ସାପ କାମୁଡ଼ାରେ ୮ ବର୍ଷର ଶିଶୁକନ୍ୟା ସହ ୨ ମୃତ
ଖୋର୍ଦ୍ଧା: ଗତକାଲି ବିଳମ୍ବିତ ରାତିରେ ଦୁଇଟି ଭିନ୍ନ ସର୍ପଦଂଶନ ଘଟଣାରେ ଜଣେ ୮ ବର୍ଷର ଶିଶୁ କନ୍ୟା ସହ ଦୁଇଜଣଙ୍କ ମୃତ୍ୟୁ ଘଟିଛି । ନୟାଗଡ଼ ଜିଲ୍ଲା ଫତେଗଡ଼ ନୀଳକଣ୍ଠପ୍ରସାଦର ଲକ୍ଷ୍ମିପ୍ରିୟା ବଳବନ୍ତରାୟ(୮) ଗତକାଲି ରାତିରେ ନିଜ ଘରେ ଶୋଇଥିବା ସମୟରେ ଏକ ବିଷାକ୍ତ ସାପ କାମୁଡ଼ି ଦେଇଥିଲା । ପରିବାର ଲୋକ ପରେ ଦେଖି ଲକ୍ଷ୍ମିପ୍ରିୟାଙ୍କୁ ଆମ୍ବୁଲାନ୍ସ ଯୋଗେ ଖୋର୍ଦ୍ଧା ଜିଲ୍ଲା ମୁଖ୍ୟ ଚିକିତ୍ସାଳୟ ଆଣିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏନେଇ ଖୋର୍ଦ୍ଧା ଟାଉନ ଥାନା ପୁଲିସ ପକ୍ଷରୁ ୩୬/୨୦୨୨ରେ ଏକ ଅପମୃତ୍ୟୁ ମାମଲା ରୁଜୁ କରାଯାଇଛି ବୋଲି ତଦନ୍ତ ଅଧିକାରୀ ପ୍ରଦୀପ କୁମାର ପ୍ରଧାନ ସୂଚନା ଦେଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସେହିଭଳି ବେଗୁନିଆ ବ୍ଲକ ବାଘମାରୀ ଥାନା ଅଧୀନ କଂଟାମଳିମ ଗାଁରେ ଗତକାଲି ଅପରାହ୍ଣ ପ୍ରାୟ ସାଢ଼େ ୫ଟା ବେଳେ ବିଲରେ କାମ କରୁଥିବା ବେଳେ ଦଣ୍ଡପାଣି ମାର୍ଥା (୬୬)ଙ୍କୁ ସାପ କାମୁଡ଼ି ଦେଇଥିଲା । କିଛି ସମୟ ପରେ ତାଙ୍କର ସ୍ୱାସ୍ଥ୍ୟାବସ୍ଥା ବିଗିଡ଼ିବା ପରେ ପରିବାର ଓ ଆଖପାଖର ଲୋକେ ତାଙ୍କୁ ଆମ୍ବୁଲାନ୍ସରେ ଖୋର୍ଦ୍ଧା ଜିଲ୍ଲା ଚିକିତ୍ସାଳୟ ଆଣିଥିଲେ । ଚିକିତ୍ସାଧୀନ ଅବସ୍ଥାରେ ଗତକାଲି ରାତିରେ ଦଣ୍ଡପାଣିଙ୍କ ମୃତ୍ୟୁ ଘଟିଥିବା ଜଣାଯାଇଛି । ଏନେଇ ବାଘମାରୀ ଥାନାରେ ୮/୨୦୨୨ରେ ଏକ ଅପମୃତ୍ୟୁ ମାମଲା ରୁଜୁ କରାଯାଇଥିବା ନେଇ ଥାନା ଅଧିକାରୀ ପ୍ରଜ୍ଞା ଋତମ୍ଭରାକର ସୂଚନା ଦେଇଛନ୍ତି ।