ଐତିହାସିକ ଗଡ଼ଖୋର୍ଦ୍ଧା ଶ୍ରୀଜଗନ୍ନାଥ ମନ୍ଦିର ହୁଣ୍ଡି ଟଙ୍କା ଚୋରି
ଖୋର୍ଦ୍ଧା: ଖୋର୍ଦ୍ଧା ସହର ଉପକଣ୍ଠ ଓଡ଼ିଶାର ଶେଷ ସ୍ୱାଧୀନ ଦୁର୍ଗ ଗଡ଼ ଖୋର୍ଦ୍ଧାରେ ଥିବା ୪ଶତ ବର୍ଷ ପୁରାତନ ଶ୍ରୀଜଗନ୍ନାଥ ମନ୍ଦିରର ହୁଣ୍ଡି ଭାଙ୍ଗି କେହି ଦୁର୍ବୃତ୍ତ ଟଙ୍କା ଲୁଟି ନେଇଥିବା ଜଣାଯାଇଛି । ୯ ତାରିଖ ସକାଳେ ମନ୍ଦିରର ପୂଜକ ମନ୍ଦିର ଖୋଲିବା ବେଳେ ମନ୍ଦିରର ମୁଖ୍ୟ ଫାଟକ ଭାଙ୍ଗିଥିବା ଦେଖିଥିଲେ । ଏହାପରେ ମନ୍ଦିର ଭିତରକୁ ଯାଇ ଅନ୍ୟ ସାମଗ୍ରୀ ଯାଂଚ କରିବା ବେଳେ ମନ୍ଦିର ହୁଣ୍ଡି ମଧ୍ୟ ଭାଙ୍ଗିଥିବା ଜାଣି ପରିଚାଳକଙ୍କୁ ସୂଚନା ଦେଇଥିଲେ । ତେବେ ଏନେଇ ଆଜି ଥାନାରେ ମନ୍ଦିର ପରିଚାଳନା କମିଟି ପକ୍ଷରୁ ଲିଖିତ ଅଭିଯୋଗ ଦିଆଯାଇଛି ।
Sambad is now on WhatsApp
Join and get latest news updates delivered to you via WhatsApp
ପରିଚାଳନା କମିଟି ସଭାପତି ବିଶ୍ୱମ୍ବର ମହାରାଜ କହିଛନ୍ତି ଯେ ଏହି ମନ୍ଦିରକୁ ଗଜପତି ରାମଚନ୍ଦ୍ର ଦେବ ପ୍ରଥମ ପ୍ରତିଷ୍ଠା କରିଥିଲେ । ୧୫୭୫ରେ ମୁସଲିମ ଆକ୍ରମଣକାରୀଙ୍କ ଯୋଗୁଁ ଏଠାରେ ଶ୍ରୀଜଗନ୍ନାଥଙ୍କୁ ରଖାଯିବା ସହ ନବକଳେବର ମଧ୍ୟ ହୋଇଥିଲା । ଏଭଳି ଏକ ଐତିହାସିକ ଗୁରୁତ୍ତ୍ୱପୂର୍ଣ୍ଣ ମନ୍ଦିରରୁ ଗତ ୫ ବର୍ଷ ମଧ୍ୟରେ ୮ ଥର ଚୋରି ହୋଇଛି । ଦୁଇବର୍ଷ ପୂର୍ବେ ମଦନମୋହନ, ଶ୍ରୀଦେବୀ, ଭୂଦେବୀ, ଗୋପାଳଜୀଉ, ରାଧାରାଣୀ ଆଦି ୮ଟି ବିରଳ ଅଷ୍ଟଧାତୁ ମୂର୍ତି ଚୋରି ହୋଇଯାଇଥିଲା ।
ସେହିଭଳି କିଛି ବର୍ଷ ପୂର୍ବେ କୁଂଜ ବିହାରୀ ମନ୍ଦିରରୁ ଅଷ୍ଟଧାତୁ ବିଗ୍ରହ ଚୋରି ହୋଇଥିଲା । ଏହି ସମସ୍ତ ଘଟଣାର ଅପରାଧି ଏଯାଏଁ ଧରାପଡ଼ିନାହାନ୍ତି । ତୁରନ୍ତ ଅପରାଧୀଙ୍କୁ ଧରି ମନ୍ଦିର ମୂର୍ତି ଉଦ୍ଧାର କରିବାକୁ ପରିଚାଳକ ରମାକାନ୍ତ ପାଟ୍ଟଯୋଶୀ, କାର୍ଯ୍ୟକାରୀ ସଭାପତି ଅଜିତ ପଟ୍ଟନାୟକ, ସମ୍ପାଦକ ଗୋପାଳକୃଷ୍ଣ ଦାସ ପ୍ରମୁଖ ଦାବି କରିଛନ୍ତି ।
ଅପରପକ୍ଷରେ ଏନେଇ ଶିଳ୍ପାଂଚଳ ଫାଣ୍ଡି ଅଧିକାରୀ କହିଛନ୍ତି ୮ ତାରିଖ ରାତିରେ ଚୋରି ହୋଇଥିଲା । ଆଜି ଏନେଇ ଲିଖିତ ଅଭିଯୋଗ ଦିଆଯାଇଛି । ଅଭିଯୋଗ ଅନୁସାରେ ପ୍ରାୟ ୭ହଜାର ଟଙ୍କା ଚୋରି ହୋଇଛି । ଅଭିଯୋଗ ଭିତ୍ତିରେ ୧୯୦/୨୦୨୧ରେ ଏକ ମାମଲା ରୁଜୁ କରାଯାଇ ତଦନ୍ତ ଆରମ୍ଭ କରାଯାଇଛି । ତେବେ ଗୋଟିଏ ମନ୍ଦିରରୁ କ୍ରମାଗତ ଭାବେ ଚୋରି ହେବା ଘଟଣା ରହସ୍ୟମୟ ଲାଗୁଛି ଏଦିଗଟିକୁ ପୁଲିସ ତଦନ୍ତର ପରିସରକୁ ଆଣିଛି ।