ରାୟଗଡା: ରାୟଗଡା ଜିଲ୍ଲାକୁ ଗତ ଦୁଇବର୍ଷ ତଳେ କେନ୍ଦ୍ର ରେଳ ବିଭାଗ ପକ୍ଷରୁ ରେଳ ଡିଭିଜନ ଭାବେ ଘୋଷଣା କରାଯାଇଥିଲା। ଏହାପରେ ଚଳିତବର୍ଷ ରେଳ ବଜେଟରେ ପ୍ରାୟ ୧୦ କୋଟି ଟଙ୍କା ମିଳିଥିବା ବେଳେ କାମ ଏକ ପ୍ରକାର ଆରମ୍ଭ କରିଛି ରେଳ ବିଭାଗ। ରେଳ ଡିଭିଜନ ପାଇଁ ପ୍ରାୟ ୩୦୦ ଏକ ଜାଗା ଦରକାର ପଡୁଥିବା ବେଳେ ରେଳବିଭାଗ ପାଖରେ ପାଖାପାଖି ଶହେ ଏକର ଜାଗା ରହିଥିବା ଜଣାପଡିଛି। ୩ୟ ରେଳ ଲାଇନ ପାଇଁ ମଧ୍ୟ କାମ ଜୋରସୋରରେ ଚାଲିଥିବା ବେଳେ ଏହି ରେଳ ଲାଇନ ଏବଂ ରେଳ ଡିଭିଜନ ପାଇଁ ରେଳ ବିଭାଗର ସମସ୍ତ ଜାଗାରେ ଘର କରି ରହିଥିବା ବସ୍ତିବାସିନ୍ଦା ଲୋକଙ୍କୁ ହଟାଇବା ପାଇଁ ରେଳ ବିଭାଗ ତରଫରୁ ଉଚ୍ଛେଦ କାମ ଆରମ୍ଭ ହୋଇଛି। କିନ୍ତୁ ତହସିଲ ଏବଂ ପୌର ପରିଷଦ ତରଫରୁ ବସ୍ତିବାସିନ୍ଦା ଲୋକଙ୍କୁ ହଟିବା ପାଇଁ ବାରମ୍ବାର ବୈଠକ ସହ ବୁଝାସୁଝା କରାଯାଉଛି। ଏପରିକି ଏପ୍ରିଲ ୨୪ ତାରିଖ ସୁଦ୍ଧା ଯେଉଁ ମାନଙ୍କର ପଟ୍ଟା କିମ୍ବା କୌଣସି କାଗଜପତ୍ର ରହିଛି ତେବେ ତୁରନ୍ତ ତହସିଲ କାର୍ଯ୍ୟାଳୟରେ ତାକୁ ଦାଖଲ କରିବାକୁ ନିର୍ଦେଶ ଦିଆଯାଇଥିଲା। ଶେଷ ସୀମା ମଧ୍ୟ ସରିଯାଇଛି। ଯେଉଁମାନଙ୍କର କାଗଜପତ୍ର କିଛି ନାହିଁ ତେବେ ସେମାନଙ୍କୁ ଜବରଦସ୍ତ ରେଳବିଭାଗ ହଟାଇବ ବୋଲି ସୂଚନା ରହିଛି। କିଛି ବସ୍ତିରେ ନିଜେ ଲୋକେ ହଟି ଯାଇଥିବା ରେଳ ବିଭାଗ କହିଛି।

Advertisment

ପ୍ରକାଶ ଥାଉକି, ରାୟଗଡା ସଦର ମହକୁମାରେ ପ୍ରାୟ ୨୫ଟି ବସ୍ତି ରହିଛି। ସେଗୁଡିକ ହେଲା ଆଦିବାସୀ କଲୋନି, ଆମ୍ବାଗୁଡା-୧, ଆମ୍ବାଗୁଡା-୨, ଅଞ୍ଜିଆପେଟା, ଭୀମା ସାହି, ଚିଲିଂ ପ୍ଲାଣ୍ଟ ବ୍ଲକ ସାହି, ଚିନ୍ତଲପେଟା, ଡିଏଫଓ କଲୋନୀ, ପାଏର ଷ୍ଟେସନ ପଛ ସାହି, ହରିଜନ ସାହି, ଜାଗଲି ସାହି, ଝଡିଆ ସାହି, ଜେସକୋ ନ୍ୟୁ କଲୋନୀ, କଇଲାପଡା, କୃଷ୍ଣ ନଗର, ମାଝିଗୌରି ବଙ୍ଗାଳି ସାହି, ନ୍ୟୁ କୋଟେଲଗୁଡା, ଆଡିଗୁଡା, ରେଳବାଇ ଗୁଡସ୍ କଲୋନି, ରେଳବାଇ ନ୍ୟୁ କଲୋନି, ରାଣୀଗୁଡା, ରେଲି ସାହି, ରେଭ୍ୟୁନୁ କଲୋନୀ ପଛସାହି, ଅଣ୍ଡରଗ୍ରାଉଣ୍ଡ ଏରିଆ, ଉତ୍କଳମଣି ନଗର, ସ୍ବିପର କଲୋନି। ତେବେ ଏହି ବସ୍ତିଗୁଡ଼ିକ ମଧ୍ୟରୁ ୧୧ଟି ବସ୍ତି ଯଥା ଭୀମା ସାହି, ଡିଏଫଓ କଲୋନି, ହରିଜନ ସାହି, ଜଗଲି ସାହି, ଝଡିଆ ସାହି, ଜେସକୋ କଲୋନି, କଇଲାପଡା, ଅଣ୍ଡରଗ୍ରାଉଣ୍ଡ ଏରିଆ, ସ୍ବିପର କଲୋନି, ମାଝିଗୌରି ବଙ୍ଗାଳୀସାହିକୁ ରେଳ ବିଭାଗ ପକ୍ଷରୁ ଉଚ୍ଛେଦ କରାଯିବ ବୋଲି ନୋଟିସ ଜାରି କରାଯାଇ ସାରିଛି।

ଦୀର୍ଘଦିନ ଧରି ଏହି ବସ୍ତିବାସିନ୍ଦା ଘର କରି ରହିଥିବା ବେଳେ ଆମକୁ ଅନ୍ୟତ୍ର ଘର ତିଆରି କରି ଥଇଥାନ କଲେ ହଟିବୁ ବୋଲି ଅନୁରୋଧ କରିଛନ୍ତି। ତେବେ ଜିଲ୍ଲା ପ୍ରଶାସନ ତରଫରୁ ପିତାମହଲ ନିକଟରେ ପ୍ରାୟ ୪ ଏକର ଜାଗାରେ ଏମାନଙ୍କୁ ଥଇଥାନ କରାଯିବା ପାଇଁ ପ୍ରସ୍ତାବ ରହିଥିବା ସୂଚନା ମିଳିଛି। ପ୍ରାୟ ୨୩୧୦ଟି ଘର ରହିଥିବା ବେଳେ ରେଳ ବିଭାଗ ପକ୍ଷରୁ ୧୦୯୩ଟି ଘରକୁ ଉଚ୍ଛେଦ କରାଯିବ ବୋଲି ଜଣାପଡିଛି।

publive-image Sambad

ବହୁ ଲୋକ ଏହି ବସ୍ତି ଗୁଡିକରେ ବେଆଇନ ଭାବେ ଘର ତିଆରି କରି ଭଡା ଦେଇଥିବା ଦେଖିବାକୁ ମିଳିଛି। ଯେଉଁମାନଙ୍କର କୌଣସି ନଥିପତ୍ର ନାହିଁ ସେମାନେ ବହୁ ହଇରାଣ ହେବେ ବୋଲି କୁହାଯାଇଛି। ଏତେ ପରିବାର ବେଘର ହେଉଥିବାରୁ ପ୍ରଶାସନ ତରଫରୁ ବାସହରା ମାନଙ୍କୁ ମଧ୍ୟ ଥଇଥାନ କରିବାକୁ ସାହି ବାସିନ୍ଦା ଦାବି କରିଛନ୍ତି। ରେଳ ଲାଇନ କାମ ଜୋରସୋରରେ ଚାଲିଥିବା ଯୋଗୁଁ ରେଳ ବିଭାଗ ଜିଲ୍ଲା ପ୍ରଶାସନକୁ ତୁରନ୍ତ ବସ୍ତି ବାସିନ୍ଦାଙ୍କୁ ହଟାଇବାକୁ ଅନୁରୋଧ କରିଥିବା ବେଳେ ଜିଲ୍ଲା ପ୍ରଶାସନ ଆଉ କିଛିଦିନ ସମୟ ମାଗିଥିବା କୁହାଯାଇଛି।

ତେବେ ଏନେଇ ପୌର ପରିଷଦର ଅଧ୍ୟକ୍ଷ ପି. ମହେଶ ପଟ୍ଟନାୟକ ବସ୍ତି ଗୁଡିକକୁ ଯାଇ ଲୋକଙ୍କୁ ବୁଝାସୁଝା କରିବା ସହ ସେମାନଙ୍କର ସୁବ୍ୟବସ୍ଥା କରାଯିବା ପାଇଁ ପ୍ରତିଶ୍ରୁତି ଦେଇଥିବା ବେଳେ ତହସିଲ ପକ୍ଷରୁ ମଧ୍ୟ ବସ୍ତି ଗୁଡିକରେ ଲୋକଙ୍କୁ ବୁଝାସୁଝା କରାଯାଇଛି। ସେହିପରି ରେଳବିଭାଗରର ଆସିଷ୍ଟାଣ୍ଡ ଡିଭିଜନ ଇଂଜିନିୟର ସଂଜୀବ ଦିକ୍ଷିତଙ୍କୁ ଏନେଇ ପଚାରିବାରୁ ସେ କାମ ଚାଲିଥିବା ବେଳେ ଜିଲ୍ଲା ପ୍ରଶାସନ ବସ୍ତିବାସିନ୍ଦାଙ୍କୁ ଉଚ୍ଛେଦ କରାଇବା ସହ ସେମାନଙ୍କୁ ଥଇଥାନ କରିବାରୁ ଯୋଜନା କରୁଥିବାରୁ ଆମେ ଚୁପ ରହିଛୁ। ଯେଉଁମାନେ ନିଜେ ହଟିଗଲେ ଭଲ ନଚେତ ଆମେ ଜବରଦସ୍ତ ହଟାଇବୁ।କାରଣ ଏହା ରେଳ ବିଭାଗର ଜାଗା ଅଟେ। ରେଳ ବିଭାଗର ଜାଗାରେ କେହି ପଟ୍ଟା କିମ୍ବା କୌଣସି କାଗଜପତ୍ର କରିପାରିବେ ନାହିଁ। ବହୁତ ଦିନ ରେଳବିଭାଗର ଜାଗାରେ ରହିଲେ ଏବେ ରେଳଲାଇନ କାମ ଚାଲିଛି ସେମାନଙ୍କୁ ହଟିବାକୁ ପଡିବ ବୋଲି କହିଥିଲେ। ତେବେ ବସ୍ତିବାସିନ୍ଦା କେବେ ହଟିବେ ଦେଖିବାକୁ ବାକି ରହିଲା।