ଖୋର୍ଦ୍ଧା: ଖୋର୍ଦ୍ଧା ସହରର ପ୍ରମୁଖ ସ୍ଥାନ ଓ ଉପଖଣ୍ଡ ଆରକ୍ଷୀ ଅଧିକାରୀଙ୍କ କାର୍ଯ୍ୟାଳୟ ଠାରୁ ମାତ୍ର ୩୦୦ ମିଟର ଦୂରରେ ଥିବା ଟିଏଲ୍ସି ଖେଳ ପଡ଼ିଆ ସମ୍ମୁଖ ହନୁମାନ ମନ୍ଦିରରୁ ଗତକାଲି ରାତିରେ ଏକ ବଡ଼ଧରଣର ଚୋରି ହୋଇଛି । ଦୁର୍ବୃତ୍ତ ମନ୍ଦିରରେ ଲାଗିଥିବା ତିନିଟି ତାଲାଭାଙ୍ଗି ଗର୍ଭଗୃହରୁ ଲକ୍ଷାଧିକ ଟଙ୍କାର ସାମଗ୍ରୀ ଚୋରାଇ ନେଇଛନ୍ତି ।
ଅଭିଯୋଗ ଅନୁସାରେ, ଆଜି ସକାଳେ ମନ୍ଦିର ପୂଜକ ମନ୍ଦିର ଖୋଲିବାକୁ ଯିବା ବେଳେ ମନ୍ଦିରର ପ୍ରମୁଖ ଫାଟକର ତାଲା ଭାଙ୍ଗି ତଳେ ପଡ଼ିଥିବା ଦେଖିଥିଲେ । ମନ୍ଦିର ଭିତରକୁ ପ୍ରବେଶ କରିବା ପରେ ହନୁମାନଙ୍କ ମୂର୍ତିରେ ଲାଗିଥିବା ରୁପା ମୁକୁଟ, ସୁନା କୁଣ୍ଡଳ ସହିତ ପିତ୍ତଳ ଘଂଟ, ଘଂଟା, ଥାଳି, ପୂଜା ସାମଗ୍ରୀ, ପିତଳ କୁଣ୍ଡ, ଚାମର, ସାଉଣ୍ଡ ବକ୍ସ ଆଦି ନଥିବା ଦେଖିବାକୁ ପାଇଥିଲେ । କେବଳ ଏହାନୁହେଁ ମନ୍ଦିରର ଦାନବକ୍ସକୁ ମଧ୍ୟ ଭାଙ୍ଗିବାକୁ ଦୁର୍ବୃତ୍ତମାନେ ଚେଷ୍ଟା କରିଥିଲେ, ତେବେ ଏଥିରେ ବିଫଳ ହୋଇଥିଲେ ।
Sambad is now on WhatsApp
Join and get latest news updates delivered to you via WhatsApp
ଚୋରି ଯାଇଥିବା ସମ୍ପତ୍ତିର ମୂଲ୍ୟ ପ୍ରାୟ ୨ଲକ୍ଷ ଟଙ୍କା ହେବ ବୋଲି ମନ୍ଦିର କିମଟି ପକ୍ଷରୁ ପ୍ରମୋଦ ବାରିକ, ଶରତ ମହାପାତ୍ର ପ୍ରମୁଖ ମତପ୍ରକାଶ କରିଛନ୍ତି ।
ଏନେଇ ପୂଜକଙ୍କ ପକ୍ଷରୁ ଖୋର୍ଦ୍ଧା ଟାଉନ୍ ଥାନାରେ ଲିଖିତ ଅଭିଯୋଗ ପରେ ପୁଲିସ ୭୫/୨୦୨୨ରେ ଏକ ମାମଲା ରୁଜୁ କରିଛି । ମାମଲାର ତଦନ୍ତ ଭାର ଏସ୍ଆଇ ପିଏନ୍ ବେହେରାଙ୍କୁ ଦିଆଯାଇଛି । ପ୍ରାଥମିକ ଅନୁସନ୍ଧାନରେ, ଏହା କୌଣସି ନିଶାଡ଼ିଙ୍କ କାମ ହୋଇଥିବା ଅନୁମାନ କରାଯାଉଥିଲେ ମଧ୍ୟ ମନ୍ଦିରର ତାଲା କଟର ଦ୍ୱାରା କଟାଯାଇଥିବା ଓ ଏଥିରେ ଏକାଧିକ ବ୍ୟକ୍ତି ସମ୍ପୃକ୍ତ ଥିବାରୁ ଏହା କୌଣସି ପେଷାଦାର ଅପରାଧୀଙ୍କ କାର୍ଯ୍ୟ ବୋଲି ସନେ୍ଦହ ସୃଷ୍ଟି ହୋଇଛି ।