇଥିଲା । ଏଣୁ ବ୍ରଜବନ୍ଧୁ ନିଜ କମ୍ପାନୀର କାଗଜପତ୍ର ସହ ପ୍ରଥମ କିସ୍ତିରେ ବ୍ୟାଙ୍କ ଅଫ୍ ଇଣ୍ଡିଆରୁ ଋଣ ଆଣି ୧୬ଲକ୍ଷ ୩୨ ହଜାର ଟଙ୍କା ଏଜେଣ୍ଟ ଦେଇଥିବା ବ୍ୟାଙ୍କ ଆକାଉଣ୍ଟକୁ ପଠାଇଥିଲେ । ଅଗଷ୍ଟ ୩୦, ୨୦୧୯ରେ ଜାହଜରେ ଆସି ପାରାଦ୍ୱୀପ ବନ୍ଦରରେ କାଠ ଲାଗିବ ସେଠାରେ ବଳକା ଟଙ୍କା ଦେଇ କାଠ ନେଇଯିବାକୁ ଏଜେଂଟ୍ କହିଥିଲେ । ତେବେ ବ୍ରଜବନ୍ଧୁ ନିର୍ଦ୍ଧାରିତ ଦିନ ପାରାଦ୍ୱିପ ଯାଇ ଏଭଳି କୌଣସି ଜାହାଜ ଆସିନଥିବା ଓ ସେ ଠକେଇରେ ପଡ଼ିଥିବା ଜାଣିବାକୁ ପାଇଥିଲେ । ଏନେଇ ସେ ବେଗୁନିଆ ଥାନାରେ ପ୍ରଥମେ ଲିଖିତ ଅଭିଯୋଗ ଦେଇଥିଲେ । କିନ୍ତୁ ଏହା ସାଇବର ଠକେଇ ହୋଇଥିବାରୁ ଭୁବନେଶ୍ୱର ସାଇବର ଥାନାରେ ଅଭିଯୋଗ ଦେବାକୁ ଥାନା ଅଧିକାରୀ ପରାମର୍ଶ ଦେଇଥିଲେ । ପରାମର୍ଶ ଅନୁସାରେ ସାଇବର ଥାନାରେ ଅଭିଯୋଗ କରି ଏହା ମଧ୍ୟରେ ୧ ବର୍ଷ ବିତିଯାଇଥିଲେ ମଧ୍ୟ ଦୋଷୀ ଧରାପଡ଼ିନଥିବା ଓ ତାଙ୍କ ଟଙ୍କା ଫେରିପାଇନଥିବାରୁ ସେ ୨୧ ତାରିଖରେ ଜିଲ୍ଲାପାଳଙ୍କୁ ସାକ୍ଷାତ କରି ଆତ୍ମଦାହ କରିବାକୁ ଲିଖିତ ଚେତାବନୀ ଦେଇଥିଲେ ।